អ្នកសម្របសម្រួលតំបន់ឥណ្ឌូប៉ាស៊ីហ្វិករបស់សេតវិមានលោក Kurt Campbell បាននិយាយនៅថ្ងៃអង្គារថា វាអាចទៅរួចដែលប្រទេសចិននិងសហរដ្ឋអាមេរិកអាចរស់នៅដោយភាពស្រុះស្រួលជាមួយគ្នាក្នុងសន្តិភាព ក៏ប៉ុន្តែការប្រឈមមានទំហំធំធេងហើយរដ្ឋាភិបាលក្រុងប៉េកាំងមានភាពគឃ្លើនកាន់តែខ្លាំងឡើងៗ។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
នៅក្នុងពិធីមួយដែលរៀបចំឡើងដោយវិទ្យាស្ថានស្រាវជ្រាវ Asia Society លោក Campbell បាននិយាយថា លោកប្រធានាធិបតី Joe Biden នឹងរៀបចំជំនួបកំពូលមួយនៅក្នុងឆ្នាំនេះជាមួយមេដឹកនាំប្រទេសអូស្ត្រាលី ឥណ្ឌា ជប៉ុនដែលគេឲ្យឈ្មោះថាក្រុមប្រទេសចតុភាគី ឬ Quad ជាក្រុមប្រទេស៤ដែលរដ្ឋាភិបាលក្រុងវ៉ាស៊ីនតោនមើលឃើញថា ជាមធ្យោបាយមួយក្នុងការប្រឆាំងជាមួយចិន។
នៅពេលសួរថា តើលោករំពឹងថានៅពេលណានឹងមានជំនួបលើកទី១រវាងលោកប្រធានាធិបតី Biden និងប្រធានាធិបតីចិនលោក Xi Jinping ឬមួយក៏ការជួបនេះអាចកើតមានឡើងនៅក្នុងជំនួបកំពូលនៃប្រទេសដែលមានសេដ្ឋកិច្ចជឿនលឿន G-20ក្នុងខែតុលាខាងមុខ លោក Campbell ឆ្លើយថា «ក្តីរំពឹងរបស់ខ្ញុំគឺថា យើងនឹងមានការជួបទាក់ទងគ្នាមួយក្នុងរយៈពេលខាងមុខ មិនយូរនោះទេ»។
លោក Campbell មានប្រសាសន៍ទៀតថា ការប្រឈមសម្រាប់សហរដ្ឋអាមេរិកគឺការបង្កើតឡើងនូវយុទ្ធសាស្ត្រមួយដែលផ្តល់ឲ្យចិននូវឱកាស ប៉ុន្តែក៏ជាការឆ្លើយតប ប្រសិនបើអាមេរិកត្រូវប្រកាន់យកនូវគោលជំហរប្រឆាំងមួយដើម្បីរក្សានូវស្ថិរភាពនិងសន្តិភាព។
លោកបន្ថែមទៀតថា វាអាចទំនងជាមាន«រយៈពេលនៃភាពមិនប្រាកដប្រជាណាមួយ ឬក៏អាចមានរយៈពេលមួយដែលអាចមានភាពតានតឹងដោយអន្លើផងដែរ។ «តើខ្ញុំគិតថា តើវាអាចទៅរួចទេដែលអាមេរិកនិងប្រទេសចិន អាចរស់នៅដោយភាពស្រុះស្រួលគ្នា ក្នុងសន្តិភាពនោះ? ចម្លើយរបស់ខ្ញុំគឺថា យើងអាច។ ប៉ុន្តែអ្វីដែលខ្ញុំគិតទៅដល់នោះគឺថា ការប្រឈមជាមួយចិន វាមានទំហំធំធេងសម្រាប់មនុស្សជំនាន់នេះ និងមនុស្សជំនាន់ក្រោយ។
លោក Campbell បានបន្ថែមថា រដ្ឋាភិបាលក្រុងប៉េកាំងក្នុងពេលថ្មីនេះ បានបង្កើននូវភាពគឃ្លើនរបស់ខ្លួនលើប្រទេសជាច្រើនក្នុងពេលតែមួយដែលជាយុទ្ធសាស្ត្រមួយផ្ទុយគ្នាដែលចិនបានធ្វើក្នុងទសវត្សរ៍១៩៩០។
លោកបានបន្តទៀតថា សហរដ្ឋអាមេរិកគាំទ្រនូវទំនាក់ទំនងមិនផ្លូវការមួយជាមួយកោះតៃវ៉ាន់ ប៉ុន្តែមិនគាំទ្រឲ្យដែនកោះនេះមានឯករាជ្យរបស់ខ្លួននោះទេ៕
