ប្រទេសចិនបានព្រមានសហរដ្ឋអាមេរិកកាលពីថ្ងៃអង្គារម្សិលមិញស្តីពីការស្វែងរកកិច្ចព្រមព្រៀងពាណិជ្ជកម្មមួយជាមួយកោះតៃវ៉ាន់ បន្ទាប់ពីរដ្ឋាភិបាលក្រុងវ៉ាស៊ីនតោននិយាយថា ខ្លួននឹងចាប់ផ្តើមចរចាជាមួយដែនកោះមួយនេះជុំវិញបញ្ហាពាណិជ្ជកម្ម។ នេះបើតាមការចេញផ្សាយរបស់ទីភ្នាក់ងារព័ត៌មាន AFP។
រដ្ឋាភិបាលក្រុងប៉េកាំងចាត់ទុកកោះតៃវ៉ាន់ដែលកំពុងគ្រប់គ្រងតាមបែបប្រជាធិបតេយ្យថាជាទឹកដីរបស់ខ្លួន និងមានការខឹងសម្បារាល់ការប៉ុនប៉ងផ្នែកការទូតណាមួយ ក្នុងការទទួលស្គាល់កោះមួយនេះ ថាជាប្រទេសឯករាជ្យ។
បណ្តាញសង្គមក្នុងប្រទេសចិនបានផ្សព្វផ្សាយព្រោងព្រាតជាមួយនឹងការខឹងសម្បាកាលពីចុងសប្តាហ៍កន្លងទៅជុំវិញដំណើរទស្សនកិច្ចរបស់ក្រុមសមាជិកព្រឹទ្ធសភាអាមេរិកមួយក្រុមទៅកាន់ទីក្រុងតៃប៉ិនិងបានប្រកាសថា រដ្ឋាភិបាលសហរដ្ឋអាមេរិកនឹងផ្តល់វ៉ាក់សាំងកូវីដ១៩ចំនួន៧៥ម៉ឺនដូសទៅឲ្យកោះតៃវ៉ាន់។
ទន្ទឹមនឹងនេះដែរ រដ្ឋមន្ត្រីការបរទេសអាមេរិកលោក Antony Blinken បានបន្ថែមសាំងទៅលើភ្លើងដែលកំពុងឆេះ និងបានធ្វើឲ្យចិនកាន់តែខឹងខ្លាំងថែមទៀត ដោយលោកបានថ្លែងប្រាប់ក្នុងសវនា ការសភាអាមេរិកថា ការពិភាក្សាជាមួយកោះតៃវ៉ាន់លើកិច្ចព្រមព្រៀងពាណិជ្ជកម្មមួយនឹងត្រូវចាប់ផ្តើមក្នុងពេលខាងមុខនេះ។
លោក Blinken បានថ្លែងថា៖ «ខ្ញុំដឹងថា យើងកំពុងធ្វើការសន្ទនាជាមួយកោះតៃវ៉ាន់ ឬនឹងត្រូវធ្វើក្នុងពេលឆាប់ៗនេះលើលក្ខខណ្ឌមួយចំនួនក្នុងកិច្ចព្រមព្រៀងនេះ។
កាលពីថ្ងៃអង្គារម្សិលមិញ អ្នកនាំពាក្យក្រសួងការបរទេសចិនលោក Zhao Lijian បានទាមទារឲ្យរដ្ឋាភិបាលក្រុងវ៉ាស៊ីនតោន «បញ្ឈប់រាល់កម្មវិធីផ្លូវការនានាជាមួយកោះតៃវ៉ាន់ ត្រូវប្រយ័ត្នប្រយែងក្នុងការដោះស្រាយបញ្ហាកោះនេះ និងត្រូវបញ្ឈប់រាល់ការបញ្ជូនសញ្ញាខុសណាមួយទៅដល់កម្លាំងដែលចង់បានឯករាជ្យនៅលើដែនកោះតៃវ៉ាន់»។
តៃវ៉ាន់បានចោទរដ្ឋាភិបាលក្រុងប៉េកាំងថាបានរាំងខ្ទប់នូវកិច្ចប្រឹងប្រែងរបស់ខ្លួនក្នុងការស្វែងរកវ៉ាក់សាំងបង្ការជំងឺកូវីដ១៩ ដោយនិយាយថា នេះជាយុទ្ធនាការរបស់ចិនដីគោកក្នុងការដាក់កោះតៃវ៉ាន់ឲ្យស្ថិតក្នុងភាពឯកោ។
ទោះបីជារដ្ឋាភិបាលសហរដ្ឋអាមេរិកបានកាត់ផ្តាច់ទំនាក់ទំនងការទូតជាផ្លូវការជាមួយកោះតៃវ៉ាន់ ក្នុងឆ្នាំ១៩៧៩ដើម្បីទទួលស្គាល់រដ្ឋាភិបាលក្រុងប៉េកាំងជាតំណាងស្របច្បាប់ផ្លូវការតែមួយរបស់ចិននោះក្តី ក៏សហរដ្ឋអាមេរិកនៅតែស្ថិតនៅជាសម្ព័ន្ធមិត្តដ៏មានឥទ្ធិពលបំផុតរបស់កោះតៃវ៉ាន់ និងជាអ្នកផ្គត់ផ្គង់អាវុធយុទ្ធភណ្ឌដ៏សំខាន់របស់ដែនកោះមួយនេះ។
រដ្ឋមន្ត្រីការបរទេសអាមេរិកលោក Blinken បានបញ្ជាក់កាលពីថ្ងៃចន្ទថា៖ «យើងមានការតាំងចិត្តទៅលើហេតុផលដែលថា កោះតៃវ៉ាន់ត្រូវតែមានមធ្យោបាយក្នុងការការពារខ្លួន ហើយការណ៍នេះគឺស្របទៅតាមច្បាប់ស្តីពីទំនាក់ទំនងជាមួយកោះតៃវ៉ាន់»៕
