ច្បាប់សន្តិសុខជាតិថ្មីសម្រាប់ទីក្រុងហុងកុង ដែលរដ្ឋសភាចិនបានអនុម័តកាលពីថ្ងៃអង្គារម្សិលមិញ បានចូលជាធរមាននៅថ្ងៃពុធនេះ ដែលនឹងអាចដាក់ទោសរហូតដល់ការជាប់ពន្ធនាគារមួយជីវិតចំពោះបទឧក្រិដ្ឋផ្ដាច់ខ្លួន ការផ្ដួលរំលំរដ្ឋអំណាច អំពើភេរវកម្ម និងការឃុបឃិតជាមួយនឹងកម្លាំងបរទេស។
បើយោងលើច្បាប់នេះ សកម្មភាពរបស់ទីភ្នាក់ងារសន្តិសុខជាតិថ្មី និងរបស់បុគ្គលិកទីភ្នាក់ងារនេះនៅក្នុងទីក្រុងហុងកុង នឹងមិនស្ថិតក្រោមដែនសមត្ថកិច្ចរបស់រដ្ឋាភិបាលមូលដ្ឋាននោះទេ ហើយរដ្ឋាភិបាលក្រុងប៉េកាំង មានការទទួលខុសត្រូវទូលំទូលាយចំពោះកិច្ចការសន្តិសុខជាតិនៅក្នុងទីក្រុងហុងកុង។
ច្បាប់នេះសំដៅលើពលរដ្ឋទាំងអចិន្ត្រៃយ៍ និងមិនអចិន្ត្រៃយ៍នៃទីក្រុងហុងកុង ហើយសម្រាប់អ្នកណាដែលត្រូវបានផ្ដន្ទាទោសថា បានរំលោភលើច្បាប់នេះ នឹងមិនត្រូវបានអនុញ្ញាតឲ្យឈរឈ្មោះនៅក្នុងការបោះឆ្នោតណាមួយនៅក្នុងទីក្រុងហុងកុងនោះទេ។
ចំណុចលំអិតនៃច្បាប់នេះបានបញ្ជាក់ថា ក្រុមហ៊ុន អង្គការ ឬ ក៏ក្រុមណាមួយដែលរំលោភលើច្បាប់នេះ នឹងត្រូវផាកពិន័យ ហើយប្រតិបត្តិការរបស់អង្គភាពទាំងនេះអាចនឹងត្រូវផ្អាក។
មួយវិញទៀត សម្រាប់ទ្រព្យសម្បត្តិដែលពាក់ព័ន្ធនឹងបទឧក្រិដ្ឋដែលស្ថិតក្រោមច្បាប់សន្តិសុខជាតិថ្មីនេះ អាចនឹងត្រូវផ្អិបទុក ឬ ក៏រឹបអូសយក។
ទាក់ទិននឹងរឿងសិទ្ធិសេរីភាពនានា ច្បាប់នេះចែងថា សិទ្ធិសេរីភាពទាំងនោះនឹងត្រូវបានគោរពស្របទៅតាមច្បាប់ ប៉ុន្តែអាជ្ញាធរអាចតាមដានអ្នកណាដែលគេសង្ស័យថាអាចបង្កគ្រោះថ្នាក់ដល់សន្តិសុខជាតិបាន។
ច្បាប់នេះបានបន្ថែមថា អាជ្ញាធរចិនដីគោកនឹងប្រើអំណាចច្បាប់របស់ខ្លួនទាក់ទិននឹងករណី «ស្មុគស្មាញ» មួយចំនួន ដូចជាករណីពាក់ព័ន្ធនឹងបរទេស ឬក៏ស្ថានការណ៍ធ្ងន់ធ្ងរណាមួយ ដែលអាចបង្កឲ្យមានការគំរាមកំហែងជិតកើតឡើងដល់សន្តិសុខជាតិ៕
