ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ចិន​ប្រាប់​សហរដ្ឋ​អាមេរិក​អំពីកោះ​តៃវ៉ាន់​ថា «​កុំ​លេងជាមួយ​ភ្លើង»


រដ្ឋមន្រ្តី​ក្រសួងការបរទេសចិន Wang Yi

លោក​វ៉ាង យី រដ្ឋមន្រ្តី​ការបរទេស​ចិន បាន​ជំរុញ​ឲ្យ​សហរដ្ឋ​អាមេរិកដោះស្រាយ​ឲ្យបាន​ត្រឹម​ត្រូវ​បញ្ហា​នានាដែល​ទាក់​ទិន​នឹងកោះ​តៃវ៉ាន់​ហើយ«កុំ​លេង​ជាមួយ​ភ្លើង»។

​នៅ​ដើម​សប្តាហ៍​នេះ ​ក្រសួងការ​បរទេស​សហរដ្ឋ​អាមេរិក បាន​យល់​ព្រម​ដល់​កិច្ចព្រម​ព្រៀង​មួយ​ដើម្បី​លក់រថក្រោះ ​កាំជ្រួចមីស៊ីល​និង​ឧបករណ៍​យោ​ធា​ផ្សេង​ៗ​ទៀត​ដែល​មាន​តម្លៃ​២ពាន់​២រយ​លាន​ដុល្លារ​ឲ្យ​កោះ​តៃវ៉ាន់។

ការលក់​អាវុធ​ដ៏​ធំ​នេះ បាន​ធ្វើ​ឲ្យ​រដ្ឋាភិបាល​ចិន​ខឹង​សម្បារ។​ ចិន ​បានអំពាវនាវ​ដល់​ស ហរដ្ឋ​អាមេរិក​ឲ្យ​លុប​ចោល​កិច្ច​ព្រម​ព្រៀង​នោះ ​ដោយ​និយាយ​ថា ​កិច្ច​ព្រម​ព្រៀង​នោះ ​បាន​រំលោភ​យ៉ាង​ធ្ងន់ធ្ងរ​ដល់​គោលការណ៍ចិនតែមួយ​និង​ជ្រៀតជ្រែក​យ៉ាង​ខ្លាំង​ដល់​កិច្ចការ​ផ្ទៃក្នុង​របស់​ចិន​ហើយ​នឹង​ធ្វើ​ឲ្យ​អន្ត​រាយ​អធិបតេយ្យ​ភាព​និង​ផល​ប្រយោជន៍​ខាង​សន្តិសុខ​របស់​ចិន។

​ចិន ​បាន​និយាយ​ទៀត​ថា ​ខ្លួននឹង​ដាក់​ទណ្ឌកម្ម​លើ​ក្រុមហ៊ុន​សហរដ្ឋ​អាមេរិក​ណា​ដែល​ទាក់​ទិន​នៅ​ក្នុងការ​លក់​អាវុធ​នោះ ​ទោះ​ជាយ៉ាង​ណាក៏ដោយ អ្នក​ធ្វើ​កិច្ច​សន្យា​ការពារ​ប្រទេស​សហរដ្ឋ​អាមេរិក ​បាន​ត្រូវគេ​ហាម​ឃាត់​មិន​ឲ្យ​លក់​អាវុធ​ទៅ​ឲ្យ​ចិន​ចាប់​តាំង​ពី​ការ​សម្លាប់​រង្គាល​នៅ​ទីលាន​ទានអានណេន​ក្នុង​ទីក្រុង​ប៉េកាំង​ឆ្នាំ​១៩៨៩​មក។

សហរដ្ឋ​អាមេរិក បាន​និយាយថា ​ការលក់​អាវុធ​របស់​ខ្លួន​ទៅ​ឲ្យ​កោះ​តៃវ៉ាន់​មាន​គោល​បំណង​ធ្វើ​ឲ្យ«ប្រសើរ​ឡើង​នូវសន្តិភាព​និង​ស្ថិរភាព»​នៅ​ក្នុង​តំបន់​អាស៊ី​ប៉ាស៊ីហ្វិកហើយ​រដ្ឋាភិបាល​ក្រុង​វ៉ាស៊ីនតោន ​នឹង​មិន​ផ្លាស់​ប្តូរ​គោល​នយោបាយ​ចិន​តែ​មួយ​នោះ​ទេ។

​ច្បាប់​តម្រូវ​ឲ្យ​សហរដ្ឋ​អាមេរិក​ជួយ​កោះ​តៃវ៉ាន់ក្នុង​វិស័យ​ការ​ពារ​ប្រទេស​របស់​ខ្លួន​ហើយ​ជារឿយ​ៗ​លក់​អាវុធ​ទៅ​ឲ្យ​កោះ​តៃវ៉ាន់ ​ដែល​បាន​ធ្វើ​ឲ្យ​មានការ​តវ៉ា​ប្រឆាំងជា​ប្រចាំមកពី​ចិនកុម្មុយនិស្ត៕

XS
SM
MD
LG