មន្រ្តីចិនបានចាប់ខ្លួនជនសង្ស័យម្នាក់នៅក្នុងការផ្ទុះដ៏តូចមួយដែលបានកើតមានឡើងនៅខាងក្រៅស្ថានទូតសហរដ្ឋអាមេរិកនៅក្នុងទីក្រុងប៉េកាំងកាលពីថ្ងៃព្រហស្បតិ៍ពេលថ្ងៃត្រង់។
ប៉ូលិសនិយាយថា បុរសអាយុ២៦ឆ្នាំម្នាក់ដែលមានឈ្មោះនាមត្រកូលថា Jiang មកពីតំបន់ Inner ម៉ុងហ្គោលីរបស់ចិនបានធ្វើឲ្យផ្ទុះគ្រឿងផ្ទុះនៅខាងក្រៅរបងព្រំដីនៅកាច់ជ្រុងភាគអាគ្នេយ៍បរិវេណស្ថានទូតអាមេរិក។ សេចក្តីថ្លែងការណ៍របស់ប៉ូលិសបានប្រាប់ឲ្យដឹងថា «ផាវ» បានផ្ទុះ។ ក៏ប៉ុន្តែ ស្ថានទូតសហរដ្ឋអាមេរិក បានពណ៌នាឧប ករណ៍នោះថា«ជាគ្រាប់បែក»។
ស្ថានទូតសហរដ្ឋអាមេរិកបានប្រាប់ឲ្យដឹងនៅក្នុងសេចក្តីថ្លែងថា «ក្រៅពីការផ្ទុះគ្រាប់បែក មិនមានមនុស្សរងរបួសហើយក៏មិនមានការខូចខាតទ្រព្យសម្បត្តិស្ថានទូតដែរ»។
ពួកអាជ្ញាធរសន្តិសុខមិនបានផ្តល់ពីគោលបំណងនៃការផ្ទុះនេះទេ។ មន្រ្តីរដ្ឋាភិបាលបានលើកទឹកចិត្តឲ្យពួកអ្នកកាសែតមើលឃើញថា ឧបទ្ទវហេតុនោះបណ្តាលមកពីជនដៃដល់ម្នាក់។
វីដេអូដែលបានចុះផ្សាយលើបណ្តាញព័ត៌មានសង្គមបង្ហាញពីផ្សែងយ៉ាងខ្លាំងចេញពីតំបន់ដែលមានទំហំជិតកន្លះគីឡូម៉ែត្រនៅព័ទ្ធជុំវិញស្ថានទូតសហរដ្ឋអាមេរិកនោះ។មនុស្សយ៉ាងហោចណាស់ក៏២នាក់ដែរដែលមានវត្តមានក្នុងអំឡុងនៃឧបទ្ទវហេតុនេះបាននិយាយថា ពួកគេមានអារម្មណ៍ថា មានការញ័ររង្គើក្នុងពេលនៃការផ្ទុះនោះ។
ទោះបី ឧបទ្ទវហេតុនេះទំនងជាតិចតួចក៏ដោយ ការផ្ទុះនេះបានទាក់ទាញការចាប់អារម្មណ៍ពីអន្តរជាតិពីព្រោះរដ្ឋាភិបាលក្រុងប៉េកាំងបានរក្សាសន្តិសុខយ៉ាងតឹងរ៉ឹងនៅក្នុងសង្កាត់ការទូតនៅក្នុងរដ្ឋធានីរបស់ចិន៕
