ការនាំចេញរបស់ចិន បានកើនឡើងយ៉ាងលឿនជាងការរំពឹងទុកក្នុងខែមិថុនា ដោយសារកំណើនតម្រូវការសកលបណ្តាលមកពីការបន្ធូរបន្ថយវិធានរឹតត្បិតទប់ទល់ការរាតត្បាតជំងឺកូវីដ១៩ និងការចាក់វ៉ាក់សាំងដែលបន្ថយការឆ្លង និងការពន្យារពេលសេវាកំពង់ផែពាសពេញពិភពលោក។ នេះបើតាមទីភ្នាក់ងារសារព័ត៌មាន Reuters។
ទិន្នន័យគយបានបង្ហាញនៅថ្ងៃអង្គារថា កំណើនការនាំចូលក៏លើសការរំពឹងទុកដែរ ទោះបីជាល្បឿនបានធ្លាក់ចុះកាលពីខែឧសភា ដោយសារតម្លៃកើនឡើងបណ្តាលមកពីតម្លៃវត្ថុធាតុដើមឡើងខ្ពស់។ ដោយសារតែកិច្ចខិតខំប្រឹងប្រែងរបស់រដ្ឋាភិបាលក្រុងប៉េកាំងក្នុងការទប់ស្កាត់ជំងឺរាតត្បាតមានសភាពតឹងតែងជាងដៃគូពាណិជ្ជកម្មរបស់ចិននោះ ប្រទេសចិនមានសន្ទុះសេដ្ឋកិច្ចងើបឡើងវិញរឹងមាំ ក្រោយពេលមានការធ្លាក់ចុះដោយសារជំងឺកូវីដ១៩ កាលពីប៉ុន្មានខែដំបូងនៃឆ្នាំ២០២០។
ការនាំចេញគិតជាប្រាក់ដុល្លារ បានកើនឡើង៣២,២ភាគរយនៅខែមិថុនាធៀបនឹងឆ្នាំមុនដែលមានកំណើន២៧,៩ ភាគរយកាលពីខែឧសភា។ ក្រុមអ្នកវិភាគស្ទង់មតិដោយ Reuters បានព្យាករថា មានកំណើន២៣,១ភាគរយ។
លោក Louis Kuijs ប្រធានផ្នែកសេដ្ឋកិច្ចអាស៊ីនៃក្រុមហ៊ុន Oxford Economics បានមានប្រសាសន៍ថា «ការនាំចេញឲ្យមានការភ្ញាក់ផ្អើលចំពោះការកើនឡើងនាំនៅក្នុងខែមិថុនាដោយកាត់បន្ថយផលប៉ះពាល់ពីការបិទកំពង់ផែ Shenzhenបណ្តោះអាសន្ន និងឧបសគ្គខ្សែសង្វាក់ផ្គត់ផ្គង់ដទៃទៀត»។
ពាណិជ្ជកម្មរបស់ប្រទេសចិនរងសម្ពាធខ្លះនៅក្នុងប៉ុន្មានខែថ្មីៗនេះ ជាពិសេសដោយសារតែកង្វះខាតឧបករណ៍អេឡិចត្រូនិកសកល កង្វះខាតផ្នែកភស្តុភារ វត្ថុធាតុដើម និងថ្លៃដឹកជញ្ជូនថ្លៃ។
ការបន្ធូរបន្ថយវិធានការទប់ទល់ជំងឺកូវីដ១៩ និងការចាក់វ៉ាក់សាំងទំនងជានាំឱ្យមានកំណើនយ៉ាងខ្លាំងនូវតម្រូវការទំនិញចិននៅទូទាំងពិភពលោក។
តួលេខនាំចេញដ៏ខ្លាំងកាលពីខែមុន បានបង្ហាញពីកំណើនការងាររោងចក្ររឹងមាំមួយចំនួននៅបរទេស។ សកម្មភាពរោងចក្រនៅសហរដ្ឋអាមេរិក បានកើនឡើងដល់កម្រិតខ្ពស់បំផុតនៅក្នុងខែមិថុនា ខណៈកំណើនសេដ្ឋកិច្ចនៅតំបន់ប្រើប្រាក់អឺរ៉ូបានកើនឡើងលឿនបំផុតក្នុងរយៈពេល១៥ឆ្នាំមកនេះ។
ទិន្នន័យក៏បានបង្ហាញផងដែរថា ការនាំចូលបានកើនឡើង ៣៦,៧% ពីមួយឆ្នាំទៅមួយឆ្នាំកាលពីខែមុន គឹលើសពីតួលេខព្យាករណ៍៣០.០% ប៉ុន្តែធ្លាក់ចុះពី៥១,១% ក្នុងខែឧសភាដែលជាអត្រាកំណើនខ្ពស់បំផុតក្នុងរយៈពេលមួយទសវត្សរ៍នេះ៕
