ក្រុមមន្ត្រីសហរដ្ឋអាមេរិកបានព្រមានថាចិននិងរុស្ស៊ីកំពុងធ្វើការពង្រីកឥទ្ធិពលរបស់ពួកគេនៅទូទាំងទ្វីបអាហ្វ្រិក ដោយសង្ឃឹមថានឹងយកឈ្នះសហរដ្ឋអាមេរិក ដែលជាផ្នែកមួយនៃកិច្ចខំប្រឹងប្រែងដោយប្រទេសទាំងពីរដើម្បីឆ្លើយតបនឹងតម្រូវការរបស់ពិភពលោក។
ជាច្រើនខែមកនេះ ក្រុមមន្ត្រីសន្តិសុខជាតិកំពូលបានពិភាក្សាអំពីការប្រកួតអំណាច ដោយហៅប្រទេសចិន និងរុស្ស៊ីថាជាប្រទេសដែលកំពុងធ្វើការប្រណាំងប្រជែងជាមួយសហរដ្ឋអាមេរិក។
ក្រុមមន្ត្រីនិយាយថា កិច្ចប្រឹងប្រែងរបស់រដ្ឋាភិបាលទីក្រុងប៉េកាំង និងរដ្ឋាភិបាលទីក្រុងមីស្គូកំពុងព្យាយាមបង្កើតយុទ្ធសាស្ត្រនានា ដើម្បីរារាំងមិនឲ្យសហរដ្ឋអាមេរិកអាចចូលទៅដល់តំបន់ដែលមានជម្លោះទាំងនៅក្នុងតំបន់និងក្នុងសកលលោក ទាំងនៅពេលដែលតំបន់ទាំងនោះកំពុងមានវិបត្តិ និងនៅពេលដែលទីផ្សារពាណិជ្ជកម្មមានសន្តិភាព។
ចំណែកនៅក្នុងទ្វីបអាហ្វ្រិកវិញ ប្រទេសទាំងពីរនេះកំពុងព្យាយាមបង្ហាញខ្លួនពួកគេថា ជាអ្នកដែលអាចទុកចិត្តបានក្រៅពីសហរដ្ឋអាមេរិក។
កាលពីថ្ងៃអង្គារ មេបញ្ជាការកងកម្លាំងសហរដ្ឋអាមេរិកនៅក្នុងតំបន់អាហ្វ្រិក បានប្រាប់សភាថា នេះជាពេលសំខាន់ក្នុងការធ្វើឲ្យប្រទេសនានានៅក្នុងទ្វីបអាហ្វ្រិកដឹងថាទីក្រុងវ៉ាស៊ីនតោនអាចទុកចិត្តបាន និងនៅតែជាដៃគូដ៏រឹងមាំរបស់ពួកគេ។
ឧត្តមសេនីយ៍ Thomas Waldhauser មេបញ្ជាការកងទ័ពអាមេរិកប្រចាំទ្វីបអាហ្វ្រិក បានប្រាប់គណៈកម្មាធិការសភាទទួលបន្ទុកកិច្ចការយោធាថា «វាមានសារៈសំខាន់ណាស់ដែលយើងត្រូវនៅទីនេះ បង្ហាញវត្តមានរបស់ពួកយើងនៅទីនេះ ដូច្នេះពលរដ្ឋអាហ្វ្រិកអាចមើលឃើញពីការប្តេជ្ញាចិត្តរបស់យើង»៕
