ទីភ្នាក់ងារព័ត៌មាន Reuters បានឲ្យដឹងថា ប្រទេសចិននិងប្រទេសរុស្ស៊ី មិនទាន់សម្តែងការអបអរសាទរភ្លាមទេនៅថ្ងៃចន្ទនេះ ដល់លោក Joe Biden ដែលត្រូវបានគេព្យាករណ៍ថា ជាប្រធានាធិបតីជាប់ឆ្នោតអាមេរិកថ្មីនោះ ដោយរដ្ឋាភិបាលទីក្រុងប៉េកាំងនិយាយថា ខ្លួននឹងអនុវត្តតាមនិតិវិធីធម្មតា ក្នុងការឆ្លើយតបនេះ ហើយវិមានក្រឹមឡាំងនៃប្រទេសរុស្ស៊ី បានគូសបញ្ជាក់ថា ប្រធានាធិបតីកំពុងកាន់តំណែងលោក Donald Trump កំពុងតស៊ូផ្លូវច្បាប់ជុំវិញរឿងបោះឆ្នោតនេះនៅឡើយ។
អ្នកនាំពាក្យក្រសួងការបរទេសចិនលោក Wang Wenbin បានថ្លែងក្នុងសន្និសីទសារព័ត៌មានប្រចាំថ្ងៃថា៖ «យើងកត់សម្គាល់ថា លោក Biden បានប្រកាសពីជ័យជម្នះរបស់លោក។ យើងយល់ថា លទ្ធផលបោះឆ្នោតប្រធានាធិបតីអាមេរិកនឹងត្រូវបានកំណត់ដោយនីតិវិធី និងច្បាប់របស់សហរដ្ឋអាមេរិក»។
កាលពីឆ្នាំ២០១៦ ប្រធានាធិបតីចិន លោក Xi Jinping បានផ្ញើសារអបអរសាទរទៅលោក Trump មួយថ្ងៃក្រោយពេលលោកឈ្នះឆ្នោតជាប្រធានាធិបតីអាមេរិកនៅពេលនោះ។
ដោយឡែកប្រធានាធិបតីរុស្ស៊ីលោក Vladimir Putin នៅរក្សាភាពស្ងៀមស្ងាត់នៅឡើយ ក្រោយលោក Biden ត្រូវបានគេព្យាករណ៍ថា បានទទួលជ័យជម្នះក្នុងការបោះឆ្នោតនោះ។ នៅមុនថ្ងៃបោះឆ្នោតអាមេរិកចូលមកដល់ លោក Putin ហាក់មិនបានឆ្លើយតបចំៗអំពីការគាំទ្របេក្ខជនណាមួយ ក្រោយលោក Biden បានប្រើវោហាសាស្រ្តរិះគន់ប្រទេសរុស្ស៊ី ប៉ុន្តែលោក Putin បានស្វាគមន៍លោក Biden ពីទស្សនៈស្តីពីការគ្រប់គ្រងអាវុធនុយក្លេអ៊ែរ។ លោក Putin ក៏បានការពារកូនប្រុសលោក Biden គឺលោក Hunter ដែលត្រូវបានរិះគន់ដោយលោក Trump នោះ។
អ្នកនាំពាក្យវិមានក្រឹមឡាំងលោក Dmitry Peskov បានប្រាប់អ្នកសារព័ត៌មានថា យើងគិតថា វាជារឿងត្រឹមត្រូវ ក្នុងការរង់ចាំដល់ការរាប់សន្លឹកឆ្នោតផ្លូវការត្រូវចប់សព្វគ្រប់។
ដោយឡែកប្រទេសសម្ព័ន្ធមិត្តដ៏ធំនិងជិតស្និទ្ធិរបស់អាមេរិកខ្លះ ក្នុងទ្វីបអឺរ៉ុប មជ្ឈិមបូព៌ា និងទ្វីបអាស៊ី បានរួសរាន់ក្នុងការផ្ញើសារអបអរដល់លោក Biden កាលពីចុងសប្តាហ៍នេះ បើទោះបីលោក Trump នៅមិនទាន់ប្រកាសទទួលចុះចាញ់ការបោះឆ្នោតនេះក្តី ក្នុងនោះក៏មានប្រទេសអ៊ីស្រាអែលនិងអារ៉ាប៊ីសាអ៊ូឌីតដែលជាសម្ព័ន្ធមិត្តលោក Trump។
អធិការបតីអាល្លឺម៉ង់លោកស្រី Angela Merkel នៅថ្ងៃចន្ទនេះ បានអំពាវនាវឲ្យសហភាពអឺរ៉ុប និងសហរដ្ឋអមេរិក ធ្វើការរួមគ្នា ដោយចាត់ទុកលោក Biden ថា ជាមេដឹកនាំដែលមានបទពិសោធន៍ខ្ពស់ ដែលបានស្គាល់ប្រទេសអាល្លឺម៉ង់ និងទ្វីបអឺរ៉ុបយ៉ាងច្បាស់ និងមានផលប្រយោជន៍ និងគុណតម្លៃរួមជាមួយប្រទេសសម្ព័ន្ធមិត្តអង្គការអូតង់ផងដែរ៕
