អតីតប្រធានាធិបតីសហរដ្ឋអាមេរិកខាងគណបក្សសាធារណរដ្ឋលោក George W. Bush កាលពីថ្ងៃអាទិត្យ បានអបអរសាទរលោក Joe Biden ដែលត្រូវបានព្យាករណ៍ថាជាអ្នកឈ្នះការបោះឆ្នោតប្រធានាធិបតីសហរដ្ឋអាមេរិកកាលពីសប្តាហ៍មុន ដោយបាននិយាយថា លោកប្រធានាធិបតីជាប់ឆ្នោតខាងគណបក្សប្រជាធិបតេយ្យ «ទទួលបានឱកាសដើម្បីដឹកនាំនិងបង្រួបបង្រួមប្រទេសរបស់យើង»។
លោក Bush ដែលបានធ្វើជាប្រធានាធិបតីពីឆ្នាំ ២០០១ ដល់ដើមឆ្នាំ ២០០៩ បានមានប្រសាសន៍ថា ទោះបីជាលោកមាន «ទស្សនៈនយោបាយខុសពី» លោក Biden ក៏ដោយ ក៏លោកជូនពរលោក Biden ឲ្យទទួលបាន «ជោគជ័យ» ហើយបានសន្យា «ជួយជ្រោមជ្រែងតាមដែលអាចធ្វើបាន»។
លោក Bush ក៏បានទូរស័ព្ទទៅអនុប្រធានាធិបតីជាប់ឆ្នោតអ្នកស្រី Kamala Harris ដើម្បីអបអរសាទរអ្នកស្រីផងដែរ។
លោក Bush បានបញ្ជាក់ថា លោកអរគុណលោក Biden ចំពោះ «សារស្នេហាជាតិ» ដែលលោក Biden បានថ្លែងកាលពីយប់ថ្ងៃសៅរ៍នៅក្នុងទីក្រុង Wilmington រដ្ឋ Delaware នៅក្នុងសុន្ទរកថាដែលលោក Biden បានប្រកាសអំពីជ័យជម្នះលើប្រធានាធិបតីកំពុងកាន់តំណែងលោក Donald Trump។
លោក Bush បានពណ៌នាថា ចំនួនសន្លឹកឆ្នោតជាង ៧០ លានសន្លឹកដែលលោក Trump បានទទួលដែលមានចំនួនប្រហែលជាង ៤ លានសន្លឹកតិចជាងលោក Biden គឺជា «ជោគជ័យខាងនយោបាយដ៏អស្ចារ្យមួយ»។
លោក Trump មិនបានសុខចិត្តចុះចាញ់លោក Biden ហើយបានដាក់ពាក្យបណ្ដឹងមួយចំនួន ដែលអះអាងពីភាពមិនប្រក្រតីនានា ដែលបានធ្វើឲ្យលោកចាញ់ឆ្នោត។
លោក Bush បាននិយាយថា លោក Trump «មានសិទ្ធិក្នុងការស្នើឲ្យមានការរាប់សន្លឹកឆ្នោតឡើងវិញ និងដាក់ពាក្យបណ្ដឹង ហើយបញ្ហាមិនទាន់ដោះស្រាយណាមួយនឹងត្រូវបានដោះស្រាយដោយត្រឹមត្រូវ»។
លោកបានបន្ថែមថា៖ «ប្រជាពលរដ្ឋអាមេរិកាំងអាចមានទំនុកចិត្តថា ការបោះឆ្នោតនេះមានយុត្តិធម៌ សុចរិតភាពនៃការបោះឆ្នោតនឹងត្រូវបានគេគោរព ហើយលទ្ធផលបោះឆ្នោតគឺមានភាពច្បាស់លាស់»៕