អ្នកការទូតកំពូលរបស់រដ្ឋបាលលោក Biden ប្រចាំប្រទេសចិន កាលពីថ្ងៃពុធ បានព្យាករណ៍ពីការកើនឡើងនៃវិស័យទេសចរណ៍ ជើងយន្តហោះពាណិជ្ជកម្ម និងទំនាក់ទំនងរវាងប្រជាជននិងប្រជាជននៃប្រទេសដែលមានសេដ្ឋកិច្ចធំបំផុតទាំងពីរនេះ ប៉ុន្តែបាននិយាយថា កិច្ចពិភាក្សាដើម្បីបង្កើតក្រុមការងារស្តីពីវិបត្តិថ្នាំញៀន fentanyl បានជាប់គាំង។
ថ្លែងសុន្ទរកថាតាមគេហទំព័ររបស់គណៈកម្មាធិការជាតិស្តីពីទំនាក់ទំនងសហរដ្ឋអាមេរិក-ចិនឯកអគ្គរដ្ឋទូត លោក Nicholas Burns បានធ្វើអត្ថាធិប្បាយដូច្នេះតែប៉ុន្មានសប្តាហ៍ប៉ុណ្ណោះ មុនពេលរដ្ឋមន្ត្រីការបរទេសចិនលោក Wang Yi មកដល់សហរដ្ឋអាមេរិកដើម្បីចូលរួមកិច្ចប្រជុំជាមួយមន្ត្រីរដ្ឋបាលអាមេរិកស្តីពីពាណិជ្ជកម្មទ្វេភាគី បញ្ហាថ្នាំញៀន fentanyl និងប្រធានបទផ្សេងទៀតដែលរំពឹងថា នឹងរៀបចំកិច្ចប្រជុំកំពូលនាពេលអនាគត។
ព្រឹត្តិការណ៍កាលពីថ្ងៃពុធដែលធ្វើឡើងនៅទីក្រុងប៉េកាំងបានកើតមានឡើង នៅពេលដែលការធ្វើដំណើររវាងប្រទេសទាំងពីរកំពុងកើនឡើង។
លោក Burns ក៏បានប្រាប់ក្រុមនោះថា រដ្ឋបាល លោក Biden កំពុង «ប្រឹងប្រែង» ដើម្បីពង្រីកចំនួនជើងយន្តហោះត្រង់រវាងសហរដ្ឋអាមេរិក និងចិន ដែលមានជិត ៣៤០ ជើងក្នុងមួយសប្តាហ៍ មុនពេលជំងឺកូវីដរាតត្បាត។
លោក Burns បាននិយាយថា លោករំពឹងថានឹងមានការកើនឡើងខាងវិស័យទេសចរណ៍ «ដោយយឺតៗ ប៉ុន្តែប្រាកដប្រជា» ដោយសាររដ្ឋាភិបាលទាំងពីរខិតខំជំរុញ។
ខណៈរដ្ឋាភិបាលអាមេរិកមិនគាំទ្រ «ការផ្តាច់ទំនាក់ទំនង» សេដ្ឋកិច្ចជាមួយប្រទេសចិន ដែលមានការកាត់ផ្តាច់បន្តិចម្តងៗនៃទំនាក់ទំនងពាណិជ្ជកម្ម និងហិរញ្ញវត្ថុនោះ លោក Burns បាននិយាយថា៖ «ទំនាក់ទំនងរវាងប្រជាជននិងប្រជាជនត្រូវបានផ្តាច់» នៅកម្រិតផ្លូវការ និងក្រៅផ្លូវការកាលពីឆ្នាំមុន៕
