រដ្ឋាភិបាលក្រុងប៉េកាំងបានរិះគន់អាជ្ញាធរសហរដ្ឋអាមេរិកកាលពីថ្ងៃសៅរ៍ ទី២៤ ខែមិថុនា ចំពោះការចោទប្រកាន់ក្រុមហ៊ុនចិនចំនួន ៤ និងមនុស្ស ៨ នាក់ពីការជួញ ដូរសារធាតុគីមីដែលប្រើក្នុងការផលិតថ្នាំហ្វេតានីល(fentanyl) ដោយហៅការចាប់ខ្លួននេះថា«ការឃុំខ្លួនដោយបំពាន»។
ក្រសួងយុត្តិធម៌អាមេរិកកំពុងបង្កើនការបង្ក្រាបលើអាភៀនសំយោគដែលបណ្តាលឱ្យមានការស្លាប់មនុស្សរាប់សែននាក់នៅសហរដ្ឋអាមេរិកដោយសារការប្រើថ្នាំជ្រុលក្នុងរយៈពេលមួយទសវត្សរ៍កន្លងមកនេះ។
ចំណាត់ការនាពេលថ្មីៗបំផុតនេះគឺការចោទប្រកាន់ជាលើកដំបូងដោយរដ្ឋាភិបាលក្រុងវ៉ាស៊ីនតោនលើក្រុមហ៊ុនចិនចំពោះការជួញដូរសារធាតុគីមីហ្វេតានីលចូលទៅក្នុងសហរដ្ឋអាមេរិក ជាជាងចាត់វិធានការលើប្រទេសម៉ិកស៊ិកដែលជាប្រភពដើមនៃសារធាតុហ្វេតានីលភាគច្រើនដែលត្រូវបានរកឃើញនៅសហរដ្ឋអាមេរិក។
មនុស្ស២នាក់ក្នុងចំណោមមនុស្ស៨នាក់ត្រូវបានចាប់ខ្លួននៅទីក្រុង Honolulu រដ្ឋ Hawaii។
ក្រសួងការបរទេសចិនបានថ្លែងក្នុងសេចក្តីថ្លែងការណ៍មួយថា«នេះគឺជាឧទាហរណ៍ទូទៅមួយនៃការឃុំខ្លួនដោយបំពាននិងការដាក់ទណ្ឌកម្មដោយឯកតោភាគី»។
សេចក្តីថ្លែងការណ៍នេះបន្ថែមថា៖«វាខុសច្បាប់ទាំងស្រុងនិងប៉ះពាល់ធ្ងន់ធ្ងរដល់សិទ្ធិមនុស្សជាមូលដ្ឋានរបស់ពលរដ្ឋចិននិងក្រុមហ៊ុនចិន។ ចិនសូមថ្កោលទោសយ៉ាងខ្លាំងចំពោះទង្វើនេះ»។
ក្រុមហ៊ុនទាំង៤រួមមានក្រុមហ៊ុន Hubei Amarvel Biotech ក្រុមហ៊ុន Anhui Rencheng Technology ក្រុមហ៊ុន Anhui Moker New Material Technology និងក្រុមហ៊ុន Hefei GSK Trade។
ពួកគេត្រូវបានចោទប្រកាន់ក្នុងករណី៣ផ្សេងគ្នាដែលបានប្តឹងនៅតុលាការសហព័ន្ធក្នុងទីក្រុងញូវយ៉ក។
ក្នុងចំណោមមនុស្ស ៨ នាក់ដែលត្រូវបានចោទប្រកាន់ មាននាយកប្រតិបត្តិនិងបុគ្គ លិកនៃក្រុមហ៊ុនទាំង ៤។
មនុស្ស២នាក់ដែលត្រូវបានចាប់ខ្លួនគឺជាបុគ្គលិកក្រុមហ៊ុន Hubei Amarvel Biotech និងត្រូវបានឃុំខ្លួននៅរដ្ឋ Hawaii បន្ទាប់ពីត្រូវបានបណ្តេញចេញពីប្រទេសហ្វីជីកាល ពីថ្ងៃទី៨ ខែមិថុនាកន្លងទៅ។
ការឃុំខ្លួនរបស់ពួកគេបានកើតឡើងតែប៉ុន្មានថ្ងៃបន្ទាប់ពីរដ្ឋមន្ត្រីការបរទេសសហរដ្ឋអាមេរិក លោក Antony Blinken បានធ្វើទស្សនកិច្ចនៅរដ្ឋធានីនៃប្រទេសចិនដែលនៅទីនោះលោកបានជួបជាមួយលោកប្រធានាធិបតី Xi Jinping។
សារធាតុហ្វេតានីលបានក្លាយជាបញ្ហាសំខាន់នៅក្នុងទំនាក់ទំនងដ៏តានតឹងរវាងរដ្ឋាភិ បាលក្រុងវ៉ាស៊ីនតោន និងរដ្ឋាភិបាលក្រុងប៉េកាំង ដោយលោក Blinken បានលើកឡើងចំណុចនេះក្នុងអំឡុងពេលដំណើរទស្សនកិច្ចរបស់លោក។
ក្រសួងការបរទេសចិនបានថ្លែងថាការចោទប្រកាន់នេះ«ធ្វើឱ្យប៉ះពាល់យ៉ាងធ្ងន់ធ្ងរដល់មូលដ្ឋានគ្រឹះនៃកិច្ចសហប្រតិបត្តិការប្រឆាំងគ្រឿងញៀនរវាងចិន-សហរដ្ឋអាមេ រិក»។
ថ្នាំហ្វេតានីលគឺជាថ្នាំអាភៀនសំយោគដែលមានឥទ្ធិពលជាងថ្នាំហេរ៉ូអ៊ីន ៥០ដង ហើយងាយស្រួលផលិតនិងថោកជាង។
រដ្ឋាភិបាលក្រុងប៉េកាំងក្នុងឆ្នាំ២០១៩បានដាក់សារធាតុទាក់ទិននឹងថ្នាំហ្វេតានីលទាំងអស់ក្នុងបញ្ជីគ្រឿងញៀនដោយត្រូវគ្រប់គ្រងការផលិតនិងការលក់សារធាតុទាំងនោះ។
ទោះបីជាម៉ិកស៊ិកជាប្រភពសំខាន់នៃថ្នាំហ្វេតានីលដែលត្រូវបានលក់នៅសហរដ្ឋអា មេរិកក៏ដោយ រដ្ឋាភិបាលក្រុងវ៉ាស៊ីនតោនបានផ្តោតការយកចិត្តទុកដាក់កាន់តែខ្លាំងឡើងលើអ្នកផ្គត់ផ្គង់ធាតុផ្សំមានមូលដ្ឋាននៅប្រទេសចិនដែលត្រូវបញ្ជូនទៅម៉ិក ស៊ិក៕
ប្រែសម្រួលដោយលោក ជឹង ប៉ូជីន
ប៉េកាំង —
