ប្រធានាធិបតីអាមេរិកលោក Joe Biden បាននិយាយកាលពីថ្ងៃពុធថា លោកនឹងបន្ត «ប្រឈមជាមួយចិន» ដើម្បីទប់ស្កាត់លំហូរថ្នាំញៀនដ៏គ្រោះថ្នាក់ដែលត្រូវបានរត់ពន្ធចូលក្នុងសហរដ្ឋអាមេរិកកាត់តាមប្រទេសម៉ិកស៊ិក។
ក្នុងការបង្ហាញខ្លួនតាមកម្មវិធីវេទិការបស់បណ្តាញទូរទស្សន៍ CNN ពីទីក្រុង Cincinnati រដ្ឋ Ohio លោក Biden បានមានប្រសាសន៍ថារដ្ឋបាលរបស់លោក «កំពុងដោះស្រាយបញ្ហាថ្នាំញៀនទាំងមូល» ដោយបង្កើនចំនួនបុគ្គលិកយ៉ាងច្រើននៅក្នុងក្រសួងយុត្តិធម៌ធ្វើការអំពីបញ្ហានេះ។
ថ្នាំញៀន Fentanyl ត្រូវបានគេចាត់ទុកថាមានកម្លាំងខ្លាំងជាងថ្នាំញៀនហេរ៉ូអ៊ីនពី៥០ដងទៅ១០០ដង។ វិបត្តិសុខភាពនៅក្នុងប្រទេសអាមេរិកបណ្តាលមកពីប្រភេទថ្នាំញៀនសំយោគជាពិសេស Fentanyl នោះជារឿងដែលត្រូវបានលើកឡើងដោយលោកអតីតប្រធានាធិបតី Donald Trump។
លោក Donald Trump បានរិះគន់ប្រទេសចិនម្តងហើយម្តងទៀតចំពោះចិនជាប្រទេសនាំចេញថ្នាំញៀន Fentanyl ច្រើនជាងគេឬ សារធាតុគីមីរបស់ចិនបានដឹកទៅកាន់ប្រទេសម៉ិចស៊ិកទីដែលក្រុមជួញដូរថ្នាំញៀនអន្តរជាតិរត់ពន្ធចូលក្នុងសហរដ្ឋអាមេរិក សម្រាប់ការមិនបង្ក្រាបការជួញដូរថ្នាំញៀន។
អនុស្សរណៈមួយដែលបានចេញផ្សាយមុនដំណើរទស្សនកិច្ចលើកទី៣របស់លោក Biden ទៅកាន់រដ្ឋ Ohio ក្នុងអំឡុងពេលលោកកាន់តំណែងរយៈពេល៦ខែនោះនិយាយអំពីការព្រួយកង្វល់សំខាន់ៗនៅក្នុងរដ្ឋនោះតាំងពីការជួសជុលស្ពាននៅតាមផ្លូវដល់ការទប់ស្កាត់កុំឲ្យកូនក្មេងធាត់ហួសហេតុ។អនុស្សរណៈនោះមិនបាននិយាយអំពីវិបត្តិថ្នាំញៀនទេ ថ្វីបើរដ្ឋ Ohio មានអត្រាស្លាប់ច្រើនដោយសារការប្រើថ្នាំញៀនហួសកម្រិតដែលជាបុព្វហេតុគ្រោះថ្នាក់ដល់ស្លាប់នៅក្នុងរដ្ឋនេះជាងមួយទសវត្សរ៍មកហើយ។
នៅពេល VOA សួរនៅលើយន្តហោះប្រធានាធិបតី Air Force One កាលពីថ្ងៃពុធ អ្នកស្រី Jen Psaki លេខាព័ត៌មានសេតវិមានបានឆ្លើយថា«ប្រាកដណាស់បញ្ហានេះជាអាទិភាពកំពូល ហើយមិនចាំបាច់ឆ្ងល់ទេថា វាជាបញ្ហាមួយដែលបានប៉ះពាល់ដល់ពលរដ្ឋនៅទូទាំងរដ្ឋ Ohio»៕
