ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ចិន​ថា​ ជំរំ​កែប្រែ​ដាក់​ពួក​កាន់​សាសនា​ឥស្លាម​អាច​បាត់​បន្តិចម្តងៗ​នៅ​ថ្ងៃ​ណា​មួយ


រូបឯកសារ៖ ជនជាតិ​វីហ្គ័រ​កាន់​សាសនា​ឥស្លាម​ដើរកាត់យោធា។ 

អង្គការ​សហប្រជាជាតិ​បាន​ប៉ាន់ស្មាន​ថា​ ជនជាតិ​វីហ្គ័រ​កាន់​សាសនា​ឥស្លាម​ប្រហែល​មួយលាននាក់​ និង​ក្រុមជនជាតិ​ភាគតិច​កាន់​សាសនា​ឥស្លាម​ផ្សេងទៀត​កំពុង​ជាប់​ឃុំឃាំង​នៅក្នុង​ជំរំ​ទាំង​នេះ។

ក្រុមអាជ្ញាធរ​ចិន​កាល​ពី​ថ្ងៃអង្គារ​បាន​ប្រកាស​ថា​ ជំរំ​ឃុំឃាំង​នៅ​តំបន់​ភាគខាងលិច​នៃ​ខេត្តស៊ីនជាំង​នឹង​ត្រូវ​លុបបំបាត់​បន្តិច​ម្តងៗ​ ប្រសិន​បើ​គេ​លែង​ត្រូវ​ការ​វា​ត​ទៅ​ទៀត។

ប្រទេសចិន​កំពុង​ប្រឈម​នឹង​ការ​រិះគន់​ពី​សកលលោក​ទាក់ទិន​នឹង​ជំរំ​ឃុំឃាំង​ ដែល​ក្រុម​មន្រ្តី​នៅ​តែ​អះអាង​ថា​ជា​មជ្ឈមណ្ឌល​បណ្តុះបណ្តាល​វិជា្ជជីវៈ។

លោក Shohrat Zakir អភិបាល​ខេត្តស៊ីនជាំង​បាន​និយាយ​ថា៖ «ប្រទេស​មួយ​ចំនួន​និយាយ​ថា​ ខេត្ត​ស៊ីនជាំង​មាន​ជំរំ​ប្រមូល​ផ្តុំ​និង​ជំរំ​កែប្រែ​ឡើងវិញ។ សេចក្តី​ថ្លែងការណ៍​ទាំងនេះ​គឺ​ជា​ការ​កុហក​បោកប្រាស់​ និង​មិន​ទំនង​ទាល់​តែ​សោះ»។

អង្គការ​សហប្រជាជាតិ​បាន​ប៉ាន់ស្មាន​ថា​ជនជាតិ​វីហ្គ័រ​កាន់​សាសនា​ឥស្លាម​ប្រហែល​មួយលាននាក់​ និង​ក្រុមជនជាតិ​ភាគតិច​កាន់​សាសនា​ឥស្លាម​ផ្សេងទៀត​កំពុង​ជាប់​ឃុំឃាំង​នៅក្នុង​ជំរំ​ទាំង​នេះ។ អតីតអ្នក​ជាប់​ឃុំ​បាន​ពណ៌នា​អំពី​ការ​ធ្វើ​ទារុណកម្ម​ធ្ងន់ធ្ងរ​ រួម​ទាំង​ទារុណកម្ម​ផ្លូវចិត្ត​ និង​ទារុណកម្ម​នយោបាយ។

រដ្ឋាភិបាល​ក្រុងប៉េកាំង​បាន​អះអាង​ថា​ជំរំ​ទាំងនោះ​គឺ​ជា​ផ្នែក​មួយ​នៃ​យុទ្ធនាការ​ទូទៅ​មួយ​ ដើម្បី​កាត់​បន្ថយ​ការ​គំរាមកំហែង​របស់​ពួកឥស្លាម​ជ្រុលនិយម។

លោក Zakir​ បាន​និយាយ​ថា៖ «ចំនួន​អ្នក​ជាប់ឃុំ​នៅក្នុង​មជ្ឈមណ្ឌល​ទាំងនេះ​គួរ​តែ​តិច​ទៅៗ​ ហើយ​ប្រសិន​ជា​ថ្ងៃ​ណា​មួយ​អាជ្ញាធរ​លែង​ត្រូវការ​ជំរំ​ទាំងនេះ​ នោះ​វា​នឹង​ត្រូវ​បាត់​ទៅ​បន្តិច​ម្តងៗ»។

លោក Zakir បាន​បន្ទរ​តាម​ការអះអាង​របស់​រដ្ឋាភិបាល​ក្រុងប៉េកាំង​នៅ​ឯ​កិច្ចប្រជុំ​ថា​គ្មាន​អំពើ​ហឹង្សា​កើតឡើង​នៅក្នុង​ខេត្តស៊ីនជាំង​ទេ​ រយៈពេល​ជាង​ពីរឆ្នាំ​មក​នេះ។ ក៏​ប៉ុន្តែ​សហរដ្ឋអាមេរិក​បាន​ប្រកាស​ថា ​ស្ថានភាព​ក្នុង​ខេត្តស៊ីនជាំង​ពិត​ជា​មិន​អាច​ទទួល​យក​បាន​ទេ៕

XS
SM
MD
LG