ចិនសង្ឃឹមថា ជំនួបនៅពេលខាងមុខរវាងប្រធានាធិបតីសហរដ្ឋអាមេរិកលោក ដូណាល់ ត្រាំ និងប្រធានាធិបតីចិនលោក ស៊ី ជីនពីង នឹងជួយស្ថាបនាការទុកចិត្តនិងបន្ធូរបន្ថយសង្គ្រាមពាណិជ្ជកម្មរវាងប្រទេសដែលមានសេដ្ឋកិច្ចធំបង្អស់ទាំងពីររបស់ពិភពលោកនេះ។
មេដឹកនាំទាំងពីរមានគម្រោងជួបគ្នានៅចុងសប្តាហ៍នេះនៅឯជំនួបកំពូលរបស់ប្រទេស២០ ដែលមានសេដ្ឋកិច្ចជឿនលឿនរបស់ពិភពលោក ឬG-20 ក្នុងទីក្រុងអូសាកានៃប្រទេសជប៉ុន។ នេះជាជំនួបមួយទល់នឹងមួយលើកដំបូងរបស់លោកទាំងពីរចាប់តាំងពីការចរចាពាណិជ្ជកម្មបានបរាជ័យនៅខែឧសភាមក។
លោក Geng Shuang អ្នកនាំពាក្យក្រសួងការបរទេសចិន បានប្រាប់ក្រុមអ្នកយកព័ត៌មានកាលពីថ្ងៃអង្គារក្នុងទីក្រុងប៉េកាំងថា សង្ឃឹមថា ជំនួបនេះនឹងធ្វើឲ្យប្រសើរឡើងនូវការទុកចិត្តគ្នា ហើយនឹងដោះស្រាយបញ្ហាសំខាន់ៗខ្លះដែលយើងកំពុងប្រឈមនៅពេលឥឡូវនេះ។
ក្នុងអំឡុងនៃការសន្ទនាតាមទូរសព្ទកាលពីថ្ងៃចន្ទរវាងឧបនាយករដ្ឋមន្រ្តីចិនលោក Liu He និងតំណាងពាណិជ្ជកម្មអាមេរិកលោក Robert Lighthizer ពួកលោកបានផ្លាស់ប្តូរទស្សនៈស្តីពីពាណិជ្ជកម្មហើយបានព្រមព្រៀងរក្សាការទាក់ទងគ្នា។ នេះបើតាមសេចក្តីរាយការណ៍របស់ក្រសួងពាណិជ្ជកម្មចិន។
ទីភ្នាក់ងារព័ត៌មានស៊ីនហួផ្លូវការនៃប្រទេសចិនបានរាយការណ៍ថា ការសន្ទនាតាមទូរសព្ទរបស់មេដឹកនាំទាំងពីរបានស្នើឡើងដោយក្រុមមន្រ្តីសហរដ្ឋអាមេរិក។
មន្រ្តីជាន់ខ្ពស់អាមេរិកម្នាក់បាននិយាយកាលពីថ្ងៃចន្ទថា ជំនួបនេះនឹងផ្តល់ឲ្យប្រធានាធិបតីត្រាំនូវឱកាសដើម្បីដឹងពីជំហររបស់ចិនស្តីពីសង្គ្រាមពាណិជ្ជកម្មដែលរាលដាលកាន់តែធំឡើង៕
