ថាមពលស្អាតជាការផ្តោតការយកចិត្តទុកដាក់ថ្មីរបស់ប្រទេសចិនលើគម្រោងក្រវ៉ាត់ផ្លូវពាណិជ្ជកម្មហៅ BRI ដែលមានគោលដៅស្ថាបនាគម្រោងស្តារហេដ្ឋារចនាសម្ព័ន្ធមួយចំនួនពីអាស៊ីទៅអឺរ៉ុប។
ចំណាត់ការថ្មីនេះដែលគិតច្រើនជាងមុនអំពីបរិស្ថានបាននាំឱ្យមានការយកចិត្តទុកដាក់ពីប្រទេសប្រមាណ៧០ដែលនឹងទទួលបានហេដ្ឋារចនាសម្ព័ន្ធថ្មីពីប្រទេសចិនដែលមានសេដ្ឋកិច្ចធំក្នុងអាស៊ីជាថ្នូរនឹងការពង្រីកពាណិជ្ជកម្ម។
ចំណាត់ការថ្មីនៃកិច្ចខិតខំប្រឹងប្រែង៨ឆ្នាំរបស់ចិនមានទឹកប្រាក់១,២លានលានដុល្លារមានឡើងនៅក្រោយមានបញ្ហាក្នុងផ្នែកខ្លះនៃតំបន់អឺរ៉ុបអាស៊ីដែលកំពុងអនុវត្តគម្រោងទាំងនោះ។
នៅពេលនេះប្រទេសចិនដែលយកចិត្តទុកដាក់លើបញ្ហាអាកាសកខ្វក់ក្នុងប្រទេសកំពុងរៀបចំBRIថ្មីដែលនឹងផ្តោតការយកចិត្តទុកដាក់់លើគម្រោងមិនមានផលប៉ះពាល់ដល់បរិស្ថានជាជាងលើរោងចក្រអគ្គិសនីដើរដោយធ្យូងថ្មដែលនាំឱ្យអាកាសកខ្វក់។គម្រោងក្រវ៉ាត់ផ្លូវពាណិជ្ជកម្មថ្មីនេះនឹងនៅតែធ្វើឱ្យចិនសម្រេចគោលដៅក្នុងការពង្រីកផ្លូវពាណិជ្ជកម្មក្នុងអឺរ៉ុបអាស៊ីតាមរយៈកំពង់ផែផ្លូវរទេះភ្លើងនិងរោងចក្រអគ្គិសនីថ្មីៗ។
គម្រោងក្រវ៉ាត់ផ្លូវពាណិជ្ជកម្មទីពីរត្រូវបានប្រកាសក្នុងប្រទេសចិនកាលពីថ្ងៃទី១៨ ខែតុលាត្រូវចំពេលជាមួយសន្និសីទស្តីពីការប្រែប្រួលអាកាសធាតុអង្គការសហប្រជាជាតិឆ្នាំ២០២១ ហៅ COP26ដែលប្រព្រឹត្តទៅពីថ្ងៃអាទិត្យទី៣១ខែតុលារហូតដល់ថ្ងៃទី១២ខែវិច្ឆិកាក្នុងក្រុង Glasgowប្រទេសស្កុតឡែន។ ចិនអាចប្រើវេទិកានេះដើម្បីបង្ហាញសេចក្តីលម្អិតនៃផែនការរបស់ខ្លួន។
លោក Rajiv Biswas ជាប្រធានអ្នកសេដ្ឋកិច្ចសម្រាប់តំបន់អាស៊ី-ប៉ាស៊ីហ្វិកនៃក្រុមហ៊ុនស្រាវជ្រាវអំពីទីផ្សារIHS Markit។ លោកបាននិយាយថា៖ «ការប្តូរគោលនយោបាយចិនទៅកាន់BRI មួយដែលគិតពីបរិស្ថានជាងមុនឆ្លុះបញ្ចាំងឱ្យឃើញការប្តេជ្ញារបស់ចិនឱ្យសម្រចការធ្វើកុំឱ្យមានការសាយភាយឧស្ម័នកាបូនមុនឆ្នាំ២០៦០និងការប្តេជ្ញារបស់់ប្រទេសនេះក្នុងការអនុវត្តអន្តរកាលបរិដ្ឋានស្អាតនៅក្នុងសេដ្ឋកិច្ចក្នុងប្រទេសចិន»។
លោក Rajiv Biswas បានថ្លែងទៀតថា៖ «ម្យ៉ាងទៀតការប្តូរគោលនយោបាយចិន...ក៏ឆ្លុះបញ្ចាំងឱ្យឃើញអាទិភាពគោលនយោបាយចំពោះថាមពលកកើតជាថ្មីនិងគោលនយោបាយអភិវឌ្ឍន៍ប្រកបដោយចីរភាពដោយប្រទេសដៃគូភាគច្រើនក្នុងគម្រោងBRIរបស់ប្រទេសចិន»។
គម្រោងក្រវ៉ាត់ផ្លូវពាណិជ្ជកម្មចិនបានជួយលើកកម្ពស់សេដ្ឋកិច្ចនៃប្រទេសកំពុងអភិវឌ្ឍចាប់តាំងពីប្រទេសកាហ្សាក់ស្ថានទៅដល់ប្រទេសទំនើបជាងនេះដូចជាប្រទេសព័រទុយហ្គាល់ជាដើម។ BRIក៏បានធ្វើឱ្យសហរដ្ឋអាមេរិកជាគូប្រជែងរបស់ចិនដែលគ្មានកម្មវិធីដូចនេះថយកម្លាំងចិត្តដែរ។
ប្រវត្តិនៃការផ្តោតការយកចិត្តទុកដាក់លើផូស៊ីលឥន្ធនៈ
ក្រុមប្រឹក្សាទំនាក់ទំនងការបរទេសដែលជាក្រុមស្រាវជ្រាវអាមេរិកាំងបាននិយាយនៅក្នុងការសិក្សាស្រាវជ្រាវមួយកាលពីខែមីនាឆ្នាំ២០២១ថាប្រទេសចិនមានប្រវត្តិក្នុងការដាក់ទុនច្រើនពាន់លានដុល្លារក្នុងគម្រោងផូស៊ីលឥន្ធនៈក្នុងប្រទេសឯទៀតៗ។
ក្រុមប្រឹក្សាទំនាក់ទំនងទំនងការបរទេសបានថ្លែងថាពីឆ្នាំ២០១៤ដល់២០១៧ប្រាក់កម្ចីខាងថាមពលប្រមាណ៩០%ដោយធនាគារចិនធំៗឱ្យពួកប្រទេសក្នុងគម្រោង BRI គឺសម្រាប់គម្រោងផូស៊ីលឥន្ធនៈ។ ចិនក៏«មានទាក់ទិន»ជាមួយរោងចក្រអគ្គិសនីប្រើធ្យូងថ្មចំនួន២៤០នៅឆ្នាំ២០១៦។ ការសិក្សាស្រាវជ្រាវនេះបានបន្ថែមថាប្រាក់កម្ចីខាងថាមពល៤០%គឺសម្រាប់គម្រោងការធ្យូងថ្មដែរ។ ក្រុមសិក្សាស្រាវជ្រាវនេះពោលថាការវិនិយោគទាំងនោះ«ធ្វើឱ្យការសន្យាអំពីការបន្ធូរបន្ថយការប្រែប្រួលអាកាសធាតុមានការពិបាកជាងមុន»។
វិទ្យាស្ថានបរិស្ថានសាកលដែលជាមជ្ឈមណ្ឌលស្រាវជ្រាវមានមូលដ្ឋាននៅក្រុងប៉េកាំងនិយាយថាអាស៊ីខាងត្បូងនិងអាស៊ីអាគ្នេយ៍មានគម្រោងធំៗខាងប្រើធ្យូងថ្មគឺ៨០%នៃគម្រោងក្រវ៉ាត់ផ្លូវពាណិជ្ជកម្មនេះ៕
ប្រែសម្រួលដោយលោកឈឹមសុមេធ
