ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អ្នក​ជំនាញ​និយាយ​ថា​ ប្រ​ទេស​ចិន​​អាច​ប្រឈម​នឹង​​បញ្ហា​សេដ្ឋកិច្ច​​​ដ៏​ស្រអាប់


រូបឯកសារ៖ នាយករដ្ឋមន្ត្រី​ចិន លោក Li Keqiang ថ្លែង​សុន្ទរកថា​​នៅ​ក្នុង​សន្និសីទ​សារព័ត៌មាន​មួយ​តាម​អនឡាញ នៅ​ទីក្រុង​ប៉េកាំង ប្រទេស​ចិន ថ្ងៃទី ១១ ខែមីនា ឆ្នាំ២០២១។ (REUTERS/Martin Pollard)

នាយក​រដ្ឋមន្ត្រីប្រទេស​ចិន​លោក Li Keqiang បានលើក​ឡើង​ថា ទី​ផ្សារ​ការងារបច្ចុប្បន្ន​របស់​ប្រទេស​ចិន​កំពុង​មាន​ភាព​ស្មុគស្មាញ និង​ជួប​ការលំបាកធ្ងន់ធ្ងរ​ខណៈពេល​ដែល​ប្រទេស​នេះ កំពុងអនុវត្ត​មិន​ងាករេ​នូវគោល​នយោបាយ​ដែល​គ្មានជំងឺ​កូវីដ១៩​នោះ ហើយ​ការបិទ​ខ្ទប់​សកម្ម​សង្គម​ ​បាន​ធ្វើឱ្យ​មាន​ធ្លាក់​ចុះ​ខាង​វិស័យ​សេដ្ឋកិច្ច​នៅ​ទូទាំង​ប្រទេស​ចិន​ទាំង​មូល។

សេដ្ឋវិទូ​ជាន់​ខ្ពស់នៃក្រុម​ហ៊ុន Caixin Insight Group លោក Wang Zhe បាន​និយាយ​ថា«​តម្រូវ​ការកំពុង​ស្ថិត​ក្នុង​ការ​រងសម្ពាធ តម្រូវការ​ក្រៅ​ប្រទេស​បានធ្លាក់ចុះ ការ​ចែក​ចាយ​ជួប​ការ​លំបាក​ សង្វាក់​ផ្គត់ផ្គង់មាន​ភាព​រអាក់រអួល​ ការ​ដឹកជញ្ជូន​ប្រើ​ពេល​ច្រើន​ជាង​មុន​ ការជាប់​គាំងខាង​ការ​ងារ​មាន​ការ​កើន​ឡើង អ្នក​ធ្វើ​ការ​ជួប​ការ​លំបាក​ក្នុង​ការ​វិលត្រឡប់​ទៅ​កន្លែង​ការងារ​របស់​គេ​វិញ​ ​អតិផលរណា​កំពុង​បន្ត​កើត​មាន​ឡើង ហើយ​ជំនឿចិត្ត​លើ​ទីផ្សារ​នៅ​តែ​ស្ថិត​នៅក្រោម​កម្រិត​មធ្យម​នៅ​ឡើយ។

នាយករដ្ឋមន្ត្រី​ចិនលោក Li Keqiang បាន​ថ្លែង​នៅ​ក្នុង​កិច្ចប្រជុំថ្នាក់ជាតិ​តាម​រយៈវីដេអូ​ស្តី​ពី​ស្ថិរភាព​ការងារ​កាល​ពី​ថ្ងៃ​សៅរ៍​កន្លង​ទៅ​នេះ​ថា «ការ​ធ្វើ​ឱ្យទីផ្សារ​មាន​លក្ខណៈ​ប្រកួត​ប្រជែង​ និងការ​រក្សា​បាន​នូ​វការងារនឹង​ជួយឱ្យ​យើង​ឈ្នះ​ក្នុង​ពេល​អនាគត។ នេះ​បើ​យោង​ទៅ​លើ​កាសែត China Daily ដែល​គ្រប់​គ្រង​ដោយ​រដ្ឋ​ចិន​នោះ។

លោក Li ដែល​កាន់​តំណែង​ទី២ក្នុង​គណបក្ស​កុម្មុយនីស្តចិន​ បាន​ជំរុញ​ឱ្យ​នាយកដ្ឋាន​រដ្ឋាភិបាល​គ្រប់តំបន់​ទាំង​អស់​អនុវត្តដោយ​ស្មារតី​ខ្ពស់​នូវ​សេចក្តីសម្រេច​ចិត្តនិង​ការចាត់​ចែង​របស់គណៈកម្មាធិការ​មជ្ឈិមបក្ស​ និងក្រុមប្រឹក្សារដ្ឋ​ ដើម្បី​ធានា​ថែរក្សា​ស្ថិរភាព​ការងារ​និង​សេដ្ឋ កិច្ច​របស់ចិន។

លោក​បន្ត​ទៀត​ថា «ការធ្វើ​ឱ្យ​មាន​ស្ថិរភាពការងារ​ជារឿង​សំខាន់​ដើម្បី​ទ្រទ្រង់​ដល់​ជីវភាព​ប្រជាពលរដ្ឋ​និង​ជាគន្លឹះ​គាំទ្រ​ដ៏​សំខាន់​មួយ​សម្រាប់​ដំណើរការ​សេដ្ឋកិច្ច​នៅ​ក្នុង​កម្រិត​ដ៏​សមស្រប​មួយ។ លោក​ក៏បាន​ផ្តល់​អនុសាសន៍ស្តី​ពី​វិធានការមួយ​ចំនួន​ ដល់រដ្ឋាភិបាល​ថ្នាក់​ខេត្ត​និងមូល​ដ្ឋានផង​ដែរ។

លោក Li ក៏​បាន​ស្នើ​ឱ្យសហគា្រស​ទាំងឡាយ​បន្ត​ការ​ផលិតរបស់​ខ្លួន​ ខណៈ​ប្រកាន់​ខ្ជាប់​នូវការ​គ្រប់គ្រង​ ដើម្បី​ទប់​ទល់ប្រឆាំងនឹង​ការ​ឆ្លង​ជំងឺរាតត្បាត​កូវីដ១៩​នោះ។

ការបិទខ្ទប់​សកម្មភាព​សង្គម​នៅ​ក្នុង​ទីក្រុង​ជាង២០របស់​ប្រទេស​ចិន​ដែល​ក្នុង​នោះ​ក៏​មាន​ទីក្រុង​សេដ្ឋកិច្ច​សៀងហៃ​ផង​ដែរ​ បាន​ធ្វើ​ឱ្យ​ពលរដ្ឋ​ចិនមួយ​ចំនួន​មាន​ការ​ខឹង​សម្បារ​និង​ធ្វើ​ឱ្យ​សេដ្ឋកិច្ច​មាន​ការ​ធ្លាក់ចុះ។ អគ្គនាយកអង្គការ​សុខភាពពិភពលោក Tedros Adhanom Ghebreyesus​ បាន​និយាយ​កាល​ពី​ថ្ងៃ​អង្គារ​កន្លង​ទៅ​ថា​យុទ្ធសាស្ត្រ​គ្មាន​ជំងឺកូវីដ១៩របស់​ប្រទេស​ចិន​ ​មិន​មាន​ប្រសិទ្ធភាព​នោះ​ឡើយ​ ហើយមួយ​ថ្ងៃ​បន្ទាប់​មក​ អ្នកនាំ​ពាក្យក្រសួង​ការបរទេស​ចិន​លោក Zhao Lijian បាន​ហៅ​ការ​លើក​ឡើង​របស់ប្រធាន​អង្គការ WHO ​រូប​នេះ​ ​ថា​ «​គ្មានការ​ទទួល​ខុសត្រូវ»៕

XS
SM
MD
LG