នៅថ្ងៃច័ន្ទនេះ ចិនបានច្រានចោលការជំទាស់តវ៉ារបស់វៀតណាម លើការហាមឃាត់ការនេសាទត្រីតាមរដូវរបស់រដ្ឋាភិបាលទីក្រុងប៉េកាំង ក្នុងសមុទ្រចិនខាងត្បូង ដែលកំពុងសង្កត់ពីជម្លោះរបស់ប្រទេសទាំង២ លើការកាន់កាប់ប្រជុំកោះនិងធនធានសមុទ្រនៅក្នុងតំបន់នោះ។
លោក Hong Lei អ្នកនាំពាក្យក្រសួងការបរទេសចិនបាននិយាយថា បម្រាមការនេសាទរដូវក្តៅ ជាព្រឹត្តការណ៍ប្រចាំឆ្នាំហើយថា ចិនបានបំពេញតួនាទីក្នុងការទទួលខុសត្រូវនិងកាតព្វកិច្ចអន្តរជាតិរបស់ខ្លួន ដើម្បីអភិរក្សពូជត្រី។ លោកហុងបានប្រាប់ក្រុមអ្នកយកព័ត៌មានថា «ជំហររបស់ចិនចំពោះសមុទ្រចិនខាងត្បូង គឺមិនផ្លាស់ប្តូរនិងមានភាពច្បាស់លាស់ណាស់»។
វៀតណាមបានចេញសេចក្តីថ្លែងការណ៍មួយកាលពីយប់ថ្ងៃសៅរ៍សប្តាហ៍មុន ដោយបានរិះគន់ការហាមឃាត់នោះថា ជាការសម្រេចគ្មានតម្លៃ ហើយបានពោលអះអាងសារជាថ្មីពីការទាមទាររបស់វៀតណាមដល់ប្រជុំកោះប៉ារ៉ាសេល ដែលមានជម្លោះហើយនិងផ្ទៃទឹកជុំវិញនោះ។
ភាពតានតឹងបានកើតមានឡើងកាលពីមួយឆ្នាំមុន នៅពេលដែលចិនបានដំឡើងការដ្ឋានខួងប្រេងដ៏ធំមួយនៅជិតប្រជុំកោះទាំងនោះ។
បាតុកម្មប្រឆាំងចិនក្នុងប្រទេសវៀតណាមបានធ្វើឲ្យជនជាតិចិនយ៉ាងហោចណាស់ក៏៤នាក់ដែរបានស្លាប់ ខណៈដែលកប៉ាល់មកពីភាគីទាំង២បានជន្លដាក់គ្នានៅក្នុងផ្ទៃទឹកជុំវិញការដ្ឋានខួងប្រេងនោះ៕
