ភ្ជាប់​ទៅ​គេហទំព័រ​ទាក់ទង

ប្រទេស​កុម្មុយនិស្ត​​ចិន​ប្រកាស​គាំទ្រ​កម្ពុជា​ពេញទី​ ​ក្រោយ​ការ​ឃុំ​ខ្លួន​លោក​កឹម សុខា ប្រធាន​គណបក្ស​ប្រឆាំង​


រូបឯកសារ៖ លោក កឹម សុខា អំឡុងពេលចូលរួមសមាជវិសាមញ្ញគណបក្សសង្គ្រោះជាតិ កាលពីថ្ងៃទី២ ខែមិនា ឆ្នាំ២០១៧។ (អូន ឆេងប៉រ/VOA)

រដ្ឋមន្ត្រី​ការ​បរទេស​កម្ពុជា​គឺ​លោក​ ​ប្រាក់ សុខុន​ បាន​ទទូច​ឲ្យ​ប្រមុខ​ការទូត​ ​និង​តំណាង​ស្ថាន​បេសកកម្មការ​ទូត​ប្រចាំ​នៅ​កម្ពុជា​ ​កុំ​លូកដៃ​ក្នុង​បញ្ហាផ្ទៃ​ក្នុង​​កម្ពុជា​ ​បន្ទាប់​​ពី​កម្លាំង​ប្រដាប់​អាវុធ​ឆ្មក់​ចូល​ផ្ទះ​លោក​ កឹម សុខា​​ ​​និង​ចាប់​ខ្លួន​​លោក។

ស្រប​ពេល​ដែល​រដ្ឋមន្ត្រី​ក្រសួង​ការ​បរទេស​កម្ពុជា​គឺ​លោក​ ​ប្រាក់ សុខុន​ ​ព្រមាន​ប្រទេស​ដែល​មាន​ស្ថាន​បេសក​កម្ម​ការទូត​នៅ​កម្ពុជា​ ​កុំ​ឱ្យ​ជ្រៀតជ្រែក​កិច្ច​ការ​ផ្ទៃក្នុង​កម្ពុជា​ ​ពាក់​ព័ន្ធ​នឹង​ការ​ចាប់​ឃុំ​ខ្លួន​លោក​ ​កឹម សុខា​ ​មេដឹក​នាំ​គណបក្ស​ប្រឆាំង ​មន្ត្រី​ប្រឹក្សា​នយោបាយ​ប្រជាជន​ចិន​បាន​ប្រកាសត្រៀម​ជួយរដ្ឋាភិបាល​លោក​ ​ហ៊ុន សែន​ ​នៅ​គ្រប់​កាលៈទេសៈ​ទាំង​អស់។​ ​នេះ​បើ​យោង​តាម​ការ​បញ្ជាក់​ពី​ទីប្រឹក្សា​របស់​ប្រធាន​រដ្ឋសភា​ខ្មែរ។​

ការ​ប្រកាស​ឱ្យ​ដឹង​របស់​តំណាង​ប្រឹក្សា​នយោបាយ​ប្រជាជន​ចិន​បាន​ធ្វើ​ឡើង​ក្នុង​ជំនួប​មួយ​រវាង​លោក​ ​វ៉ាង ចៀរ៉ុយ​ ​(Wang Jiarui)​ ​អនុ​ប្រធាន​សភា​ប្រឹក្សា​នយោបាយ​ប្រជាជន​ចិន​ ​និង​ ​លោក​ ហេង សំរិន​ ​ប្រធាន​រដ្ឋ​សភា​ជាតិ​កម្ពុជា។​ ​ក្នុង​ជំនួប​បិទទ្វារ​នា​មន្ទីរ​រដ្ឋ​សភា​ ​កាល​ពី​ព្រឹក​ថ្ងៃ​ព្រហស្បតិ៍​នេះ​ លោក​ ​វ៉ាង ចៀរ៉ុយបាន​សរសើរលោក​ ​ហ៊ុន សែន​ ​ក្នុង​ការ​ដោះស្រាយ​បញ្ហា​ផ្ទៃ​ក្នុង​នៅ​កម្ពុជា​បាន​ល្អ​ ហើយ​លោក​ក៏​បាន​ប្រកាស​ចំពោះ​មុខ​លោក​ ហេង សំរិន​ ​ថា​ ប្រទេស​ចិន​គាំទ្រ​ការ​ចាប់​ខ្លួន​លោក​ ​កឹម សុខា។​

លោក​ ​សន សារ៉ាណា​ ​ទីប្រឹក្សា​លោក​ហេង សំរិន​ ​ដែល​ចូលរួម​ក្នុង​ជំនួប​នា​ព្រឹក​ថ្ងៃ​ព្រហស្បតិ៍​ ​បាន​ប្រាប់​អ្នក​សារ​ព័ត៌មាន​ ​តាម​សម្តីដើម​របស់​លោក​ វ៉ាង ចៀរ៉ុយ​យ៉ាង​ដូច្នេះថា៖​

«សម្តេច​ ​ហ៊ុន សែន​ ​បាន​ដោះស្រាយ​បញ្ហា​ផ្ទៃ​ក្នុង​បាន​ល្អ​ប្រសើរ​ ក្នុង​រយៈពេល​ប៉ុន្មាន​ថ្ងៃ​នេះ។​ សម្តេច​ ​ហ៊ុន សែន​ បាន​ចាប់​ឯកឧត្តម​ ​កឹម សុខា​ ​ក្រសួង​ការ​បទេស​នៃ​ប្រទេស​ចិន​ ​បាន​សុំ​ធ្វើការ​គាំទ្រ​ចំពោះ​ កិច្ចការ​នេះ​ និង​សូម​ធានា​ដល់​ ប្រទេស​កម្ពុជា​នូវ​សន្តិសុខ​ផ្ទៃក្នុង​របស់​ប្រទេស​កម្ពុជា»។

លោក សន សារ៉ាណា ទីប្រឹក្សា​លោក ហេង សំរិន ប្រធាន​សភា​ជាតិ ធ្វើ​សន្និសីទ​ព័ត៌មាន​សង្ខេបអំពី​ការគាំទ្រ​របស់​ចិន​ក្នុង​ការចាប់ខ្លួន​លោក កឹម សុខា មេដឹកនាំ​គណបក្ស​ប្រឆាំង។ សន្និសីទ​ព័ត៌មាន​ធ្វើឡើង​នៅ​រដ្ឋសភា ក្នុង​រាជធានី​ភ្នំពេញ​កាលពី​ថ្ងៃ​ទី​ ៧ ខែ កញ្ញា​ ឆ្នាំ២០១៧។
លោក សន សារ៉ាណា ទីប្រឹក្សា​លោក ហេង សំរិន ប្រធាន​សភា​ជាតិ ធ្វើ​សន្និសីទ​ព័ត៌មាន​សង្ខេបអំពី​ការគាំទ្រ​របស់​ចិន​ក្នុង​ការចាប់ខ្លួន​លោក កឹម សុខា មេដឹកនាំ​គណបក្ស​ប្រឆាំង។ សន្និសីទ​ព័ត៌មាន​ធ្វើឡើង​នៅ​រដ្ឋសភា ក្នុង​រាជធានី​ភ្នំពេញ​កាលពី​ថ្ងៃ​ទី​ ៧ ខែ កញ្ញា​ ឆ្នាំ២០១៧។

ជំនួប​រវាង​លោក​ ហេង​ សំរិន​ និង​ លោក​ វ៉ាង​ ចៀរ៉ុយ​ ​កើត​មាន​ឡើង​តែ​មួយ​ថ្ងៃ​ប៉ុណ្ណោះ​ បន្ទាប់​ពី​លោក​ ប្រាក់​ សុខុន​ រដ្ឋមន្ត្រី​ក្រសួង​ការ​បរទេស​កម្ពុជា​ ​បាន​ចេញ​សេចក្តី​ពន្យល់​ប្រធាន​បេសក​កម្ម​ការ​ទូត​នៅ​កម្ពុជា​អំពី​ការ​ឃាត់​ខ្លួន​លោក​ កឹម​ សុខា​ ប្រធាន​គណបក្ស​សង្គ្រោះជាតិ។​

ក្នុង​សេចក្តី​ពន្យល់​ដែល​មាន​បី​ទំព័រ​ ​លោក​ ​ប្រាក់ សុខុន​បាន​បញ្ជាក់​ឲ្យ​ដឹង​ថា ​លោក​បាន​ជួប​ជាមួយ​ឯកអគ្គ​រាជទូត ឯកអគ្គ​រដ្ឋទូត​ ភារៈ​ធារី​ស្តីទី​ និង​សេនានុព័ន្ធយោធា​នៃ​បេសក​កម្ម​ការ​ទូត​ទាំងអស់​ប្រចាំ​នៅ​កម្ពុជា​ ​កាល​ពី​ថ្ងៃ​៣​ ខែ​កញ្ញា​ គឺ​ក្នុង​ថ្ងៃ​តែ​មួយ​ដែល​អាជ្ញាធរ​មាន​សមត្ថកិច្ច​ចាប់​លោក​ ​កឹម សុខា។​

ក្នុង​ជំនួប​ជាមួយ​មន្ត្រីការ​ទូត​ទាំង​នោះ​ លោក​ ​ប្រាក់ សុខុន​ ​បាន​ចាក់​បញ្ចាំង​ ​វីដេអូ​ឃ្លីប​ដែល​បង្ហាញ​ពីការ​អធិប្បាយ​របស់លោក​ ​កឹម សុខា​ ​អំពី​យុទ្ធសាស្ត្រ​ផ្តួល​រំលំ​រដ្ឋាភិបាល​បច្ចុប្បន្ន។​

បន្ទាប់​ពី​ការ​ចាក់​បញ្ចាំង​វីដេអូ​ឃ្លីប​នេះ​រួច​មក​ លោក​ ​ប្រាក់​ សុខុន​ ​បាន​ថ្លែង​ថា៖​

«យុទ្ធសាស្ត្រ​ក្នុង​ការ​ដណ្តើម​អំណាច​ គឺ​មាន​ជា​ទូទៅ​សម្រាប់​គ្រប់​គណបក្ស​នយោបាយ​ ហើយ​នោះ​មិនមែន​ជា​បទល្មើស​ឡើយ​ ប៉ុន្តែ​អ្វី​ដែល​បង្កើត​ជា​បទល្មើស គឺ​របៀប​ដែល​យុទ្ធសាស្ត្រ​ត្រូវ​បាន​បង្កើត​ឡើង​ ហើយ​អ្នកណា​នៅ​ពីក្រោយ​យុទ្ធសាស្ត្រ​នោះ»។​

រូបឯកសារ៖ រដ្ឋមន្រ្តីក្រសួងការបរទេសដែលទើបឡើងកាន់តំណែងថ្មី លោក ប្រាក់ សុខុន ជួបជាមួយលោកឯកអគ្គរដ្ឋទូតអាមេរិក William Heidt នៅរាជធានីភ្នំពេញ កាលពីថ្ងៃពុធ ទី១១ ខែឧសភា ឆ្នាំ២០១៦។ (ឡេង ឡែន/VOA)
រូបឯកសារ៖ រដ្ឋមន្រ្តីក្រសួងការបរទេសដែលទើបឡើងកាន់តំណែងថ្មី លោក ប្រាក់ សុខុន ជួបជាមួយលោកឯកអគ្គរដ្ឋទូតអាមេរិក William Heidt នៅរាជធានីភ្នំពេញ កាលពីថ្ងៃពុធ ទី១១ ខែឧសភា ឆ្នាំ២០១៦។ (ឡេង ឡែន/VOA)

សេចក្តី​ពន្យល់​ដដែល​បាន​ដកស្រង់​សម្តីលោក​ ​ប្រាក់ សុខុន​ ​បន្ត​ថា៖​

«លោក​ ​កឹម សុខា​ ​បាន​សារភាព​យ៉ាង​ច្បាស់​នៅ​ក្នុង​វីដេអូ​ថា​ សហ​រដ្ឋ​អាមេរិក​បាន​ប្រាប់​លោក​តាំង​ពី​ដំបូង​អំពី​អ្វី​ដែល​ត្រូវ​ធ្វើ។​ ​គាត់​បាន​និយាយ​ពី​ទំនាក់​ទំនង​រវាង​គាត់​ និង​សហ​រដ្ឋ​អាមេរិក​ តាំង​ពី​ឆ្នាំ​១៩៩៣​ មក។​ គាត់​បាន​ដក​ខ្លួន​ពី​ឆាក​នយោបាយ​តាម​ការ​ណែនាំ​របស់​ពួក​គេ។​ ​គាត់​បាន​យក​គំរូ​តាម​ប្រទេស​យូហ្គោស្លាវី​ នៅ​ពេល​ដែល​គេ​ប្រាប់​គាត់​ឲ្យ​ធ្វើ​ដូច្នេះ»។​

លោក​ ​ប្រាក់ សុខុន​ ​បាន​ចង្អុល​បង្ហាញ​ដោយ​លើក​ហេតុផល​ពី​ការ​ធ្វើ​បាតុកម្ម​ ​កាល​ពី​ឆ្នាំ​២០១៣​ និង ដើម​ឆ្នាំ​២០១៤​ ​ដែល​ទាមទារ​ឱ្យ​លោក​ ​ហ៊ុន សែន​ ចុះ​ចេញ​ពី​តំណែង​ ក្រោយ​ការ​បោះឆ្នោត​មួយ​ដែល​គណបក្ស​ជំទាស់​យល់​ថា​ មាន​ភាព​មិន​ប្រក្រតី​នោះ។​

ក្នុង​សេចក្តី​សន្និដ្ឋាន​របស់​លោក​នៅ​ចំពោះ​មុខ​មន្ត្រី​ការ​ទូត​ទាំង​នោះ​ លោក​ ​ប្រាក់ សុខុន​ ​បាន​អះអាង​ក្នុង​ន័យ​ដើម​ថា៖

«សម្រាប់​យើង​ខ្ញុំ​ និង​សម្រាប់​ខ្ញុំ​ផ្ទាល់​នេះ​គឺ​ជា​អំពើ​ក្បត់​ជាតិ​យ៉ាង​ពិត​ប្រាកដ។​ ​ប៉ុន្តែ​សូម​ទុក​ឲ្យ​តុលាការ​ជា​អ្នក​សម្រេច»។​

លោក​ ​ប្រាក់ សុខុន​ ​ក៏​បាន​សូម​ឲ្យ​មន្ត្រី​ការ​ទូត​ទាំង​នោះ​គោរព​ឯក​រាជ្យភាព​ អធិបតេយ្យ​ភាព​ និង​អព្យា​ក្រឹត្យ​ភាព​របស់​កម្ពុជា​ ​ហើយ​ទុក​ឲ្យ​ប្រជាជន​កម្ពុជា​សម្រេច​ជ្រើស​រើស​មេដឹកនាំ​ដោយ​សេរី។​ លោក​ប្រាក់ សុខុន​ ​ថែម​ទាំង​ទទូច​ឲ្យ​ប្រទេស​នានា​កុំមក​ជ្រៀតជ្រែក​ ​ហើយ​សូម​គោរព​ច្បាប់​កម្ពុជា​ផង​ដែរ។

ថ្វី​ដ្បិត​តែ​មាន​ការ​ពន្យល់​បែប​នេះ​ពីលោក​ប្រាក់ សុខុន រដ្ឋមន្ត្រី​ក្រសួង​ការ​បរទេស​ក៏​ដោយ​ ក៏​សហគមន៍​អន្តរជាតិ​ ​រួម​មាន​ស.រ.អា.​ សហភាព​អឺរ៉ុប ​អ.ស.ប. ​អូស្ត្រាលី ​អង់គ្លេស​ ​និង​អង្គការ​អន្តរជាតិ​ធំៗ​ បាន​បន្ត​ប្រតិកម្ម​នឹង​ការចាប់​ខ្លួន​លោក​ ​កឹម សុខា​ ​ប្រធាន​គណបក្ស​សង្គ្រោះជាតិ​ ​ដោយ​ចោទ​សួរ​អំពី​ភាព​ស្រប​ច្បាប់​នៃ​ការ​បោះឆ្នោត​ក្នុង​ឆ្នាំ២០១៨។​ ​រដ្ឋា​ភិបាល​សហព័ន្ធអាល្លឺម៉ង់​ ក៏​បាន​សម្តែង​ក្តី​បារម្ភ​ជាខ្លាំង​ចំពោះ​ការ​ចាប់​ខ្លួន​លោក​ កឹម សុខា​ ដែល​មាន​អភ័យឯកសិទ្ធិ​សភា។​ អាល្លឺម៉ង់​ក៏​ទាមទារ​ឲ្យ​ដោះលែង​មេដឹកនាំ​គណបក្ស​ជំទាស់​រូប​នេះ​ផង​ដែរ។

លោក​ ​John McCain​ ​ជា​សមាជិក​ព្រឹទ្ធសភា​មក​ពី​គណបក្ស​សាធារណរដ្ឋ​ ​រដ្ឋ​ Arizona​ ​បាន​ថ្លែង​នៅ​លើ​ប្រព័ន្ធ​ Twitter​ របស់​លោក​កាល​ពីថ្មីៗ​នេះថា៖​

«ការ​គាប​សង្កត់ ​ដែល​មិន​អាច​ទទួល​យក​ បាន​ទៅ​លើ​ក្រុម​មេ​ដឹកនាំ​ប្រជា​ធិបតេយ្យ​ក្នុង​ប្រទេស​កម្ពុជា​បញ្ជាក់​ឲ្យ​ដឹង​ពី​កំណើន​នៃ​ភាព​ផ្តាច់ការ​និយម​ដ៏គួរ​ឲ្យ​ព្រួយ​បារម្ភ»។​

ក៏​ប៉ុន្តែ​ចិន​មិន​មាន​ក្តីបារម្ភ​អ្វី​ឡើយ​ចំពោះ​ការ​ចាប់​ខ្លួន​លោក​ កឹម សុខា។​ លោក សន សារ៉ាណា​ ទីប្រឹក្សា​លោក​ហេង​ សំរិន​ ដែល​បាន​ជួប​លោក​ វ៉ាង​ ចៀរ៉ុយ​ (Wang Jiarui) ​អនុប្រធាន​សភា​ប្រឹក្សា​នយោបាយ​ប្រជាជន​ចិន ​បាន​បញ្ជាក់​ឲ្យ​ដឹង​ទៀត​ថា​ ចិន​ត្រៀម​រួច​រាល់​ក្នុង​ការ​បោស​សម្អាតឧបសគ្គ​នានា​នៅ​កម្ពុជា។​ លោក​ ​សន សារ៉ាណា​ ​និយាយ​ដោយ​យោង​តាម​សម្តី​ដើមរបស់​លោក​ ​វ៉ាង ចៀរ៉ុយ​ ​ថា៖​

«ប្រទេស​ចិន​នឹង​សហការ​ជួយ​ប្រទេស​កម្ពុជា​ នៅ​គ្រប់​កាលៈទេសៈ។​ ​កម្ពុជា​មាន​ឧបសគ្គ​ណា​មួយ​ ប្រទេស​ចិន​នៅ​ពី​ក្រោយ​ ជួយ​គាំទ្រ​ដំណើរ​នេះ។​ ជោគជ័យ​របស់​ប្រទេស​កម្ពុជា​ក៏​ដូច​ជា​ជោគជ័យ​របស់​ប្រទេស​ចិន។​ ឧបសគ្គ​កើត​ឡើង​ចំពោះ​ប្រទេស​កម្ពុជា​ ក៏​ជា​ឧបសគ្គ​របស់​ប្រទេស​ចិន»។​

ដោយ​ឡែក​ ​លោក​ ​ឈាង វុន​ ​អ្នក​នាំពាក្យ​តំណាង​រាស្ត្រ​គណបក្ស​ប្រជា​ជនកម្ពុជា​នៅ​រដ្ឋសភា​ បាន​ប្រាប់​អ្នកកាសែត​ក្នុង​សន្និសីទ​ព័ត៌មាននៅ​សភា​នា​ថ្ងៃព្រហស្បតិ៍​នេះ​ថា​ លោក​មាន​ក្តី​បារម្ភ​ ដែលលោក​ កឹម សុខា​ ​មេដឹក​នាំ​គណបក្ស​ប្រឆាំង​នៅ​កម្ពុជា​ បាន​សហកា​រជាមួយ​សហ​រដ្ឋ​អាមេរិក​ក្នុង​គោល​បំណង​យកលំនាំបដិវត្តន៍​ពណ៌​ដែល​បាន​កើតឡើងនៅ​ប្រទេស​សែប៊ី​ ដើម្បីផ្តួល​រំលំ​រដ្ឋាភិបាល​ស្រប​ច្បាប់។​

តំណាង​រាស្ត្រ​គណបក្ស​ប្រជាជន​កម្ពុជា​មណ្ឌល​ខេត្ត​បាត់​ដំបង​រូប​នេះ​បាន​បញ្ជាក់​ថា​ ​សកម្មភាព​លោក​កឹម​ សុខា​ អាច​ជាការ​នាំឲ្យមាន​ភាព​ស្អប់ខ្ពើម​ប្រឆាំង​នឹង​សហ​រដ្ឋ​អាមេរិក​ ​ដោយ​ហេតុ​ថា​បដិវត្តន៍​គាំទ្រ​ដោយ​សហ​រដ្ឋ​អាមេរិក​នៅ​ប្រទេសសែប៊ី​ បាន​ធ្វើ​ឲ្យ​ប្រទេស​ដែលស្ថិត​ក្នុង​តំបន់​អឺរ៉ុប​មួយ​នេះ​ រង​ការ​ខ្ទេចខ្ទាំ។

«នៅ​ក្នុង​បញ្ហា​សែប៊ី​នេះ​ ​ទីបំផុត​ប្រជា​ពល​រដ្ឋ​ សែប​ ជនជាតិ​សែប​ហ្នឹង -សែបប៊ី​ហ្នឹង​គេហៅ​ស៊ែប-​ ​ពួក​ប្រជាពលរដ្ឋ​សែប​នេះ​យក​ទង់​ជាតិ​សហ​រដ្ឋ​អាមេរិក​មក​ដុត​ហ្មង​ ព្រោះ​ប្រទេស​គេ​ហិនហោច។​ អីចឹង​ហើយ​កឹម​ សុខា​ ដែល​អាមេរិកាំង​ជួយ​នេះ​ អាច​ជំរុញ​ឲ្យ​ប្រជា​ពលរដ្ឋ​យើង​នេះ​ស្អប់​សហ​រដ្ឋ​អាមេរិក​ មិនមែន​យើង​ស្អប់​សហ​រដ្ឋ​អាមេរិក​ទេ​ គឺ​សកម្មភាព​របស់​គាត់​ នែ៎ស្អប់​សហ​រដ្ឋ​អាមេរិក»។​

រូបឯកសារ៖ លោក ឈាង វុន អ្នកនាំពាក្យ​តំណាងរាស្ត្រ​គណបក្ស​ប្រជាជន​កម្ពុជា​នៅ​រដ្ឋសភា ធ្វើ​សន្និសីទ​ព័ត៌មាន នៅ​សភា​នា​ទីក្រុង​ភ្នំពេញ​ កាលពី​ថ្ងៃ​ទី​ ៧ ខែ កញ្ញា​ ឆ្នាំ​ ២០១៧ អំពី​ការ​ចាប់ខ្លួន​លោក កឹម សុខា​ប្រធាន​គណបក្ស​សង្គ្រោះ​ជាតិ។ (ហ៊ុល រស្មី/VOA)
រូបឯកសារ៖ លោក ឈាង វុន អ្នកនាំពាក្យ​តំណាងរាស្ត្រ​គណបក្ស​ប្រជាជន​កម្ពុជា​នៅ​រដ្ឋសភា ធ្វើ​សន្និសីទ​ព័ត៌មាន នៅ​សភា​នា​ទីក្រុង​ភ្នំពេញ​ កាលពី​ថ្ងៃ​ទី​ ៧ ខែ កញ្ញា​ ឆ្នាំ​ ២០១៧ អំពី​ការ​ចាប់ខ្លួន​លោក កឹម សុខា​ប្រធាន​គណបក្ស​សង្គ្រោះ​ជាតិ។ (ហ៊ុល រស្មី/VOA)

នៅ​ពេល​ VOA​ សួរ​លោក​ថា តើ​លោក​ជឿ​ថា​ លោក​ ​កឹម សុខា​ ​ជា​មេដឹក​នាំ​បដិវត្តន៍​មែន​ទេ​ លោក​ឈាង វុន​ ​បាន​ថ្លែង​ថា​ មាន​តែ​តុលាការ​ទេ​ទើប​អាច​បញ្ជាក់​បាន​ថា​ តើ​លោក​កឹម សុខា​ ពិត​ជា​មេដឹក​នាំ​បដិវត្តន៍​ ឬ​ក៏​មិន​មែន​នោះ។​

«មានតែ​តុលាការ​ទេ​ ដែល​អាច​សម្រេច​ថា​ គាត់​មាន​ទោស​ ឬ​គាត់​គ្មាន​ទោស។​ គាត់​ជា​អ្នក​ដឹកនាំ​ ​ឬ​គាត់​មិន​មែន​ជា​អ្នក​ដឹកនាំ»។​

កាលពីថ្ងៃ​ពុធ​កន្លង​ទៅ​ ​ តុលាការ​រាជធានី​ភ្នំពេញ​បាន​ចោទ ​លោក​ កឹម សុខា​ តំណាងរាស្ត្រ​មណ្ឌល​ខេត្ត​កំពង់ចាម​ ពី​បទ​ «សន្ទិដ្ឋិភាព​ជា​មួយ​បរទេស»​ ​ដែល​ជា​បទ​ល្មើស​ស្មើ​នឹង​អំពើ​ក្បត់​ជាតិ​ ​ហើយ​លោកអាច​ប្រឈម​នឹង​ការ​ដាក់​ទោស​ក្នុង​ពន្ធនាគារ​ដល់​ទៅ​៣០​ឆ្នាំ។​

ភ្លាមៗ​បន្ទាប់​ពីតុលាការ​សម្រេច​ឃុំ​ខ្លួនលោក​ ​កឹម សុខា​ ​កូនស្រី​ពៅ​របស់​មេ​ដឹក​នាំ​គណបក្ស​ប្រឆាំង​រូប​នេះ​ គឺ​កញ្ញា​ កឹម សម្មាធីតា​ ​បាន​ដកស្រង់​សម្តីរបស់​អ្នកស្រី​ ​មូរ សុខហួរ​ ​អនុ​ប្រធាន​គណបក្ស​ប្រឆាំង​មក​បញ្ជាក់លើ​គណនី​សង្គម​ Twitter ​របស់​ខ្លួន​ថា​ «បទឧក្រិដ្ឋ​តែមួយ​គត់​របស់​លោក​កឹម សុខា​គឺលើក​កម្ពស់​លទ្ធិ​ប្រជា​ធិបតេយ្យ​ និង​ចង់​ឲ្យ​មាន​នីតិ​រដ្ឋ​ស្រប​ទៅ​តាម​គោល​ការណ៍​ប្រជា​ធិបតេយ្យ»។​

គ្រា​ដែល​លោក​ ​កឹម សុខា​ ​នៅ​មាន​អភ័យ​ឯក​សិទ្ធិ​សភា​នៅ​ឡើយ​ ​សភា​ខ្មែរ​បាន​ឲ្យ​ដឹង​ថា​ ​ខ្លួន​នឹង​ធ្វើ​ការ​សម្រេច​លើ​ករណីលោក​ ​កឹម សុខា​ ​ក្នុង​អង្គ​ប្រជុំ​វិសាមញ្ញ​ ដែល​គ្រោង​នឹង​ធ្វើ​ឡើង​នៅ​ថ្ងៃ​ចន្ទ​សប្តាហ៍​ក្រោយ។​ ​កិច្ច​ប្រជុំ​នោះ​ ​នឹង​សម្រេច​ថា​ តើ​តុលាការ​នឹង​បន្ត​រឿង​ក្តី​លោក​ ​កឹម សុខា​ ​ទៅ​មុខ​ទៀត​ ឬ​យ៉ាង​ណា ដោយ​មិន​ភ្ជាប់​ជាមួយ​នឹង​អភ័យ​ឯក​សិទ្ធិ​សភា​របស់​មេដឹក​នាំ​បក្ស​ប្រឆាំង​នោះ​ឡើយ៕

XS
SM
MD
LG