នៅថ្ងៃចន្ទនេះ រដ្ឋាភិបាលចិនបានចោទប្រកាន់សហរដ្ឋអាមេរិកថាបានបង្កឲ្យមានការភ័យខ្លាចទាក់ទិននឹងការផ្ទុះឡើងនូវមេរោគកូរ៉ូណាប្រភេទថ្មី ដោយសារសហរដ្ឋអាមេរិកបានជម្លៀសពលរដ្ឋខ្លួនចេញ និងដាក់កំហិតចំពោះការធ្វើដំណើរ ជាជាងផ្ដល់នូវជំនួយចាំបាច់ណាមួយ។
សហរដ្ឋអាមេរិកគឺជាប្រទេសដំបូងគេបង្អស់ដែលបានចាប់ផ្ដើមជម្លៀសពលរដ្ឋរបស់ខ្លួន ចេញនូវការព្រមានចំពោះការធ្វើដំណើរទៅប្រទេសចិន និងតាំងពីថ្ងៃអាទិត្យម្សិលមិញមក បានរារាំងមិនឲ្យចូលសហរដ្ឋអាមេរិកនូវជនបរទេសណាដែលកាលពីពេលថ្មីៗនេះធ្វើដំណើរទៅប្រទេសចិន។
អ្នកនាំពាក្យក្រសួងការបរទេសចិនអ្នកស្រី Hua Chunying បានប្រាប់អ្នកកាសែតថា រដ្ឋាភិបាលក្រុងវ៉ាស៊ីនតោន «បានបង្កើត និងបង្កឲ្យមានការភ័យខ្លាចស្លន់ស្លោជាបន្តបន្ទាប់»។ អ្នកស្រីបានបន្ថែមថា អង្គការសុខភាពពិភពលោកបានផ្ដល់ប្រឹក្សាមិនឲ្យរារាំងការធ្វើពាណិជ្ជកម្ម និងការធ្វើដំណើរ។
អ្នកស្រីបានបញ្ជាក់ថា៖ «ប្រទេសអភិវឌ្ឍដូចជាសហរដ្ឋអាមេរិកដែលមានសមត្ថភាពខ្លាំងក្លា និងមន្ទីរពេទ្យគុណភាពខ្ពស់នៅក្នុងការបង្ការការឆ្លងរាលដាលនៃមេរោគ គឺជាអ្នកដែលនាំមុខគេនៅក្នុងការដាក់កំហិតតឹងតែងផ្ទុយទៅនឹងអ្វីដែលអង្គការសុខភាពពិភពលោកបានលើកឡើង»។
អ្នកស្រីបានបន្ថែមថា ប្រទេសនីមួយៗគួរតែធ្វើការវាយតម្លៃដោយមានហេតុផលត្រឹមត្រូវ មិនឆេវឆាវ និងផ្អែកលើវិទ្យាសាស្ត្រ។
អ្នកស្រី Chunying បានបន្តថា៖ «កន្លងមក រដ្ឋាភិបាលសហរដ្ឋអាមេរិកមិនទាន់បានផ្ដល់ការជួយជ្រោមជ្រែងចាំបាច់ណាមួយដល់ប្រទេសចិននៅឡើយទេ»។
ករណីនេះគឺផ្ទុយពីការលើកឡើងរបស់ប្រធានាធិបតីសហរដ្ឋអាមេរិកលោក Donald Trump កាលពីចុងសប្ដាហ៍កន្លងទៅនេះ ដែលថា រដ្ឋាភិបាលសហរដ្ឋអាមេរិកបានផ្ដល់ «ការជួយជ្រោមជ្រែងដ៏ធំធេង»។ ប៉ុន្តែ ទីប្រឹក្សាសន្តិសុខជាតិរបស់លោក Trump គឺលោក Robert O' Brien បានបញ្ជាក់នៅក្នុងកិច្ចសម្ភាសន៍មួយថា ប្រទេសចិនមិនទាន់ទទួលយកសំណើរបស់សហរដ្ឋអាមេរិកនៅក្នុងការជួយជ្រោមជ្រែងលើរឿងនេះនៅឡើយទេ៕
