មន្ត្រីជាន់ខ្ពស់ផ្នែកស៊ើបការណ៍សម្ងាត់របស់សហរដ្ឋអាមេរិកនិងអូស្ត្រាលី បានចោទប្រកាន់ប្រទេសចិនអំពីការលួចកម្មសិទ្ធិបញ្ញាក្នុងកម្រិតខ្ពស់មួយមិនធ្លាប់មានពីមុន។ ការរិះគន់ដ៏ខ្លាំងនេះធ្វើឡើងស្របពេលដែលនាយករដ្ឋមន្ត្រីអូស្ត្រាលី លោក Anthony Albanese ត្រៀមទៅបំពេញទស្សនកិច្ចនៅប្រទេសចិននៅចុងឆ្នាំនេះ នៅក្នុងកិច្ចប្រឹងប្រែងបន្ថយការរង្កៀសចិត្តជាមួយចិនដែលជាដៃគូពាណិជ្ជកម្មធំបំផុតរបស់អូស្ត្រាលី។
វាជារឿងកម្រកើតមានណាស់ដែលទីភ្នាក់ងារចារកម្មអូស្ត្រាលីបានស្ដីបន្ទោសប្រទេសផ្សេងដោយលើកឈ្មោះចំៗបែបនោះ។
ក៏ប៉ុន្តែ លោក Mike Burgess អគ្គនាយកអង្គការស៊ើបការណ៍សម្ងាត់សន្តិសុខអូស្ត្រាលី ហៅកាត់ថា ASIO បាននិយាយបែបនេះជាសាធារណៈ នៅពេលលោកថ្លែងទៅកាន់ប្រព័ន្ធផ្សព្វផ្សាយ មុនពេលចាប់ផ្ដើមសន្និសីទស៊ើបការណ៍សម្ងាត់ដែលធ្វើឡើងនៅទីក្រុង Palo Alto រដ្ឋ California សហរដ្ឋអាមេរិក។
លោក Burgess បានថ្លែងថា ការស៊ើបការណ៍សម្ងាត់ផ្នែកសេដ្ឋកិច្ចដោយប្រទេសចិន បានធ្វើឡើងលើសពីការធ្វើចារកម្មធម្មតា ដោយហេតុថា កិច្ចការនេះត្រូវបានរដ្ឋាភិបាលចិនយល់ព្រមជាច្រើនឆ្នាំមកហើយ ដែលធ្វើឱ្យខូចប្រយោជន៍ដល់ប្រទេសប្រជាធិបតេយ្យជាច្រើន។
លោកថ្លែងដូច្នេះថា៖ «គ្រប់ប្រទេសទាំងអស់តែងធ្វើចារកម្ម។ គ្រប់ប្រទេសទាំងអស់ស្វែងរកព័ត៌មានសម្ងាត់ ហើយគ្រប់ប្រទេសទាំងអស់តែងស្វែងរកផលចំណេញផ្នែកយុទ្ធសាស្ត្រ។ ក៏ប៉ុន្តែ ឥរិយាបទរបស់ចិនដែលខ្ញុំលើកឡើងនៅពេលនេះ ធ្វើឡើងលើសពីចារកម្មជាប្រពៃណី។ ការគំរាមកំហែងដែលយើងបារម្ភនោះគឺថា រដ្ឋាភិបាលចិនជាប់ពាក់ព័ន្ធទៅនឹងការលួចកម្មសិទ្ធិបញ្ញានិងវត្ថុទទួលបានក្នុងទ្រង់ទ្រាយធំ យូរអង្វែង និងស្មុគស្មាញដែលមិនធ្លាប់មាននៅក្នុងប្រវត្តិសាស្ត្រមនុស្សជាតិ»។
ចិនជាដៃគូពាណិជ្ជកម្មធំជាងគេរបស់អូស្ត្រាលី ប៉ុន្តែទំនាក់ទំនងទ្វេរភាគីរវាងប្រទេសទាំងពីរបានធ្លាក់ចុះយ៉ាងខ្លាំងនៅក្នុងរយៈពេលប៉ុន្មានឆ្នាំចុងក្រោយនេះ ដោយសារតែជម្លោះផ្នែកភូមិសាស្ត្រនយោបាយនិងពាណិជ្ជកម្ម ក៏ដូចជាភាពតានតឹងបណ្ដាលមកពីប្រភពនៃជំងឺកូវីដ១៩។ នាយករដ្ឋមន្ត្រីអូស្ត្រាលីលោក Anthony Albanese រំពឹងថា នឹងទៅបំពេញទស្សនកិច្ចនៅប្រទេសចិនក្នុងពេលឆាប់ៗនេះ ដែលជាដំណើរទស្សនកិច្ចផ្លូវការលើកដំបូងរបស់មេដឹកនាំអូស្រាលីទៅកាន់រដ្ឋធានីប៉េកាំងក្នុងរយៈពេល ៧ ឆ្នាំចុងក្រោយនេះ។ លោក Albanese បានលើកឡើងជាញឹកញាប់ថា ការមិនចុះសម្រុងអាចកើតមានឡើងក្នុងពេលលោកព្យាយាមធ្វើឱ្យចំណងទាក់ទងជាមួយចិនមានស្ថិរភាពឡើងវិញ។
អត្ថាធិប្បាយរបស់លោក Burgess បានធ្វើឡើងនៅក្នុងជំនួបកំពូលនៃសម្ព័ន្ធសន្តិសុខ Five Eyes រៀបចំឡើងនៅរដ្ឋ California។
សម្ព័ន្ធមិត្តសន្តិសុខ Five Eyes រួមមានសហរដ្ឋអាមេរិក ចក្រភពអង់គ្លេស កាណាដា នូវែលសេឡង់ និងអូស្ត្រាលី។ សម្ព័ន្ធភាពនេះត្រូវបានបង្កើតឡើងក្រោយពីសង្គ្រាមលោកលើកទី២ ដើម្បីចែករំលែកកិច្ចការផ្នែកចារកម្ម និងសម្របសម្រួលកិច្ចប្រឹងប្រែងផ្នែកសន្តិសុខ។
មេដឹកនាំផ្នែកស៊ើបការណ៍សម្ងាត់មកពីសម្ព័ន្ធភាពនេះ បានធ្វើដំណើរទៅកាន់រដ្ឋ California តបតាមការអញ្ជើញរបស់លោក Christopher Wray ប្រធានការិយាល័យសហព័ន្ធស៊ើបអង្កេត FBI។ ពួកគេបានលើកឡើងពីតម្រូវការក្នុងការប្រុងប្រយ័ត្នកាន់តែខ្លាំងដើម្បីធានាបានថា បច្ចេកវិទ្យាថ្មីៗត្រូវបានការពារ។
លោក Wray បានហៅគណបក្សកុម្មុយនីស្តចិនថាជា«ការគំរាមកំហែងកំពូលសម្រាប់ការបង្កើតថ្មី ឬនវានុវត្តន៍) និងបានទទូចថា ចិនបានកំណត់យកការធ្វើចារកម្មផ្នែកសេដ្ឋកិច្ចជាផ្នែកដ៏សំខាន់សម្រាប់យុទ្ធសាស្ត្រថ្នាក់ជាតិរបស់គេ»។ លោកបន្តថា ក្នុងរយៈពេលប៉ុន្មានឆ្នាំចុងក្រោយនេះ ការិយាល័យសហព័ន្ធស៊ើបអង្កេតបានរកឃើញថា «ការស៊ើបអង្កេតបានកើនឡើងរហូតដល់១ពាន់៣០០ភាគរយ ដែលពាក់ព័ន្ធទៅនឹងការប៉ុនប៉ងលួចកម្មសិទ្ធិបញ្ញា ឬព័ត៌មានសម្ងាត់ផ្សេងៗ ប្រព្រឹត្តដោយផ្នែកខ្លះនៃរដ្ឋាភិបាលចិន»។
រហូតមកទល់ពេលនេះ មិនទាន់មានការឆ្លើយតបពីសំណាក់មន្ត្រីនៅទីក្រុងប៉េកាំងអំពីការលើកឡើងបែបនេះទេ។
សហរដ្ឋអាមេរិកនិងអូស្ត្រាលីក៏បានព្រមានផងដែរអំពីការគំរាមកំហែងហិង្សាកាន់តែខ្លាំងនៅលើទឹកដីរបស់ខ្លួន ដែលជាលទ្ធផលនៃសង្គ្រាមអ៊ីស្រាអែលជាមួយនឹងក្រុមសកម្មប្រយុទ្ធហាម៉ាស់៕
ប្រែសម្រួលដោយលោក នៀម ឆេង
