សហរដ្ឋអាមេរិក កំពុងតបតទៅវិញចំពោះគំនិតផ្តួចផ្តើមមួយរបស់រដ្ឋាភិបាលចិន ដែលលើកទឹកចិត្តពលរដ្ឋរបស់ខ្លួនឲ្យចូលរួមក្នុងសកម្មភាពប្រឆាំងចារកម្ម។ ក្រសួងការបរទេសអាមេរិកបាននិយាយកាលពីថ្ងៃពុធថា ការលើកទឹកចិត្តពលរដ្ឋឲ្យឈ្លបយកការណ៍ពីគ្នាទៅវិញទៅមក គឺជា«ទង្វើដ៏គួរឲ្យព្រួយបារម្ភក្រៃលែង»។
នៅសប្តាហ៍នេះ ក្រសួងសន្តិសុខរដ្ឋចិន ដែលជាទីភ្នាក់ងារចម្បងមើលការខុសត្រូវលើបញ្ហាស៊ើបការណ៍សម្ងាត់បរទេសនិងប្រឆាំងចារកម្ម បានបង្ហោះសារមួយតាមបណ្តាញផ្សព្វផ្សាយសង្គម WeChat របស់ចិន ដោយនិយាយថា ការអនុវត្តប្រកបដោយប្រសិទ្ធភាពនូវច្បាប់ប្រឆាំងចារកម្ម តម្រូវឲ្យមាន មិនត្រឹមតែការងាររបស់ទីភ្នាក់ងារសន្តិសុខជាតិចិនប៉ុណ្ណោះទេ ថែមទាំង«ការចូលរួមយ៉ាងទូលំទូលាយពីប្រជាជន»ទៀតផង។
ចំណាត់ការថ្មីចុងក្រោយនេះរបស់ក្រសួងសន្តិសុខរដ្ឋចិនកើតឡើងក្រោយពីការពង្រីកវិសាលភាពច្បាប់ស្តីពីការប្រឆាំងចារកម្មរបស់ចិន ដែលបានចូលជាធរមាននៅថ្ងៃទី ១ ខែកក្កដា។
អ្នកនាំពាក្យក្រសួងការបរទេសអាមេរិក លោក Matthew Miller បាននិយាយក្នុងសន្និសីទមួយកាលពីថ្ងៃពុធម្សិលមិញថា៖ «យើងកំពុងតាមដានយ៉ាងដិតដល់នូវការអនុវត្តច្បាប់ថ្មីស្តីពីការប្រឆាំងចារកម្មរបស់ចិន ដែលជាលាយលក្ខណ៍អក្សរ ពង្រីកវិសាលភាពយ៉ាងធំធេងនូវសកម្មភាពដែលចាត់ទុកថាជាការស៊ើបការណ៍សម្ងាត់»។
នៅពេលមុនឆ្នាំនេះ រដ្ឋាភិបាលចិនបានធ្វើបច្ចុប្បន្នភាពច្បាប់ប្រឆាំងចារកម្មរបស់ខ្លួន ដែលហាមប្រាមការចែកចាយព័ត៌មានទាក់ទងនឹងសន្តិសុខជាតិ។ តែច្បាប់នេះមិនបានកំណត់និយមន័យជាក់លាក់ថា តើអ្វីទៅជាសន្តិសុខ ឬប្រយោជន៍ជាតិរបស់ចិននោះទេ។
វិធានការនេះ ត្រូវបានគេមើលឃើញថាធ្វើឡើងដើម្បីបង្កើនហានិភ័យប្រតិបត្តិការសម្រាប់ក្រុមហ៊ុនពហុជាតិជាច្រើន ដែលប្រកបអាជីវកម្មក្នុងប្រទេសចិន។
ព័ត៌មានខ្លះក្នុងសេចក្តីរាយការណ៍នេះ មានប្រភពពីទីភ្នាក់ងារសារព័ត៌មាន Reuters៕
