អតីតអភិបាលរងរាជធានីភ្នំពេញ ម៉ាន់ ឈឿន ត្រូវបានព្រឹទ្ធសភាទទួលស្គាល់នៅថ្ងៃអង្គារនេះ ជាសមាជិកព្រឹទ្ធសភាប្រចាំមណ្ឌល១ (ភ្នំពេញ) ជំនួសលោក ជា ស៊ីម ដែលបានទទួលមរណភាព។
សេចក្តីប្រកាសព័ត៌មានពីព្រឹទ្ធសភាបានបញ្ជាក់ថា៖ «យោងស្មារតីប្រជុំគណៈកម្មាធិការអចិន្ត្រៃយ៍ព្រឹទ្ធសភានាថ្ងៃ២៦មិថុនាឆ្នាំ២០១៥ ក្នុងសម័យប្រជុំពេញអង្គព្រឹទ្ធសភាលើកទី៧ នីតិកាលទីបីនាព្រឹកថ្ងៃទី៣០ ខែមិថុនាឆ្នាំ ២០១៥ ឯកឧត្តមម៉ាន់ ឈឿន ត្រូវបានប្រកាសទទួលស្គាល់ជាសមាជិកព្រឹទ្ធសភា មណ្ឌលភូមិភាគទី១(រាជធានីភ្នំពេញ) ជំនួសសម្តេចអគ្គមហាធម្មពោធិសាលជាស៊ីម ដែលទទួលមរណភាព»។
លោក ម៉ាន់ ឈឿន ធ្លាប់ជានាយកខុទ្ទកាល័យសាលាក្រុងមុននឹងឡើងជាអភិបាលរងរាជធានីភ្នំពេញទទួលបន្ទុកផ្នែកសង្គមកិច្ច។
លោកជា ស៊ីម អតីតប្រធានព្រឹទ្ធសភាបានទទួលមរណភាពកាលពីថ្ងៃទី៨ខែមិថុនាដោយជរាពាធក្នុងជន្មាយុ៨២ឆ្នាំ៕
