ការបោះឆ្នោតនៅម៉ាឡេស៊ី ដែលបង្កឲ្យមានការភ្ញាក់ផ្អើលជាខ្លាំង កាលពីខែឧសភា មិនត្រឹមតែបង្កើតសម្ព័ន្ធគ្រប់គ្រងដ៏ថ្មីមួយទេ ប៉ុន្តែវាក៏អាចនឹងធ្វើឲ្យមានការផ្លាស់ប្តូរជាខ្លាំងសម្រាប់វិស័យសារព័ត៌មាន ដែលមួយផ្នែកធំត្រូវបានស្ថិតនៅក្រោមការគ្រប់គ្រងរបស់រដ្ឋាភិបាលមុន។
លោក Steven Ganជានិពន្ធនាយកនៃសារព័ត៌មានMalaysiakini ថ្លែងថា៖
«ខ្ញុំមានសុទិដ្ឋិនិយមយ៉ាងខ្លាំងថា នឹងមានការប្រែប្រួល ប៉ុន្តែនិយាយទៅវាដូចជាឆាប់រហ័សពេក។ យើងនៅមិនទាន់អាចដឹងទេ»។
វាឆាប់រហ័សពេកក្នុងការប្រាប់អំពីការផ្លាស់ប្តូរ ដែលទើបតែកើតមានឡើងក្រោយពីការបោះឆ្នោតនៅក្នុងខែឧសភា ដែលនេះជាជ័យជំនះដំបូងរបស់គណបក្សប្រឆាំង តាំងពីប្រទេសម៉ាឡេស៊ី ទទួលបានឯករាជ្យពីចក្រភពអង់គ្លេសកាលពីជាង៦០ឆ្នាំកន្លងទៅ។
អស់រយៈកាលជាច្រើនទសវត្សរ៍មកនេះ ប្រព័ន្ធផ្សព្វផ្សាយធំៗរបស់ប្រទេសនេះ មួយផ្នែកធំស្ថិតនៅក្រោមការគ្រប់គ្រងរបស់រដ្ឋាភិបាល។ គណបក្សនយោបាយ និងក្រុមហ៊ុនជំនួញជាច្រើន ដែលមានទំនាក់ទំនងជាមួយប្រព័ន្ធផ្សព្វផ្សាយទាំងនោះនិងរដ្ឋាភិបាល គឺជាម្ចាស់នៃស្ថាប័នសារព័ត៌មានធំៗ។
រដ្ឋាភិបាល ធ្វើឲ្យសា្ថប័នសារព័ត៌មានឯករាជ្យជាច្រើន ដូចជា Malaysiakini ដែលមិនបាននិយាយតាមគោលការណ៍រដ្ឋាភិបាលមានការពិបាកចុះបញ្ជីត្រឹមត្រូវដើម្បីទទួលបាននូវអាជ្ញាប័ណ្ណដើម្បីផ្សាយ និងបោះពុម្ភទស្សនាវដី្ត ក៏ដូចជាកាសែត។
អ្នកស្រី Gayathery Venkiteswaran នៃសាកលវិទ្យាល័យ Nottingham Malaysia ថ្លែងថា៖
«វាគឺជាការត្រួតត្រាលើវិស័យសារព័ត៌មានយ៉ាងជាក់ស្តែង ពីព្រោះរដ្ឋាភិបាលអាចនិយាយទៅកាន់ស្ថាប័នសារព័ត៌មានបោះពុម្ភ និងផ្សព្វផ្សាយថា អ្នកមិនអាចផ្សាយពីរឿងនេះបានទេ»។
ជាឧទាហរណ៍ដ៏សំខាន់មួយគឺ បទចោទប្រកាន់ប្រឆាំងទៅនឹងលោកនាយករដ្ឋមន្រ្តី Najib Razak លើករណីអំពើរពុករលួយដ៏សម្បើម ដែលត្រូវបានរំលាយកាលពីការបោះឆ្នោតកន្លងទៅ។ ការផ្សាយរបស់ប្រព័ន្ធផ្សព្វផ្សាយព័ត៌មានធំៗ ជាញឹកញយតែងតែមិនផ្សាយ ឬក៏ផ្សាយមិនគ្រប់ជ្រុងជ្រោយពីករណីនេះ។
បញ្ហានេះបានជម្រុញឲ្យអ្នកបោះឆ្នោតជាច្រើន ដូចជាលោក Kevin Khor ងាកទៅរកប្រភពព័ត៌មានផ្សេងទៀត ដូចជា Malaysiakini។
លោក Kevin Khor ថ្លែងថា៖
«ប្រជាពលរដ្ឋជាទូទៅ មិនជឿជាក់ទៅលើប្រព័ន្ធផ្សព្វផ្សាយធំៗទេ នៅមុនការបោះឆ្នោតជាតិ ហើយប្រជាពលរដ្ឋស្វែងរកប្រភពព័ត៌មានដ៏ទៃទៀត នៅលើប្រព័ន្ធអ៊ីនធឺណេត ដើម្បីស្វែងរកការរាយការណ៍ព័ត៌មានដែលមានភាពប្រសើរជាង និងមិនលំអៀង»។
យុទ្ធនាការរបស់គណបក្សកាន់អំណាចថ្មីនេះ បានសន្យាថា នឹងបញ្ចូលសេរីភាពក្នុងការបញ្ចេញមតិ ប៉ុន្តែវាមិនប្រាកដទេថា ពួកគេនឹងនៅតែបន្តធ្វើវា។
លោកនាយករដ្ឋមន្រ្តី Mahathir Mohamad បានកាន់ដំណែងម្តងរួចទៅហើយពីឆ្នាំ ១៩៨១ រហូតដល់ឆ្នាំ២០០៣ ដែលជាអំឡុងពេលដែលលោកមិនមានទំនាក់ទំនងល្អជាមួយស្ថាប័នសារព័ត៌មានឡើយ។
សារព័ត៌មាន Malaysiakini មាន «បញ្ជីមួយឈ្មោះជញ្ជាំងសេរីភាពសារព័ត៌មាន» ដែលបានបង្ហាញអំពីស្ថាប័នសារព័ត៌មានត្រូវបានបិទ ឬក៏ផ្អាកមិនឲ្យដំណើរការ ដោយរួមមានស្ថាប័នមួយចំនួន ក្នុងអំឡុងពេលដែលលោក Mohathir កាន់ដំណែងជានាយករដ្ឋមន្រ្តីជាលើកដំបូងផងដែរ។
លោក Steven Ganជានិពន្ធនាយកនៃសារព័ត៌មានMalaysiakini ថ្លែងបន្ថែមទៀតថា៖
«ទង្វើនេះ ទំនងជាផ្ទុយពីការសន្យារបស់លោក Mohathir។ អ្នកដឹងហើយថា ធាតុពិតនៅក្នុងអំឡុងពេលដែលលោកកាន់ដំណែងដំបូងជានាយករដ្ឋមន្រ្តី លោកមិនត្រូវបានគេស្គាល់ថា ជាអ្នកដែលចូលចិត្តស្ថាប័នសារព័ត៌មាននោះទេ ហើយលោក គឺជាសត្រូវរបស់ប្រព័ន្ធផ្សព្វផ្សាយព័ត៌មាន នៅពេលនោះ។ បន្ថែមពីនេះទៅទៀត ធាតុពិត លោកបានឈ្នះក្នុងការឆ្នោតនេះ ដើម្បីក្លាយទៅជានាយករដ្ឋមន្រ្តីជាថ្មីម្តងទៀត គឺលោកបានឈ្នះដោយសារតែសេរីភាពសារព័ត៌មាន និងសារព័ត៌មានឯករាជ្យ»។
ស្ថាប័នសារព័ត៌មាន Malaysiakini បានសន្យាថា ខ្លួននឹងធ្វើការយ៉ាងច្បាស់លាស់ ទៅលើរបបថ្មីនេះ ដូចដែលខ្លួនបានធ្វើកន្លងមកក្នុងរបបចាស់ ប៉ុន្តែបរិយាកាសណាមួយដែលស្ថាប័នព័ត៌មាន នឹងត្រូវជួបប្រទះនៅក្នុងប្រទេសនេះ គឺជារឿងមួយដែលមិនអាចសរសេរបាននៅឡើយទេ៕
ប្រែសម្រួលដោយ យូ សុធារី
