មនុស្សម្នានាំគ្នាចេញមកដើរតាមផ្លូវនៅក្នុងរដ្ឋធានី Harare នៃប្រទេសស៊ីមបាវ៉េនៅថ្ងៃអង្គារដើម្បីអបអរសារទរ បន្ទាប់ពីលោកប្រធានាធិបតី Robert Mugabe លាចេញពីតំណែង ក្រោយពីបានកាន់អំណាចអស់ពេល៣៧ឆ្នាំមក។
អតីតអនុប្រធានាធិបតីរបស់លោកគឺលោក Emmerson Mnagagwa នឹងធ្វើសច្ចាប្រណិធានឡើងកាន់តំណែងជាប្រធានាធិបតី នៅថ្ងៃពុធ ឬ ព្រហស្សតិ៍ នេះបើតាមសម្តីរបស់ក្រុមមន្ត្រីជាន់ខ្ពស់នៅក្នុងគណបក្សកាន់អំណាច ZANU-PF ។
សំឡេងស៊ីផ្លេរថយន្តលាន់កងរំពង ស្របពេលដែលមនុស្សម្នានាំគ្នារាំរែក ហ៊ោរកញ្ជ្រៀវ ដើម្បីអបអរសារទរចំពោះដំណឹងថាលោក Mugabe ចេញពីតំណែង ដែលលោកបានប្រកាសនៅក្នុងលិខិតមួយច្បាប់ អានដោយប្រធានរដ្ឋសភានោះ។
បុរសម្នាក់បាននិយាយប្រាប់វីអូអេផ្នែកផ្សាយជាភាសាស៊ីមបាវ៉េថា នេះជាដំណោះស្រាយមួយ យើងរំភើបខ្លាំងណាស់ ក្នុងនាមជាពលរដ្ឋស៊ីមបាវ៉េ ហើយយើងចង់អរគុណព្រះជាម្ចាស់។ ការបន់ស្រន់របស់យើងបានក្លាយជាការពិតហើយ។ យើងបានរងគ្រោះយ៉ាងខ្លាំងអស់ពេល៣៧ឆ្នាំ។ លោកប្រធានសភា Jacob Mudenda បានអានលិខិតលាចេញពីតំណែងនោះ ភ្លាមៗបន្ទាប់ពីសភាចាប់ផ្តើមដំណើរការដកហូតតំណែងពីលោក Mugabe។ ទាំងប្រធានាធិបតី Mugabe និងការិយាល័យប្រធានាធិបតី មិនបានទទួលស្គាល់ថា មានលិខិតពិតឬមិនពិតនោះទេ ហើយក៏មិនបានធ្វើការបដិសេធផងដែរ។ លោក Mugabe ដែលមានអាយុ៩៣ឆ្នាំនោះ បានគ្រប់គ្រងប្រទេស ស៊ីមបាវ៉េ ចាប់តាំងពីប្រទេសនេះបានទទួលឯករាជ្យពីប្រទេសអង់គ្លេស កាលពីឆ្នាំ១៩៨០មក៕
