ការិយាល័យថវិកានៃសភាស.រ.អា.ហៅកាត់ថា CBO បាននិយាយថាមនុស្ស១៤លាននាក់នឹងបាត់បង់ការធានារ៉ាប់រងខាងសុខភាពនៅឆ្នាំក្រោយប្រសិនបើសភាអនុម័តផែនការរបស់ក្រុមគណបក្សសាធារណរដ្ឋដើម្បីជំនួសផែនការ Affordable Act ដែលគេស្គាល់ជាទូទៅថា Obamacare។
អង្គការ CBO ដែលជាក្រុមមួយរបស់ពួកអ្នកវិភាគថវិកានិងសេដ្ឋវិទូដែលមិនកាន់ខាងគណបក្សណាមួយបានចេញផ្សាយរបាយការណ៍របស់ពួកគេកាលពីថ្ងៃចន្ទអំពីសោហ៊ុយនៃការបំពេញតាមការសន្យារបស់លោក Trump នៅពេលលោកធ្វើការឃោសនាបោះឆ្នោតថានឹងរុះរើប្រព័ន្ធធានារ៉ាប់រងខាងសុខភាពដែលបានរៀបចំឡើងដោយលោកបារ៉ាក់ អូបាម៉ា ដែលជា អ្នកកាន់តំណែងមុនលោក។ លោក Trump និងសមាជិកគណបក្សសាធារណរដ្ឋឯទៀតៗនិយាយថាប្រព័ន្ធបច្ចុប្បន្នអស់សោហ៊ុយច្រើនណាស់ហើយបានបង្ខំដោយអយុត្តិធ៌មឱ្យប្រជារាស្ត្រអាមេរិកាំងទិញធានារ៉ាប់រងសុខភាព។
សេចក្តីរាយការណ៍របស់អង្គការ CBO និយាយថាប្រសិនបើផែនការរបស់ពួកសាធារណរដ្ឋត្រូវអនុម័ត ចំនួនមនុស្សដែលគ្មានការធានារ៉ាប់រងសុខភាពអាចកើនឡើងពី១៤លាននាក់ដល់ ៤១លាននាក់ក្នុងឆ្នាំ២០១៨។ មិនហួសពីឆ្នាំ២០២៦ ចំណាយនេះនឹងកើនឡើងដល់៥២លាននាក់ បើប្រៀបធៀបនឹងចំណាយ២៨លាននាក់បើមានការរក្សាទុកប្រព័ន្ធ Obamacare។
ច្បាប់ស្តីពីការថែរក្សាសុខភាពដែលបានអនុម័តកាលពីឆ្នាំ២០១០ជាកម្មវិធីសំខាន់បំផុតរបស់លោកអូបាម៉ាហើយបាននាំឱ្យមនុស្ស២០លាននាក់ដែលពីមុនគ្មានការធានារ៉ាប់រងខាងសុខភាព មានការធានារ៉ាប់រងនេះ។
អង្គការ CBO ថ្លែងថាផែនការថ្មីនេះរបស់ពួកសាធារណរដ្ឋនឹងកាត់បន្ថយឱនភាពសហព័ន្ធចំនួន៣៣៧ពាន់លានដុល្លាររហូតដល់ឆ្នាំ២០២៦។ ដោយធ្វើការប្រៀបធៀប អង្គការ CBO ស្ទង់ប្រមាណថាក្នុងឆ្នាំ២០១៧នេះ រដ្ឋាភិបាលសហព័ន្ធនឹងមានចំណាយ៤លានលានដុល្លារដោយបន្ថែម៥៥៩ពាន់លានដុល្លារក្នុងឱនភាព៕
