នៅក្នុងសាធារណរដ្ឋអាហ្រ្វិកកណ្តាល លទ្ធផលនៃការបោះឆ្នោតសភាដែលបានធ្វើឡើងកាលពីថ្ងៃទី៣០ ខែធ្នូ កន្លងទៅនេះ ត្រូវបានចាត់ទុកជាមោឃៈ ហើយបេក្ខជនទាំងអស់នឹងត្រូវឈរឈ្មោះសារជាថ្មីម្តងទៀត។
កាលពីថ្ងៃចន្ទ តុលាការធម្មនុញ្ញបានតម្កល់លទ្ធផលនៃការបោះឆ្នោតជ្រើសរើសប្រធានាធិបតីជុំទី១ ដោយបានបញ្ជាក់ថា មានភាពមិនប្រក្រតីច្រើនហួសហេតុនៅក្នុងការបោះឆ្នោតសភានេះ។ លោកនាយករដ្ឋមន្ត្រីបានពន្យល់កាលពីថ្ងៃពុធថា ភាពមិនប្រក្រតីធំបំផុតនៅក្នុងការបោះឆ្នោតនោះគឺការខ្វះសន្លឹកឆ្នោត។
លោក Mahamat Kamoun នាយករដ្ឋមន្ត្រីសាធារណរដ្ឋអាហ្រ្វិកកណ្តាលបានមានប្រសាសន៍នៅក្នុងបទសម្ភាសន៍មួយជាមួយនឹងប្រព័ន្ធផ្សព្វផ្សាយកាលពីថ្ងៃពុធថា មណ្ឌលបោះឆ្នោតនៅក្នុងប្រទេស បានខ្វះសន្លឹកឆ្នោតចំនួន៥សែនសន្លឹកសម្រាប់ការបោះឆ្នោតសភាកាលពីថ្ងៃទី៣០ខែធ្នូកន្លងទៅ។
លោក Kamoun បានការពារសេចក្តីសម្រេចរបស់តុលាការធម្មនុញ្ញក្នុងការទុកលទ្ធផលនៃការបោះឆ្នោតជាមោឃៈ ដែលសេចក្តីសម្រេចនេះបានធ្វើឲ្យបេក្ខជនដែលគិតថាខ្លួនបានឈ្នះមានការមិនពេញចិត្ត។
អ្នកនាំពាក្យម្នាក់របស់អាជ្ញាធររៀបចំការបោះឆ្នោតជាតិ គឺលោក Julius Ngouade-Baba បានថ្លែងប្រាប់ VOA ថា សន្លឹកឆ្នោតទាំងនោះត្រូវបានបោះពុម្ពចេញនៅនាទីចុងក្រោយ ហើយពុំមានពេលវេលាគ្រប់គ្រាន់ដើម្បីធ្វើឲ្យប្រាកដថា សន្លឹកឆ្នោតទាំងនោះបានទៅដល់មណ្ឌលបោះឆ្នោតនានានោះទេ៕
