សន្និសីទសម្ព័ន្ធនិស្សិតខ្មែរប្រចាំឆ្នាំលើកទី ១៥ ដែលរៀបចំឡើងដោយសមាគមនិស្សិត Cambodian Student Society នៃសាកលវិទ្យាល័យ California State University Long Beach និងសមាគមនិស្សិត Cambodian Awareness Organization នៃសាកលវិទ្យាល័យ University of California, Irvine នឹងធ្វើឡើងនៅថ្ងៃសៅរ៍ទី ២៣ ខែវិច្ឆិកា ខាងមុខនេះ នៅសាកលវិទ្យាល័យ California State University Long Beach។ សន្និសីទនេះផ្ដោតជាពិសេសលើ «អ្វីដែលកំពុងកើតមានឡើងនៅក្នុងសហគមន៍ [ខ្មែរអាមេរិកាំង] នាពេលបច្ចុប្បន្ននេះ។
សន្និសីទសម្ព័ន្ធនិស្សិតខ្មែរ (Khmer Students Coalition Conference) ឆ្នាំនេះ ដែលរៀបចំឡើងដោយសមាគមនិស្សិត Cambodian Student Society នៃសាកលវិទ្យាល័យ California State University Long Beach និងសមាគមនិស្សិត Cambodian Awareness Organization នៃសាកលវិទ្យាល័យ University of California, Irvineនឹងធ្វើឡើងនៅថ្ងៃសៅរ៍ទី ២៣ ខែវិច្ឆិកា ឆ្នាំ ២០១៩ ខាងមុខនេះ នៅសាកលវិទ្យាល័យ California State University Long Beach។
«ជីវិតផុតពីការរស់រានពីរបបខ្មែរក្រហម៖ អត្តសញ្ញាណប្រទាក់ក្រឡាគ្នា ទ្រឹស្ដីស្ត្រីនិយម និងការអប់រំ» គឺជាប្រធានបទនៃសន្និសីទប្រចាំឆ្នាំលើកទី ១៥ នេះ ដែលផ្ដោតលើ «ដំណើរផុតពីរបបខ្មែរក្រហម និងផ្ដោតលើអ្វីដែលកំពុងកើតឡើងនៅក្នុងសហគមន៍ [ខ្មែរអាមេរិកាំង] នាពេលបច្ចុប្បន្ន»។ នេះបើយោងតាមកម្មវិធីរបស់សន្និសីទនេះ។
សន្និសីទសម្ព័ន្ធនិស្សិតខ្មែរនេះត្រូវបានបង្កើតឡើងកាលពីឆ្នាំ ២០០៤ ដើម្បី «ភ្ជាប់ទំនាក់ទំនង បង្រួបបង្រួម និងជំរុញលើកទឹកចិត្តនិស្សិតខ្មែរ» មកពីទូទាំងសហរដ្ឋអាមេរិក។ អ្នកស្រីបណ្ឌិត នូ លក្ខិណា សាស្ត្រាចារ្យសង្គមវិទ្យានៃសាកលវិទ្យាល័យ California State University Long Beach និងជាអ្នកផ្ដល់ប្រឹក្សាដល់ក្រុមនិស្សិតនៃសមាគមនិស្សិត Cambodian Student Society បានបញ្ជាក់ថា សន្និសីទឆ្នាំនេះមានបំណងជាពិសេសទាក់ទាញភាគច្រើននិស្សិតខ្មែរអាមេរិកាំង និងនិស្សិតអាមេរិកាំងដែលមានដើមកំណើតមកពីប្រទេសដីកោះមហាសមុទ្រប៉ាស៊ីហ្វិក «ដែលជាក្រុមមានចំនួនតិចតួចនៅក្នុងផ្នែកសិក្សាអប់រំ»។
ការជួបជុំគ្នានៅក្នុងឆ្នាំនេះអាចមានសារៈសំខាន់ជាងកាលពីលើកមុនៗ ដោយសារតែ «កាលពីលើកមុនៗ សន្និសីទនេះផ្ដោតភាគច្រើនលើថាតើពលរដ្ឋខ្មែរមកដល់សហរដ្ឋអាមេរិកតាមវិធីណា និងស្លាកស្នាមឈឺចាប់កាលពីអតីតកាល។ យើងមិនមែននិយាយថា យើងមិនគួរនិយាយអំពីរឿងរ៉ាវទាំងអស់នេះទេ ប៉ុន្តែ ការទទួលស្គាល់ពីអតីតកាលគឺវាសំខាន់ហើយ ប៉ុន្តែយើងត្រូវធ្វើដំណើរទៅមុខឲ្យហួសពីដំណើរជីវិតផុតពីការរស់រានពីរបបខ្មែរក្រហម។ នេះបើតាមការបញ្ជាក់របស់លោក Ethan Chhan ប្រធានផ្នែកទំនាក់ទំនងសង្គមនៃសមាគមនិស្សិត Cambodian Awareness Organization។
របបខ្មែរក្រហមបានកាន់កាប់ប្រទេសកម្ពុជាពីឆ្នាំ ១៩៧៥ ដល់ ១៩៧៩ ហើយបានសម្លាប់ពលរដ្ឋកម្ពុជាចំនួនប្រហែល ១ លាន ៧ សែននាក់។ ក្រោយការដួលរលំរបបនេះ មានពលរដ្ឋខ្មែរជាច្រើនម៉ឺននាក់បានភៀសខ្លួនមករស់នៅសហរដ្ឋអាមេរិក។
អ្នកស្រីសាស្ត្រាចារ្យ នូ លក្ខិណា លើកឡើងថា វាជា «សន្និសីទដែលរៀបចំឡើងដោយនិស្សិត» ដោយសាកលវិទ្យាល័យនីមួយៗផ្លាស់ប្ដូរវេនគ្នានៅក្នុងការរៀបចំវាឡើង។ អ្នកស្រីបន្ថែមថា ប្រធានបទនៃសន្និសីទនេះក៏ផ្លាស់ប្ដូរជារៀងរាល់ឆ្នាំផងដែរអាស្រ័យលើអ្នករៀបចំ។
«សម្រាប់ឆ្នាំនេះជាពិសេស និស្សិតខ្មែរក្មេងៗចង់ផ្ដោតលើអត្តសញ្ញាណប្រទាក់ក្រឡាគ្នា ទ្រឹស្ដីស្ត្រីនិយម និងការអប់រំ ដោយសារតែពួកគេយល់ឃើញថាបញ្ហាទាំងនេះជាបញ្ហាសំខាន់សម្រាប់ពួកគេ និងសហគមន៍របស់ពួកគេ»។
លោក Sovannprina Kiet ប្រធានសមាគមនិស្សិត Cambodian Student Society បានសង្កត់ធ្ងន់អំពីសារៈសំខាន់នៃ «អត្តសញ្ញាណប្រទាក់ក្រឡាគ្នា» ក្នុងជីវិតរស់នៅរបស់ពលរដ្ឋខ្មែរអាមេរិកាំងផុតពីការរស់រានពីរបបខ្មែរក្រហម។ លោកបាននិយាយថា មូលហេតុគឺដោយសារ «ពួកគេភាគច្រើនធំដឹងក្ដីនៅសហរដ្ឋអាមេរិក។ ពួកគេហាក់ដូចជានៅមិនច្បាស់អំពីអត្តសញ្ញាណរបស់ខ្លួន។ អ្នកខ្លះមិនចេះភាសាខ្មែរច្រើននោះទេ។ អ្នកខ្លះទៀតចេះតែភាសាខ្មែរ និងដឹងច្រើនអំពីវប្បធម៌ខ្មែរ ដូច្នេះពួកគេមានចំណាប់អារម្មណ៍អំពីអ្វីៗដែលមាននៅសហរដ្ឋអាមេរិក ហើយនេះគឺជាអ្វីដែលយើងមិនដែលនិយាយនោះទេ»។
សន្និសីទនេះមានសិក្ខាសាលាចំនួន ៤។ ទីមួយអំពីការស្វែងយល់អំពីអត្តសញ្ញាណខ្មែរ។ ទីពីរអំពីវិថីឆ្ពោះទៅរកភាពជោគជ័យ។ ទីបីអំពីការវាស់វែងអំពីភាពសុខចម្រុងចម្រើនរបស់ប្រទេសមួយ ហើយទីបួនគឺការថែរក្សាសុខភាពនៅក្នុងសហគមន៍ខ្មែរ។ នៅចុងបញ្ចប់នៃសិក្ខាសាលានីមួយៗ មានការពិភាក្សាសំណួរ និងចម្លើយ។
មេដឹកនាំសហគមន៍ អ្នកសិក្សារៀនសូត្រ អ្នកជំនាញ និងអ្នកមានវិជ្ជាជីវៈនានា ដែលភាគច្រើនជាពលរដ្ឋខ្មែរអាមេរិកាំង គឺជាអ្នកដែលនឹងចូលរួមថ្លែងនៅក្នុងសិក្ខាសាលាទាំងអស់ខាងលើនេះ។ នេះបើតាមការបញ្ជាក់របស់អ្នកស្រី នូ លក្ខិណា។ អ្នកស្រីបានសង្កត់ធ្ងន់ថា អ្នកស្រីបានលើកទឹកចិត្តអ្នករៀបចំកម្មវិធីដែលជានិស្សិតខ្មែរឲ្យអញ្ជើញ «ពលរដ្ឋខ្មែរដែលជាធនធាននៅក្នុងសហគមន៍»។
«ពលរដ្ឋខ្មែរយើងផ្ដល់តម្លៃឲ្យអ្នកខាងក្រៅច្រើនណាស់ តាំងពីអ្នកសិក្សាស្រាវជ្រាវ អ្នកជំនាញ និងអ្នកនយោបាយជាដើម ដែលធ្វើឲ្យយើងមិនបានចាប់អារម្មណ៍ចំពោះធនធានមនុស្សដែលយើងមានស្រាប់នៅក្នុងសហគមន៍...។ ដើម្បីឲ្យនិស្សិតស្គាល់ពីតម្លៃអត្តសញ្ញាណរបស់ខ្លួនជាខ្មែរ... ខ្ញុំចង់ឲ្យយុវជនក្មេងៗទាំងនេះរៀនពីគ្នាទៅវិញទៅមក»។
លោក Danny Chhay ដែលជាយុវជនខ្មែរអាមេរិកាំងពោរពេញដោយក្ដីសង្ឃឹមម្នាក់ នឹងធ្វើជាអ្នកថ្លែងសុន្ទរកថា និងជាអ្នកសម្របសម្រួលមួយរូបនៅក្នុងសន្និសីទនេះ។ ក្នុងនាមជាអ្នកសម្របសម្រួលមួយរូបនៃគណៈកម្មាធិការ «វិធីឆ្ពោះទៅភាពជោគជ័យ» លោកគិតថា វេទិកានេះមាន «សារៈសំខាន់ខ្លាំងណាស់» សម្រាប់ជីវិតរស់នៅប្រចាំថ្ងៃ និងសម្រាប់ជីវិតក្នុងការសិក្សាអប់រំ។
លោក Danny ដែលទើបតែបញ្ចប់ការសិក្សាថ្នាក់បរិញ្ញាបត្រផ្នែកចិត្តសាស្ត្រ និងសង្គមសាស្ត្រពីសាកលវិទ្យាល័យ California State University Long Beach គិតថា ក្នុងនាមជាពលរដ្ឋខ្មែរអាមេរិកាំងជំនាន់ទីពីរ លោកមានតួនាទីនៅក្នុងការរក្សាវប្បធម៌ និងអត្តសញ្ញាណខ្មែរ និងចែករំលែកជាមួយនឹងពលរដ្ឋខ្មែរអាមេរិកាំងជំនាន់ទីបី។
លោកបញ្ជាក់ដូច្នេះថា៖ «ខ្ញុំគិតថា ក្នុងនាមជាពលរដ្ឋខ្មែរអាមេរិកាំងជំនាន់ទីពីរ ខ្ញុំមានកាតព្វកិច្ចនៅក្នុងការចែករំលែកអ្វីដែលយ៉ាងហោចណាស់ខ្ញុំអាចរក្សាបាននូវវប្បធម៌ខ្មែរ ទោះបីជាខ្ញុំជាពលរដ្ឋខ្មែរអាមេរិកាំងក៏ដោយ ដើម្បីធ្វើឲ្យច្បាស់ថា វប្បធម៌ និងប្រវត្តិសាស្ត្រខ្មែរនៅគង់វង្ស»។
សន្និសីទនេះនឹងចាប់ផ្ដើមនៅម៉ោង ៨ ព្រឹក និងបញ្ចប់បន្ទាប់ពីការថ្លែងសុន្ទរកថាបញ្ចប់នៅម៉ោង ៨ និង ៤៥ នាទី យប់។ សំបុត្រចូលរួមមានតម្លៃ ១៥ ដុល្លារ ប៉ុន្តែ អ្នកចូលរួមអាចហូបអាហារពេលព្រឹក ពេលថ្ងៃត្រង់ និងពេលល្ងាច ដោយមិនគិតថ្លៃ រួមទាំងបានទទួលអាវយឺតតម្លៃ ១០ ដុល្លារផងដែរ។ នេះបើតាមការបញ្ជាក់របស់លោក Ethan Chhan។ លោកបន្ថែមថា សិស្សវិទ្យាល័យ និងកុមារអាយុក្រោម ១០ ឆ្នាំ អាចចូលរួមក្នុងវេទិកានេះ «ដោយឥតគិតថ្លៃ»។
មនុស្សប្រហែលពី ២ រយ ទៅ ៤ រយនាក់ ត្រូវគេរំពឹងថានឹងចូលរួមនៅក្នុងសន្និសីទពេញមួយថ្ងៃនេះ។ នេះបើតាមការបញ្ជាក់របស់អ្នកស្រី នូ លក្ខិណា។ អ្នកស្រីបានលើកទឹកចិត្តសិស្ស និស្សិតខ្មែរឲ្យចូលរួមឲ្យបានច្រើន។
«ចំណុចសំខាន់នៅក្នុងសន្និសីទនេះ គឺកុំឲ្យយុវជនខ្មែរក្មេងៗមានភាពខ្មាសអៀនចំពោះអត្តសញ្ញាណរបស់ខ្លួនជាខ្មែរ។ ខ្ញុំគិតថា យុវជនទាំងនេះមានភាពស្រពិចស្រពិលចំពោះអត្តសញ្ញាណរបស់ខ្លួន ហើយសន្និសីទដូចនេះផ្ដល់ឱកាសដល់ពួកគេឲ្យធ្វើការទំនាក់ទំនងប្រកបដោយផ្លែផ្កាជាមួយគ្នាទៅវិញទៅមក និងមើលគំរូតាមពលរដ្ឋខ្មែរអាមេរិកាំងដែលជាគំរូ»៕
