អង្គបុរេជំនុំជម្រះរបស់សាលាក្ដីខ្មែរក្រហមនឹងបើកសវនាការជាលើកដំបូងក្នុងសំណុំរឿង០០៣ ដ៏ចម្រូងចម្រាសទាក់ទិននឹងអតីតមេបញ្ជាការជើងទឹកខ្មែរក្រហម លោកមាស មុត នៅចុងខែវិច្ឆិកាខាងមុខ។ នេះគឺជាសវនាការបិទទ្វារដើម្បីស្ដាប់ទឡ្ហីករណ៍របស់ភាគីនានាដែលបានដាក់បណ្ដឹងឧទ្ធរណ៍ប្រឆាំងនឹងដីកាដំណោះស្រាយដែលចេញដោយសហចៅក្រមអន្តរជាតិកាលពីឆ្នាំ២០១៨ និងប្រឆាំងនឹងដីកាលើកលែងការចោទប្រកាន់លើ មាស មុត របស់សហចៅក្រមស៊ើបអង្កេតជាតិកាលពីឆ្នាំ២០១៨ដដែលនោះ។
លោក មាស មុត អាយុ៨១ ឆ្នាំ ជាប់ចោទពីបទឧក្រិដ្ឋកម្មប្រឆាំងមនុស្សជាតិនិងបទឧក្រិដ្ឋមួយចំនួនទៀតទាក់ទងនឹងអំពើឃោរឃៅ និងការធ្វើវិសុទ្ធិកម្មទាហានរបស់ខ្លួនផ្ទាល់ និងសម្លាប់ជនបរទេសដែលចាប់បាននៅដែនសមុទ្រកម្ពុជា។
យោងតាមសេចក្ដីប្រកាសព័ត៌មានរបស់សាលាក្ដីខ្មែរក្រហម នៅថ្ងៃព្រហស្បតិ៍នេះ ការធ្វើសវនាការស្ដីពីបណ្ដឹងឧទ្ធរណ៍នេះនឹងធ្វើឡើងនៅថ្ងៃទី២៧ ទី២៨ និងថ្ងៃទី២៩ ខែវិច្ឆិកា ឆ្នាំ២០១៩។ នោះគឺជាសវនាការបិទទ្វារ ដែលនឹងមិនអនុញ្ញាតឲ្យមានការចូលរួមស្ដាប់ពីសាធារណជននោះទេ។
នេះគឺជាសវនាការលើកដំបូងក្នុងសំណុំរឿង០០៣ បន្ទាប់ពីសហចៅក្រមកម្ពុជានិងសហចៅក្រមអន្តរជាតិបានបង្ហាញគំនិតខ្វែងគ្នាចំពោះសំណុំរឿងនេះ។
សហចៅក្រមអន្តរជាតិបានសម្រេចធ្វើការចោទប្រកាន់លោក មាស មុត។ ប៉ុន្តែសហចៅក្រមស៊ើបអង្កេតកម្ពុជាសម្រេចធ្វើការលើកលែងការចោទប្រកាន់ អតីតកម្មាភិបាលជាន់ខ្ពស់ខ្មែរក្រហមរូបនេះ។
លោក មាស មុត ក្នុងពេលនេះ មិនទាន់ត្រូវបានចាប់ខ្លួននៅឡើយ៕
