គណបក្សប្រជាជនកម្ពុជារបស់លោកនាយករដ្ឋមន្រ្តី ហ៊ុន សែនចេញសេចក្តីថ្លែងការណ៍មួយ បដិសេធនូវឯកសារដែលត្រូវបានចែករំលែកលើទំព័រហ្វេសប៊ុករបស់លោក សម រង្ស៊ី មេដឹកនាំគណបក្សប្រឆាំង ដោយប្រកាសថា ជាឯកសារក្លែងក្លាយ ប្រើរូបភាពជា«សេចក្តីថ្លែងការណ៍របស់គណបក្សប្រជាជនកម្ពុជា» ក្នុងគោលបំណងបំបែកបំបាក់គណបក្សកាន់អំណាច និងបង្កភាពវឹកវរក្នុងសង្គម។
សេចក្តីថ្លែងការណ៍របស់គណបក្សប្រជាជនកម្ពុជាចេញនៅថ្ងៃទី៨ខែកុម្ភៈឆ្នាំ២០១៩និងត្រូវបានបង្ហោះលើគេហទំព័ររបស់គណបក្សនេះ បញ្ជាក់ថា គណបក្សប្រជាជនកម្ពុជាសូមប្រកាសបដិសេធ និងទាត់ចោលទាំងស្រុងនូវឯកសារក្លែងក្លាយ ដោយប្រើរូបភាពជា«សេចក្តីថ្លែងការណ៍របស់គណបក្សប្រជាជនកម្ពុជា» ចុះថ្ងៃទី៧ខែកុម្ភៈឆ្នាំ២០១៩ ដែលត្រូវបានបង្ហោះលើគណនីហ្វេសប៊ុកឈ្មោះ«អ្នកស្នេហាជាតិ គណបក្សប្រជាជនកម្ពុជា» និងទំព័រហ្វេសប៊ុកឈ្មោះ«Ar Kambang Knong Ar Kambang» ហើយត្រូវបានចែកចាយបន្តដោយលោកសម រង្ស៊ី។
សេចក្តីថ្លែងការណ៍របស់គណបក្សកាន់អំណាចនោះបន្ថែមថា ការចែកចាយបន្តនូវសេចក្តីថ្លែងការណ៍នោះគឺក្នុងគោលបំណងញុះញង់ បំបែកបំបាក់គណបក្សប្រជាជនកម្ពុជា បង្កភាពវឹកវរក្នុងសង្គម និងបំផ្លាញដំណើរការអភិវឌ្ឍប្រទេសជាតិ។
គណបក្សប្រជាជនកម្ពុជាបញ្ជាក់ក្នុងសេចក្តីថ្លែងការណ៍បដិសេធនោះតាមន័យដើមថា៖
«គណបក្សប្រជាជនកម្ពុជាថ្កោលទោសយ៉ាងដាច់អហង្ការចំពោះទង្វើឧក្រិដ្ឋដ៏ធ្ងន់ធ្ងរនេះ និងសូមប្តឹងដល់ស្ថាប័នមានសមត្ថកិច្ច ឲ្យចាត់វិធានការជាបន្ទាន់ដើម្បីវែកមុខរកជនដែលពាក់ព័ន្ធនឹងបទល្មើសខាងលើ និងចាប់យកមកផ្តន្ទាទោសឲ្យបានម៉ឺងម៉ាត់បំផុតតាមច្បាប់ជាធរមាន»។
ការចេញសេចក្តីថ្លែងការណ៍របស់គណបក្សប្រជាជនកម្ពុជានៅថ្ងៃសុក្រនេះធ្វើឡើងបន្ទាប់ពីលោកសម រង្ស៊ី មេដឹកនាំគណបក្សប្រឆាំងដែលកំពុងស្ថិតនៅក្រៅប្រទេស ចែករំលែកសេចក្តីថ្លែងការណ៍មួយដែលបញ្ជាក់ថា ជាសេចក្តីថ្លែងការណ៍របស់គណបក្សប្រជាជនកម្ពុជា ចេញនៅថ្ងៃទី៧ខែកុម្ភៈ និងត្រូវបានបង្ហោះដោយគណនីហ្វេសប៊ុកឈ្មោះ«អ្នកស្នេហាជាតិគណបក្សប្រជាជនកម្ពុជា»។
VOA បានព្យាយាមសុំការអត្ថាធិប្បាយពីលោកសម រង្ស៊ី តែរហូតមកដល់ល្ងាចថ្ងៃសុក្រនេះមិនមានការឆ្លើយតបនៅឡើយ។
សេចក្តីថ្លែងការណ៍ដែលសរសេរថា ជារបស់គណបក្សប្រជាជនកម្ពុជា និងមានត្រាជាសញ្ញាគណបក្សប្រជាជនកម្ពុជាចេញនៅថ្ងៃទី៧ខែកុម្ភៈ និងត្រូវបានលោក សម រង្ស៊ីចែកចាយបន្តនៅថ្ងៃទី៨ខែកុម្ភៈនេះ បញ្ជាក់ថា ជាសេចក្តីថ្លែងការណ៍សរសេរដោយអ្នកស្នេហាជាតិក្នុងជួរថ្នាក់ដឹកនាំគណបក្សប្រជាជនកម្ពុជាដែលបានបង្ហាញពីការខកចិត្ត និងព្រួយបារម្ភចំពោះទង្វើផ្តាច់ការនិងក្បត់ជាតិរបស់លោកនាយករដ្ឋមន្រ្តីហ៊ុន សែន។
សេចក្តីថ្លែងការណ៍ដែលគណបក្សប្រជាជនកម្ពុជារបស់លោកនាយករដ្ឋមន្រ្តី ហ៊ុន សែន ហៅថា ជាឯកសារក្លែងក្លាយនោះ សរសេរក្នុងន័យដើមថា៖
«ទោះជាពួកយើងមិនទាន់បញ្ចេញឈ្មោះនៅឡើយពេលនេះ តែពួកយើងនឹងដឹកនាំកម្លាំងផ្ទៃក្នុងគណបក្សប្រជាជនកម្ពុជាដ៏ច្រើនលើសលប់ដើម្បីមករួមកម្លាំងជាមួយអ្នកស្នេហាជាតិ អ្នកប្រជាធិបតេយ្យ ហើយអ្នកដែលស្រឡាញ់សេរីភាព និងយុត្តិធម៌ទាំងអស់ ដើម្បីជំរុញឲ្យមានការផ្លាស់ប្តូរជាវិជ្ជមាននៅក្នុងឆ្នាំ២០១៩នេះ»។
ក្រៅពីបង្ហោះលើគណនីហ្វេសប៊ុករបស់ខ្លួន ម្ចាស់គណនីហ្វេសប៊ុកដែលមានឈ្មោះថា«អ្នកស្នេហាជាតិគណបក្សប្រជាជនកម្ពុជា»ក៏បានចែករំលែកនៅខាងក្រោមព័ត៌មានជាច្រើនដែលបង្ហោះដោយទំព័រហ្វេសប៊ុករបស់គណបក្សប្រជាជនកម្ពុជាផងដែរ។
នាយឧត្តមសេនីយ៍ខៀវ សុភ័គ អ្នកនាំពាក្យក្រសួងមហាផ្ទៃ បានប្រាប់ VOA នារសៀលថ្ងៃសុក្រនេះថា សេចក្តីថ្លែងការណ៍ដែលត្រូវបានចែករំលែកលើទំព័រហ្វេសប៊ុករបស់លោក សម រង្ស៊ី គឺជាផ្នែកមួយនៃគម្រោងចូលមកកម្ពុជាវិញ ដែលលោកសម រង្ស៊ីកំពុងរៀបចំ។ លោកបន្ថែមថា សេចក្តីថ្លែងការណ៍នេះក៏ជាបន្ទុកកាន់តែធ្ងន់ក្នុងការដាក់ទោសលោកសម រង្ស៊ីផងដែរ។
លោកមានប្រសាសន៍ថា៖
«នេះគ្រាន់តែជាសកម្មភាពមួយដែលបម្រើឲ្យយុទ្ធនាការវិលត្រឡប់ចូលស្រុកវិញរបស់ សម រង្ស៊ី ប៉ុណ្ណឹងទេ។ ហើយអ្វីៗទាំងអស់វាស្ថិតនៅក្នុងកន្រ្តកហ្នឹងឯង។ ហើយជាការណ៍ពិតណាស់ នៅពេល សម រង្ស៊ី ត្រឡប់មកចូលស្រុក យើងនឹងមានវិធានការដូចបានប្រកាសមុនហើយ គ្មានអីក្រៅពីការអនុវត្តច្បាប់ទេ មានន័យថា គាត់នឹងត្រូវបានសមត្ថកិច្ចរបស់យើងចាប់ទៅតាមការអនុញ្ញាតរបស់ដីកាចាប់ខ្លួន ព្រោះគាត់ជាទណ្ឌិតស្រាប់ បញ្ជូនគាត់ទៅកាន់ពន្ធនាគារណាមួយ»។
លោកបណ្ឌិតឡៅ ម៉ុងហៃ អ្នកវិភាគនយោបាយឯករាជ្យប្រាប់ VOA ថា នេះមិនមែនជាលើកទីមួយទេដែលអ្នកនយោបាយ ទាំងអ្នកកាន់អំណាច និងអ្នកប្រឆាំងនៅកម្ពុជា ប្រើប្រាស់ព័ត៌មានក្លែងក្លាយដើម្បីទទួលបានផលចំណេញនយោបាយរៀងៗខ្លួន។ ទោះយ៉ាងណាលោកថា អ្នកនយោបាយមិនគួរប្រើប្រាស់ព័ត៌មានក្លែងក្លាយដើម្បីទទួលបានផលចំណេញនយោបាយ ហើយធ្វើឲ្យមានភាពច្របូកច្របល់ក្នុងសង្គមនោះទេ។
អ្នកវិភាគចាស់វស្សារូបនេះបញ្ជាក់ថា៖
«ដើម្បីឲ្យសម្តីយើងចេញទៅវាមានតម្លៃ ហើយគេទទួលយក គេស្តាប់នោះ លុះត្រាតែព័ត៌មានដែលយើងនិយាយទៅហ្នឹងវាពិត។ ម្ល៉ោះហើយដូចក្នុងបរិបទសព្វថ្ងៃនេះធ្វើឲ្យប្រជាពលរដ្ឋ មតិមហាជនហ្នឹងកាន់តែច្របូកច្របល់ទៅ»។
លោក សម រង្ស៊ី មេដឹកនាំគណបក្សប្រឆាំង បានចាកចេញពីប្រទេសកម្ពុជាចាប់តាំងពីឆ្នាំ២០១៦ បន្ទាប់ពីលោករងបណ្តឹងជាច្រើនករណីដែលប្តឹងដោយមេដឹកនាំជាន់ខ្ពស់របស់រដ្ឋាភិបាល ដែលរួមទាំងបណ្តឹងរបស់លោកនាយករដ្ឋមន្ត្រី ហ៊ុន សែនផងដែរ។
ថ្មីៗនេះ លោក សម រង្ស៊ី បានប្រកាសគម្រោងចូលមកកម្ពុជាវិញដើម្បីដណ្តើមអំណាចពីលោកនាយករដ្ឋមន្រ្តីហ៊ុន សែនក្នុងឆ្នាំ២០១៩នេះ ដោយមានទាំងការអំពាវនាវឲ្យពលរដ្ឋខ្មែរដែលកំពុងរស់នៅក្រៅប្រទេស ចូលមកកម្ពុជាវិញជាមួយលោកទៀតផង។ ខណៈលោក សម រង្ស៊ី ប្រកាសគម្រោងចូលស្រុកជាច្រើនដង នោះ គេឃើញមេដឹកនាំទាំងនគរបាល និងកងទ័ពបានប្រកាសត្រៀមកម្លាំងដើម្បីចាប់ខ្លួនលោកសម រង្ស៊ី ពេលដែលលោកចូលមកកម្ពុជាវិញ៕
