ក្រសួងព័ត៌មានបានសម្រេចលុបចោលអាជ្ញាបណ្ណសារព័ត៌មានរបស់លោក ផែង វណ្ណៈ ដែលតែងប្រើប្រាស់ប្រព័ន្ធសង្គមហ្វេសប៊ុកនិយាយអំពីបញ្ហាសង្គម ក្រោយលោកបានវាយប្រហារខ្លាំងៗ ទៅលើព្រះចៅអធិការវត្តមួយអង្គក្នុងខេត្តសៀមរាប ដែលដាក់ពិន័យវាយលោកនេន៣អង្គនឹងរំពាត់។
វីដេអូនៃការដាក់ទណ្ឌកម្មជាការវាយចំនួន ៥០ រំពាត់ លើលោកនេន ៣ អង្គ ដែលគង់នៅវត្តរាជបូណ៌ក្នុងខេត្តសៀមរាប ត្រូវបានចែករំលែកនៅថ្ងៃទី ១៤ ខែមីនា។ វីដេអូនេះត្រូវបានលោក ផែង វណ្ណៈ ដែលតែងតែរៀបរាប់បញ្ហាសង្គមតាមបណ្តាញសង្គមហ្វេសប៊ុក ជាមួយការបញ្ចេញមតិរបស់លោក យកមកវាយប្រហារខ្លាំងៗ រហូតដល់ប្រើពាក្យពេចន៍មួយចំនួន ដែលត្រូវបានរិះគន់ថា «ប្រមាថ» លើព្រះចៅអធិការវត្ត និង «អសីលធម៌»។
នៅក្នុងប្រកាសមួយចុះថ្ងៃទី១៨ ខែមីនា លោក ខៀវ កាញារីទ្ធ រដ្ឋមន្រ្តីក្រសួងព័ត៌មានបានប្រកាសលុបចោលអាជ្ញាបណ្ណដែលទទួលបាន កាលពីខែកញ្ញា ឆ្នាំ២០១៨ របស់លោក ផែង វណ្ណៈ ដែលជាអតីតមន្រ្តីយោធាម្នាក់នៃក្រសួងការពារជាតិ។
ការលុបចោលអាជ្ញាបណ្ណ ដែលមានគេហទំព័រ www.phengvannaknews.com ដោយក្រសួងអះអាងថា ម្ចាស់សារព័ត៌មាននេះបាន «ជេរប្រមាថចំពោះព្រះសង្ឃធ្វើឲ្យប៉ះពាល់យ៉ាងធ្ងន់ធ្ងរលើវិស័យព្រះពុទ្ធសាសនា ដែលជាសាសនារបស់រដ្ឋ ដែលជាការបំពានយ៉ាងធ្ងន់ធ្ងរលើវិជ្ជាជីវៈ និងកិច្ចសន្យាអាជីវកម្ម ដែលសាមីខ្លួនបានតម្កល់ទុកនៅក្រសួងព័ត៌មាន»។
មុននឹងមានចំណាត់ការដកអាជ្ញាបណ្ណពីក្រសួងព័ត៌មាន គណៈសង្ឃនាយកនៃសាលាគណខេត្តសៀមរាប បានស្នើឲ្យសម្តេចព្រះសង្ឃនាយកកម្ពុជា នន្ទ ង៉ែត ថ្កោលទោសលោក ផែង វណ្ណៈ ដោយថា លោកបានប្រមាថសមាជិកថេរសភាសង្ឃខេត្តនិងមន្រ្តីរដ្ឋបាលខេត្តសៀមរាប។
នៅក្នុងលិខិតមួយច្បាប់ ចុះថ្ងៃទី១៧ ខែមីនា គណៈសង្ឃបញ្ជាក់ថា ក្រុមការងារពាក់ព័ន្ធបានចុះទៅស្រាវជ្រាវនៅវត្តរាជបូណ៌ក្នុងខេត្តសៀមរាប ហើយយល់ថា ការវាយនឹងរំពត់នោះ «មានគោលបំណងសុចរិតធ្វើឡើង ដោយគ្រាន់តែជាការប្រៀនប្រដៅទៅតាមបទបញ្ញត្តិនៃបទបញ្ជាផ្ទៃក្នុងវត្តតែប៉ុណ្ណោះ»។ គណៈសង្ឃបន្ថែមថា ប៉ុន្តែអ្វីដែលគួរឲ្យសោកស្តាយបំផុត គឺបុគ្គលឈ្មោះ ផែង វណ្ណៈ បានផ្សព្វផ្សាយតាមបណ្តាញសង្គមវាយប្រហារថា «ប្រសិនបើវាយកូនខ្ញុំបែបនេះ ខ្ញុំអត់ទៅប្តឹងទេ ខ្ញុំទៅបាញ់ចោលតែម្តងចំពោះអ្នកប្រព្រឹត្ត»។
គណៈសង្ឃឲ្យដឹងទៀតថា៖ «មិនត្រឹមតែប៉ុណ្ណោះ បុគ្គលរូបនេះមានការជេរប្រមាថមើលងាយដល់មន្រ្តីរាជការអាជ្ញាធរខេត្តសៀមរាបយ៉ាងធ្ងន់ធ្ងរថែមទៀតផង ដោយពោលពាក្យថា ចង់យកផ្តៅវាយក្បាលម្នាក់បីផ្តៅទៀតផង»។
ក្រោយមានការរិះគន់ជាបន្តបន្ទាប់លើបណ្តាញសង្គមហ្វេសប៊ុក លោក ផែង វណ្ណៈ បានបង្ហាះលិខិតសុំទោសមួយច្បាប់នៅលើហ្វេសប៊ុកផ្លូវការរបស់លោកដែលមានអ្នកចុចl ikes ជាង ៥៧ ម៉ឺននាក់។ លោកលើកឡើងថា លោកបានទទួលវីដេអូនៃការវាយលោកនេន និងរូបថតស្នាមរបួស ពីប្រជាពលរដ្ឋម្នាក់ កាលពីថ្ងៃទី ១៤ ខែមីនា ហើយលោកបានផ្សាយវាយប្រហារការដាក់ទណ្ឌកម្មនេះ។
លោក ផែង វណ្ណៈ ពន្យល់ថាការផ្សាយនោះ ដោយសារលោកមាន «ចិត្តអាណិតអាសូរ» ដល់ជនរងគ្រោះ ប៉ុន្តែលោកថា លោក «មិនបានយល់ដឹងពីវិន័យផ្ទៃក្នុងរបស់ព្រះសង្ឃ» ដែលតម្រូវឲ្យអប់រំដោយវាយនឹងរំពាត់។
នៅក្នុងលិខិតសុំទោសនោះ លោក ផែង វណ្ណៈ ឲ្យដឹងទៀតថា លោកបានរិះគន់ខ្លាំងៗទៅលើមន្រ្តីមួយចំនួនដែលចុះទៅសម្របសម្រួលនិងព្រះចៅអធិការវត្ត រហូតប្រើ «ពាក្យប្រមាថធ្ងន់ធ្ងរ» ទៅលើបុគ្គលសង្ឃអង្គនោះ។
លោក ផែង វណ្ណៈ បញ្ជាក់ថា៖ «ការរិះគន់និងប្រមាថទៅលើបុគ្គលសង្ឃដែលប្រព្រឹត្តអំពើហិង្សានោះ ខ្ញុំបាទមិនមានចេតនាប្រមាថព្រះសង្ឃគ្រប់អង្គទូទាំងប្រទេស ឬធ្វើឲ្យប៉ះពាល់ដល់ព្រះពុទ្ធសាសនាទេ ដោយគ្រាន់តែចង់បានយុត្តិធម៌សម្រាប់ជនរងគ្រោះតែប៉ុណ្ណោះ»។
នៅក្នុងការផ្សព្វផ្សាយព័ត៌មានតាមហ្វេសប៊ុករបស់លោកផ្ទាល់ កាលពីល្ងាចថ្ងៃទី ១៨ ខែមីនា លោក ផែង វណ្ណៈ ថ្លែងថា លោកទទួលយកនូវការសម្រេចរបស់ក្រសួងព័ត៌មានក្នុងការដកអាជ្ញាបណ្ណសារព័ត៌មានរបស់លោក ជាចំណាត់ការ «ដ៏ត្រឹមត្រូវ»។
លោកមានប្រសាសន៍ថា៖ «ដោយខ្ញុំទទួលស្គាល់ថាអ្វីដែលក្រសួងបានសម្រេចលុបអាជ្ញាបណ្ណនេះ គឺជារឿងត្រឹមត្រូវ។ ដោយសារខ្ញុំបាននិយាយខុស និយាយលើសទៅអ្វីដែលបានសន្យានៅក្នុងពេលដែលយើងស្នើសុំបង្កើតគេហទំព័រ»។
លោកបន្ថែមថា លោកទទួលកំហុស ហើយប្រុងប្រយ័ត្នក្នុងការនិយាយស្តីនៅពេលក្រោយទៀត។
លោកបញ្ជាក់បន្ថែមថា៖ «អញ្ចឹងយើងនិយាយលើស កាលណានិយាយលើសវាប៉ះពាល់ដល់សាសនាដល់ព្រះសង្ឃអីចឹង អញ្ចឹងក្រសួងចាត់វិធានការគឺលុបអាជ្ញាបណ្ណ។ ហើយខ្ញុំសង្ឃឹមថា ទាំងព្រះគ្រូចៅអធិការវត្ត ក៏ដូចជាព្រះមេគណខេត្តសៀមរាប នឹងយោគយល់ អត់ឱនដល់ខ្ញុំបាទ ហើយខ្ញុំបាទសូមសន្យាថា ចាប់ពីថ្ងៃនេះតទៅ នឹងមិននិយាយអ្វីឲ្យប៉ះពាល់ទៅដល់ព្រះសង្ឃតទៅទៀតឡើយ»។
ព្រះចៅអធិការវត្តរាជបូណ៌ ព្រះអង្គ ពិន សែម ព្រះជន្ម ៨១ វស្សា និងបានបួសជាព្រះសង្ឃជិត ៦០ ឆ្នាំមកហើយ មានសង្ឃដីកាថា លោកនេនទាំង ៣ អង្គ ដែលរងទណ្ឌកម្មនៃការវាយនឹងរំពាត់ម្នាក់ ៥០ រំពាត់នោះ បានប្រព្រឹត្ត «ខុសច្រើនដង» ដែលព្រះអង្គសុំមិនបង្ហាញទោសកំហុសទាំងនោះ។ ព្រះអង្គចាត់ទុកកំហុសរបស់កូននេន «ជាការរឹងត្អឹង» ហើយការវាយនឹងរំពាត់នោះ ជំនួសឲ្យការមិនបណ្តេញចេញពីវត្ត ដែលមានសង្ឃប្រមាណ ១៤០ អង្គគង់នៅរហូតមកដល់ពេលនេះ។
ព្រះអង្គមានសង្ឃដីកាប្រាប់ VOA នៅថ្ងៃសុក្រនេះថា៖ «បើសិនណាជាលោកអត់មក អាត្មាត្រូវឲ្យលោកចេញពីវត្តហ្នឹង។ ហើយដល់តែលោកមក គ្រាន់តែទូន្មាន ដកអារឹងត្អឹងហ្នឹងបន្តិច»។
ព្រះអង្គបន្ថែមថា បើសិនព្រះអង្គសម្រេចដេញកូននេនចេញពីវត្ត នោះ «ដូចជាធ្ងន់ពេក»។ ព្រះអង្គបញ្ជាក់ថា ការវាយកំប៉េះគូទនឹងរំពាត់ មិនមែនប្រើទៅ «តាមកំហឹងចិត្ត» នោះទេ ហើយព្រះពុទ្ធចាត់ទុកថា នេះជាការទូន្មានមួយ បើទោះសព្វថ្ងៃមានការយល់ឃើញថាជា «ហិង្សា» ក៏ដោយ។
ព្រះចៅអធិការវត្តបញ្ជាក់ថា៖ «បានថា អាត្មាថា គេជេរការស្តី ការវ៉ៃនេះជាការដាស់តឿនក្រើនរំឭកទេ ទូន្មានទេ ឲ្យរាងចាល ឲ្យឈប់»។
លោក អ៊ិត សូធឿត នាយកផ្នែកប្រព័ន្ធផ្សព្វផ្សាយនៃមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យមានប្រសាសន៍ថា ការដកអាជ្ញាបណ្ណសារព័ត៌មាន «ងាយស្រួលបែបនេះ» ជាការគំរាមកំហែងមួយដល់សារព័ត៌មានផ្សេងទៀត។ លោកបន្ថែមថា ដើម្បីធានាសេរីភាពសារព័ត៌មានមិនគួរចាត់វិធានការដល់ថ្នាក់ដកអាជ្ញាបណ្ណនោះទេ។
លោកមានប្រសាសន៍ថា៖ «ព្រោះថាការដកអាជ្ញាបណ្ណសារព័ត៌មាននេះ វាអាចទៅជាការគំរាមកំហែង ក៏ដូចជាដាក់សម្ពាធផ្លូវចិត្តទៅលើអ្នកសារព័ត៌មានផ្សេងទៀត ក៏ដូចជាស្ថាប័នសារព័ត៌មានផ្សេងទៀតក្នុងការរិះគន់ ក៏ដូចជាបង្ហាញចំណុចខ្សោយរបស់រដ្ឋាភិបាល នៅពេលដែលការដកអាជ្ញាបណ្ណនេះ វាកើតឡើងដោយងាយស្រួលបែបនេះ»។
លោក អ៊ិត សូធឿត បន្ថែមថាក្រសួងព័ត៌មានគួរបង្កើតវគ្គបណ្តុះបណ្តាលឲ្យកាន់តែច្រើនដល់អ្នកសារព័ត៌មាន ដែលក្រសួងមើលឃើញថានៅមានភាពខ្វះខាតផ្នែកក្រមសីលធម៌៕
