ក្រុមអ្នករៀបចំពិធីបុណ្យមួយក្នុងប្រទេសបារាំង បានបញ្ជាក់ឲ្យដឹងថា កម្មវិធីបុណ្យផ្កាដែលពលរដ្ឋខ្មែរនៅសហភាពអឺរ៉ុប គ្រោងនឹងរៀបចំធ្វើនៅចុងសប្តាហ៍នេះ ក្នុងវត្តមួយក្នុងទីក្រុងប៉ារីស ត្រូវប្រកាសលុបចោលវិញ ដោយយោងតាមបម្រាមរបស់រដ្ឋាភិបាលបារាំង មិនឲ្យមានការជួបប្រជុំគ្នា ក្នុងគោលដៅទប់ស្កាត់ការរីករាលដាលនៃវីរុសកូរ៉ូណា ឬ កូវីដ១៩ ដែលកំពុងរីករាលដាលខ្លាំងនៅសហភាពអឺរ៉ុប។ នេះបើតាមការជូនដំណឹងពីអ្នករៀបចំកម្មវិធី។
កម្មវិធីបុណ្យផ្កាដែលផ្តួចផ្តើមគំនិតពីសហគមន៍ខ្មែរនៅក្នុងទីក្រុងប៉ារីស ហើយត្រូវគេគ្រោងធ្វើនៅថ្ងៃទី២២ ខែមីនា ក្នុងវត្តពោធិវង្សដោយមានក្រុមពលរដ្ឋខ្មែរនៅប្រទេស អាល្លឺម៉ង់ និងប្រទេសហូឡង់ចូលរួមផងដែរ។ នៅក្នុងសេចក្តីជូនដំណឹងដែល VOA ទទួលបានកាលពីថ្ងៃចន្ទបានបញ្ជាក់ថា៖ «យោងតាមបម្រាមរបស់រដ្ឋាភិបាលបារាំង មិនឲ្យប្រជុំគ្នាច្រើន គណៈកម្មាធិការនៃវត្តពោធិវង្សបានសម្រេចក្នុងអង្គប្រជុំថ្ងៃទី១៥ ខែមីនា ឆ្នាំ២០២០ផ្អាករាល់កម្មវិធីបុណ្យក្នុងបរិវេណវត្ត រួមទាំងពិធីបុណ្យផ្កាដែលយើងខ្ញុំគ្រោងធ្វើនៅថ្ងៃទី២២ មីនា ឆ្នាំ ២០២០ ផងដែរ»។ ពិធីបុណ្យផ្កាដែលត្រូវលុបចោលគ្មានការកំណត់នេះ ធ្វើឡើងដើម្បីប្រមូលថវិកាជួយដោះស្រាយការលំបាកនៃជីវភាពជនរងគ្រោះអំពីអំពើអយុត្តិធម៌នៃកម្ពុជាបច្ចុប្បន្ន។ គេគ្មានឃើញការបញ្ជាក់ពិស្តារអំពីជនរងគ្រោះទាំងនោះទេ៕
