រដ្ឋាភិបាលកម្ពុជា បានបង្កើតកម្មវិធីថ្មីមួយ ឈ្មោះថា សាលាជំនាន់ថ្មី ដោយផ្ដោតទៅលើមុខវិជ្ជាវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា ដែលគេស្គាល់ថា STEM ដើម្បីជំរុញឲ្យមានអ្នកជំនាញខាងវិទ្យាសាស្ត្រច្រើនថែមទៀតនៅកម្ពុជា។
ប៉ុន្តែ អ្នកជំនាញលើកឡើងថា រដ្ឋាភិបាល ចាំបាច់ត្រូវផ្សព្វផ្សាយកម្មវិធីថ្មីរបស់ខ្លួននេះ ឲ្យបានទូលំទូលាយជាងមុន ដើម្បីសម្រេចគោលដៅនេះបាន។
ជំនាញសំខាន់ទាំង៤នេះ បានក្លាយជាអាទិភាពក្នុងវិស័យអប់រំកម្ពុជា ដើម្បីបណ្តុះបណ្តាលធនធានមនុស្សផ្នែក STEM សម្រាប់ការអភិវឌ្ឍសេដ្ឋកិច្ច និងបច្ចេកវិទ្យាកម្ពុជានាពេលអនាគត។
ការផ្ដល់អាទិភាពអប់រំផ្នែកSTEMនាពេលបច្ចុប្បន្ននេះ គឺធ្វើឡើងស្របតាមគោលនយោបាយអភិវឌ្ឍ STEMរបស់រដ្ឋាភិបាលកម្ពុជានាដើមឆ្នាំ២០១៦។ នេះបើតាមការឲ្យដឹងពីលោក រស់ សាលីន អ្នកនាំពាក្យក្រសួងអប់រំ យុវជន និងកីឡា បញ្ជាក់ប្រាប់ VOA កាលពីសប្ដាហ៍កន្លងទៅ។
កាលពីខែមិថុនាកន្លងទៅ ក្រសួងអប់រំ បានបង្កើតកម្មវិធីសាលាជំនាន់ថ្មី នៅក្នុងវិទ្យាល័យព្រះស៊ីសុវត្ថិ ដើម្បីបណ្ដុះបណ្ដាលមូលដ្ឋានគ្រឹះឯកទេសSTEM ដល់យុវជនកម្ពុជា។
សាលារៀនជំនាន់ថ្មី គឺកម្មវិធីដែលមានប្រព័ន្ធគ្រប់គ្រង និងការបណ្ដុះបណ្ដាលបែបទំនើប ដោយបំពាក់សម្ភារៈ និងកន្លែងពិសោធ ដល់សិស្សដែលរៀនមុខវិជ្ជាSTEM។នេះយោងតាមមន្ត្រីអប់រំ។
លោក រស់ សាលីន បញ្ជាក់ប្រាប់ VOA យ៉ាងដូច្នេះ៖ «សិស្សានុសិស្ស ចេញពីថ្នាក់STEM ចេញទៅគាត់ជាអ្នកពូកែ។ បើគាត់ជាអ្នកពូកែ បើគាត់រៀនគីមី គាត់ក្លាយជាវិស្វករគីមីចំណីអាហារ អ្នកផលិតគីមី អ្នករៀបចំធ្វើអាតូមិចជាដើមចឹងទៅ។ បើរូបវិទ្យា ពួកគាត់ក្លាយជាអ្នកធ្វើគ្រឿងអគ្គីសនី។ អ្នកខាង ICT ចេញមកគឺខាងធ្វើProgramming ធ្វើកំព្យូទ័រ។ ចឹងកាលណាយើងពង្រីកថ្នាក់STEMនេះ អ្នកចេញពីថ្នាក់STEMហ្នឹងហើយដែលជាអ្នកធ្វើការជំនាញជាន់ខ្ពស់»។
លោក រស់ សាលីន ឲ្យដឹងថាក្រសួងអប់រំ គ្រោងនឹងពង្រីកគម្រោងនេះទៅកាន់សាលាផ្សេងៗ និងតាមបណ្ដាខេត្តនាពេលខាងមុខទៅតាមលទ្ធភាពដែលក្រសួងអាចធ្វើបាន។
លោកបន្ថែមថា ការសិក្សាកន្លងមក រកឃើញថា គិតត្រឹមឆ្នាំ២០១៥នេះ កម្ពុជាត្រូវការអ្នកឯកទេសផ្នែក STEMរហូតដល់ចំនួន៦ម៉ឺន៥ពាន់នាក់ ក៏ប៉ុន្តែលោកថាធនធានSTEMនៅកម្ពុជាជាសរុប មានតែជាង១ម៉ឺននាក់ប៉ុណ្ណោះ។
«យោងតាមការអភិវឌ្ឍសេដ្ឋកិច្ច យោងលើការកំណត់គោលនយោបាយនៃការអភិវឌ្ឍវិស័យឧស្សាហកម្មកម្ពុជា ពង្រីកផ្នែកឧស្សាហកម្ម ធុនធ្ងន់ មធ្យម និងស្រាល និងឧស្សាហកម្មកែច្នៃ។ ចឹងទេ បើមិនរៀបចំអភិវឌ្ឍពីឥឡូវទៅ ពេលនោះរឹតតែខ្វះខាតទៀត។ ចឹងទាមទារឲ្យយើងរៀបកម្លាំងពលកម្ម អប់រំ បណ្ដុះបណ្ដាលពីចម្ងាយ»។
លោក រស់ សាលីន ឲ្យដឹងទៀតថា ការចូលរួមរបស់យុវជនកម្ពុជាក្នុងជំនាញSTEMនេះ នឹងអាចជួយឲ្យកម្ពុជាមានលទ្ធភាពបង្កើតផលិតផលបច្ចេកវិទ្យារបស់កម្ពុជាដោយខ្លួនឯង។
«បើគាត់គិតថាឥឡូវគាត់រៀនពូកែខាងរូបវិទ្យា ចឹងគាត់ចូលថ្នាក់ STEM ថ្នាក់រូបវិទ្យាតែម្តង ពេលនោះ គាត់មានកន្លែងពិសោធន៍ គាត់មានគ្រូ គាត់មានអីតាំងពីថ្នាក់ក្រោមទៅ។ ចឹងទម្រាំដល់គាត់ចប់វិស្វករ គាត់នឹងក្លាយជាអ្នកល្បីផ្នែកហ្នឹងតែម្តង។ កិត្តិយសគាត់នឹងមាន គាត់នឹងល្បី គាត់ផលិតរថយន្ត គាត់ធ្វើទូរទស្សន៍ដោយខ្លួនឯង ឧទាហរណ៍។ ចឹងយើងហ្នឹងក្លាយជាប្រទេសមួយដែលមានBrand Name លើសេដ្ឋកិច្ចពិភពលោកដែរ ដោយសារការចូលរួមរបស់ប្អូនសិស្សានុសិស្ស»។
លោក ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡា ឲ្យដឹងកាលពីសប្ដាហ៍កន្លងទៅថាក្នុងមួយឆ្នាំៗ រដ្ឋាភិបាលកម្ពុជាវិនិយោគទឹកប្រាក់ប្រមាណ៣០ម៉ឺនដុល្លារសម្រាប់ហេដ្ឋារចនាសម្ព័ន្ធSTEM រាប់បញ្ចូលទាំងការជួសជុល និងសាងសង់បន្ទប់ពិសោធន៍ ការបំពាក់ប្រព័ន្ធកុំព្យូទ័រ និងឧបករណ៍នានា ដើម្បីពង្រឹងគុណភាពអប់រំSTEM និងធ្វើឲ្យបរិយាកាសសិក្សាមានភាពទាក់ទាញ។
លោក ផាន់ ប៊ុនណាត ប្រធានក្រុមគម្រោងសាលារៀនជំនាន់ថ្មី នៃអង្គការសកម្មភាពសម្រាប់បឋមសិក្សានៅកម្ពុជា ហៅថាខេបអះអាងថា ការអភិវឌ្ឍធនធានSTEM ជារឿងចាំបាច់ ជាពិសេសនៅពេលសមាហរណកម្មសេដ្ឋកិច្ចទាមទារឲ្យមានការប្រកួតប្រជែងធនធានមនុស្សក្នុងតំបន់។
«វាជារឿងត្រឹមត្រូវហើយចាំបាច់បំផុតក្នុងពេលបច្ចុប្បន្ន ដែលយើងត្រូវអនុវត្តកម្មវិធីSTEM នៅក្នុងកម្មវិធីសិក្សាតាំងពីថ្នាក់មធ្យមសិក្សាទៅ សមស្របនឹងការប្រកួតប្រជែងទៅលើបច្ចេកវិទ្យា។ ទាក់ទងនឹងកម្មវិធីSTEMហ្នឹង ជាមុខវិជ្ជាមួយដែលជួយជំរុញក្មេងៗឲ្យស្រលាញ់វិទ្យាសាស្ត្រ ដែលដើរតួនាទីសំខាន់ក្នុងការលើកស្ទួយសេដ្ឋកិច្ច និងទីផ្សារហ្នឹង គឺSTEMហ្នឹងសំខាន់បំផុត»។
លោក ផាន់ ប៊ុនណាត យល់ថាការផ្សព្វផ្សាយពីគោលនយោបាយ STEM ដ៏សំខាន់របស់រដ្ឋាភិបាលនេះ នៅតិចតួចនៅឡើយ។
«គោលនយោបាយSTEM ដែលក្រសួងទើបចេញឆ្នាំ២០១៦នេះក្តី វាជារឿងមួយថ្មី។ សម្រាប់ខ្ញុំដែលមើលឃើញថា រដ្ឋាភិបាលមិនទាន់បានធ្វើវាទូលំទូលាយ ឬផ្សព្វផ្សាយ ឲ្យទូលំទូលាយនៅឡើយទេ។ វាទាមទារពេលវេលា។ ខ្ញុំវាយតម្លៃខ្ពស់ទាក់ទងនឹងការបង្កើតគោលនយោបាយ STEM ហើយអ្វីដែលជាការស្នើសុំ ខ្ញុំគិតថាពេលខ្លះយើងមាគោលនយោបាយល្អ តែបើយើងអត់យកវាមកអនុវត្ត ក៏អត់មានន័យដែរ។ យើងនិយាយ STEMៗ ប៉ុន្តែគ្រូខ្លះ អត់ដឹងថាSTEMហ្នឹងអីគេផង។ ពេលខ្លះមានតែគោលនយោបាយមិនគ្រប់គ្រាន់ទេ នៅត្រូវការការអនុវត្ត យកវាទៅធ្វើផែនការសកម្មភាពឆ្លើយតបគោលនយោបាយ»។
ការស្រាវជ្រាវពីប្រទេសអភិវឌ្ឍន៍បង្ហាញថា ការអប់រំខាងវិទ្យាសាស្ត្រ បច្ចេកវិទ្យា វិស្វកម្ម និងគណិកវិទ្យាដែលគេស្គាល់ថា STEM Education ជំរុញឲ្យមានការច្នៃប្រឌិតថ្មី ដែលផ្ដល់ផលប្រយោជន៍ដល់ការវិនិយោគទុន ការអភិវឌ្ឍ ទំនើបកម្ម និងការបង្កើតឲ្យមានអ្នកវិទ្យាសាស្ត្រជំនាន់ថ្មីក្នុងប្រទេស៕
