គណៈរដ្ឋមន្ត្រីដែលដឹកនាំដោយលោកនាយករដ្ឋមន្ត្រី ហ៊ុន សែន នៅថ្ងៃសុក្រនេះ បានអនុម័តសេចក្តីព្រាងច្បាប់ធម្មនុញ្ញ ដែលជាការធ្វើវិសោធនកម្មរដ្ឋធម្មនុញ្ញកម្ពុជា។ ប៉ុន្តែព័ត៌មានលម្អិតថាតើមានការផ្លាស់ប្តូរមាត្រាណាខ្លះនៃរដ្ឋធម្មនុញ្ញ ដែលជាច្បាប់កំពូលរបស់ប្រទេស មិនទាន់ត្រូវបានបញ្ចេញនៅឡើយទេ។
លោក ផៃ ស៊ីផាន អ្នកនាំពាក្យរបស់រដ្ឋាភិបាលកម្ពុជា ឲ្យដឹងថា គណៈរដ្ឋមន្ត្រីបានសម្រេចអនុម័តទាំងស្រុងលើសេចក្តីព្រាងច្បាប់ធម្មនុញ្ញ។ ប៉ុន្តែខ្លឹមសារលម្អិតទាំងឡាយ ដែលពាក់ព័ន្ធការធ្វើវិសោធនកម្មច្បាប់រដ្ឋធម្មនុញ្ញ នឹងត្រូវបង្ហាញដោយរដ្ឋមន្ត្រីក្រសួងយុត្តិធម៌ ដែលត្រូវបានចាត់តាំងដោយនាយករដ្ឋមន្ត្រី ដើម្បីរៀបចំសន្និសីទសារព័ត៌មាន។
ទោះជាយ៉ាងណា លោក ផៃ ស៊ីផាន បញ្ជាក់ថា សេចក្តីព្រាងច្បាប់ធម្មនុញ្ញនេះ បង្កើតឡើង «ដើម្បីរក្សាប្រក្រតីភាពនៃការងាររដ្ឋបាល ក៏ដូចជាផលប្រយោជន៍ជាចាំបាច់របស់ប្រជាពលរដ្ឋ»។
លោក ជិន ម៉ាលីន អ្នកនាំពាក្យក្រសួងយុត្តិធម៌ ប្រាប់វីអូអេថា ក្រសួងនឹងជម្រាបជូនសាធារណជនអំពីកាលបរិច្ឆេទនៃសន្និសីទសារព័ត៌មាននៅពេលក្រោយ។ លោកបានបដិសេធមិនទាន់អត្ថាធិប្បាយអំពីខ្លឹមសារនៃសេចក្តីព្រាងច្បាប់នេះ។
សេចក្តីព្រាងច្បាប់នេះនឹងត្រូវត្រួតពិនិត្យ និងអនុម័តដោយរដ្ឋសភាដែលគ្រប់គ្រងដោយតំណាងរាស្ត្រមកពីគណបក្សប្រជាជនកម្ពុជាទាំងអស់។
បើតាមរដ្ឋធម្មនុញ្ញ ការផ្ដើមគំនិតសើរើ ឬការផ្ដើមគំនិតធ្វើវិសោធនកម្មរដ្ឋធម្មនុញ្ញជាសិទ្ធិរបស់ព្រះមហាក្សត្ររបស់នាយករដ្ឋមន្ត្រី និងរបស់ប្រធានរដ្ឋសភា តាមសេចក្ដីស្នើរបស់តំណាងរាស្ត្រមួយភាគបួន នៃចំនួនសមាជិករដ្ឋសភាទាំងមូល។ ការសើរើ ឬវិសោធនកម្មរដ្ឋធម្មនុញ្ញ ត្រូវធ្វើឡើងដោយច្បាប់ធម្មនុញ្ញមួយដែលអនុម័តដោយរដ្ឋសភា តាមមតិភាគច្រើនពីរភាគបីនៃចំនួនសមាជិករដ្ឋសភាទាំងមូល។
គួរបញ្ជាក់ថា រដ្ឋធម្មនុញ្ញកម្ពុជាត្រូវបានធ្វើវិសោធនកម្មចុងក្រោយកាលពីខែតុលា ឆ្នាំ ២០២១ ដោយកំណត់សញ្ជាតិខ្មែរតែមួយសម្រាប់ប្រធានរដ្ឋសភា ប្រធានព្រឹទ្ធសភា នាយករដ្ឋមន្ត្រី និងប្រធានក្រុមប្រឹក្សាធម្មនុញ្ញ។ វិសោធនកម្មរដ្ឋធម្មនុញ្ញចុងក្រោយនេះធ្វើឡើងតាមបញ្ជារបស់លោកនាយករដ្ឋមន្ត្រី ហ៊ុន សែន ដែលត្រូវបានមើលឃើញថា ជាគោលដៅប្រឆាំងនឹងលោក សម រង្ស៊ី មេដឹកនាំគណបក្សប្រឆាំង ដែលមានសញ្ជាតិខ្មែរ និងបារាំង៕
