ក្រសួងការបរទេសកម្ពុជា បានចាត់ទុកសេចក្ដីថ្លែងការណ៍របស់បេសកកម្មការទូតបរទេសមួយចំនួនទាក់ទិននឹងស្ថានភាពនយោបាយបច្ចុប្បន្ននៅកម្ពុជា ថា«ខ្វះចំណេះដឹង ឬធ្វើជាមិនដឹងអំពីក្រមព្រហ្មទណ្ឌ និងនីតិវិធីនៃក្រមព្រហ្មទណ្ឌរបស់ព្រះរាជាណាចក្រកម្ពុជា»។ នេះបើយោងតាមសេចក្ដីប្រកាសព័ត៌មានជាភាសាអង់គ្លេសរបស់ក្រសួងការបរទេស និងសហប្រតិបត្តិការអន្តរជាតិកម្ពុជា ដែល VOA ទទួលបាននៅថ្ងៃព្រហស្បតិ៍ ទី២ ខែមិថុនានេះ។
ប្រតិកម្មរបស់ក្រសួងការបរទេសកម្ពុជានេះកើតឡើង ក្រោយពីប្រតិភូសហភាពអឺរ៉ុបប្រចាំនៅកម្ពុជាបានចេញសេចក្ដីថ្លែងការណ៍មួយ កាលពីថ្ងៃទី៣០ ខែឧសភាកន្លងទៅនេះ ដោយអំពាវនាវឲ្យបញ្ឈប់ការយាយី ឬធ្វើទុក្ខបុកម្នេញខាងផ្លូវតុលាការទៅលើប្រធានស្ដីទីនៃគណបក្សសង្គ្រោះជាតិ គឺលោក កឹម សុខា និងមន្ត្រីអង្គការសង្គមស៊ីវិលដទៃទៀត។
សេចក្ដីថ្លែងការណ៍របស់សហភាពអឺរ៉ុបនេះ ក៏បានជំរុញឲ្យអាជ្ញាធរកម្ពុជាបន្តការសន្ទនាក្នុងន័យស្ថាបនា និងដោយសន្តិវិធីជាមួយគណបក្សប្រឆាំង ឲ្យបានឆាប់បំផុតតាមដែលអាចធ្វើទៅបាន ដោយសហភាពអឺរ៉ុបមើលឃើញថា ការធ្វើបែបនេះគឺជាលក្ខខណ្ឌដែលត្រូវតែមានរួចជាស្រេច សម្រាប់ភាពស្របច្បាប់នៃការបោះឆ្នោតនៅពេលខាងមុខនេះ។
ដោយមិនបញ្ជាក់ចំឈ្មោះអំពីស្ថានបេសកកម្មការទូតណាមួយដែលខ្លួនចង់សំដៅទៅរកនោះ ក្រសួងការបរទេសកម្ពុជាបានបង្ហាញការភ្ញាក់ផ្អើលនឹងប្រតិកម្មនៃបេសកកម្មការទូតនោះនៅក្នុងសេចក្ដីប្រកាសព័ត៌មានរបស់ខ្លួន ដោយចាត់ទុកប្រតិកម្មនោះ ថាជាការជ្រៀតជ្រែកកិច្ចការផ្ទៃក្នុងនៃរដ្ឋអធិបតេយ្យមួយ។
ក្រសួងការបរទេសកម្ពុជាបានលើកឡើងនៅក្នុងសេចក្ដីប្រកាសព័ត៌មាននោះថា «រដ្ឋអធិបតេយ្យនេះ គឺគ្រាន់តែអនុវត្តច្បាប់ និងធ្វើតាមនីតិវិធីច្បាប់ និងតុលាការដូចដែលត្រូវបានអនុវត្តនៅក្នុងរដ្ឋនានា ដែលបានបញ្ចេញប្រតិកម្មដូចខាងដើមនោះប៉ុណ្ណោះ»។
លោក កឹម សុខា អនុប្រធាន និងបច្ចុប្បន្នជាប្រធានស្ដីទីនៃគណបក្សសង្គ្រោះជាតិ កំពុងត្រូវបានបង្គាប់ឲ្យចូលខ្លួនទៅឆ្លើយបំភ្លឺនៅតុលាការក្នុងសំណុំរឿងក្ដីពាក់ព័ន្ធនឹងការចោទប្រកាន់មួយ ដែលគណបក្សប្រឆាំង និងអ្នកតាមដាននយោបាយមួយចំនួនចាត់ទុកថាជារឿងនយោបាយ។
អ្នកតំណាងរាស្ត្រ និងសកម្មជនគណបក្សប្រឆាំងព្រមទាំងមន្ត្រីអង្គការសង្គមស៊ីវិលជាច្រើននាក់ត្រូវបានចាប់ខ្លួន និងឃុំខ្លួនជាបន្តបន្ទាប់នៅក្នុងរយៈពេលថ្មីៗនេះ ខណៈដែលកម្ពុជាគ្រោងរៀបចំការបោះឆ្នោតឃុំសង្កាត់របស់ខ្លួន នៅពាក់កណ្តាលឆ្នាំក្រោយ និងការបោះឆ្នោតជាតិនៅឆ្នាំ២០១៨៕
