ភ្ជាប់​ទៅ​គេហទំព័រ​ទាក់ទង

រដ្ឋសភា​កម្ពុជា​ថា​ខ្លួន​សម្រេច​ករណី​លោក កឹម សុខា ដោយ​ឯករាជ្យ


រូបឯកសារ៖ ទិដ្ឋភាព​​ទូទៅ​​នៃ​ការប្រជុំ​រដ្ឋសភា​កម្ពុជា។

លោក ឡេង​ ប៉េង​ឡុង​ បាន​បន្ត​ថា​ ប្រសិន​បើ​ចង់​ឲ្យ​ស្ថាប័ន​តុលាការ​ផ្អាក​ការ​ចោទ​ លោក​ កឹម សុខា​ លុះ​ត្រា​តែ​លោក កឹម សុខា​​ ​ទទួល​បាន​​សំឡេង​ បី​ភាគបួន​នៅ​ក្នុង​សភា​ គឺ​ស្មើ​នឹង​អ្នកតំណាងរាស្ត្រ​ ៩៣​រូប។​ ​​​​​

មន្ត្រី​រដ្ឋសភា​ជាតិ​ ​និង​អ្នក​តំណាងរាស្ត្រ​នៃ​គណបក្ស​ប្រឆាំង​មាន​ការ​ខ្វែង​គំនិត​គ្នា​ចំពោះ​ការ​អនុញ្ញាត​របស់​សភា​ឲ្យ​តុលាការ​បន្ត​ចាត់​ការ​រឿង​ក្តី​លោក​ កឹម សុខា​ ប្រធាន​ស្តី​ទី​គណបក្ស​សង្គ្រោះ​ជាតិ​ នៅ​គ្រា​ដែល​ស្ថាប័ន​តុលាការ​ពុំ​ទាន់​អាច​បញ្ជាក់​ឲ្យ​ដឹង​បន្ថែម​ពី​ចំណាត់​ការ​របស់​ខ្លួន​ចំពោះ​លោក​ កឹម​ សុខា។​ ​

មន្ត្រី​សភា​ជាតិ​កម្ពុជា​ នៅ​ថ្ងៃ​ពុធ​នេះ បាន​ចេញ​សេចក្តី​ថ្លែង​ការណ៍​ ​ច្រានចោលការ​ចោទ​ប្រកាន់​របស់​ក្រុមអ្នក​តំណាងរាស្ត្រ​គណបក្ស​ប្រឆាំង​ ដែល​បាន​ថ្លែង​ថា​ ស្ថាប័ន​នីតិប្បញ្ញត្តិ​ នឹង​ពុំធ្វើ​កិច្ចការ​របស់​ខ្លួន​ដោយ​ឯករាជ្យ​ នៅ​មុន​ការ​សម្រេច​របស់​តំណាងរាស្ត្រ​គណបក្ស​គ្រប់គ្រង​ប្រទេស​ ដែល​បាន​អនុញ្ញាត​ឲ្យ​តុលាការ​បន្ត​នីតិវិធី​លើ​សំណុំ​រឿង​លោក​ កឹម សុខា អនុប្រធាន​គណបក្ស​សង្គ្រោះ​ជាតិ​កាល​ពី​ថ្ងៃ​ច័ន្ទ​កន្លងទៅ​នេះ។​

​នៅ​ក្នុង​សេចក្តី​ថ្លែង​ការណ៍​របស់​ខ្លួន​ចុះ​ថ្ងៃ​ទី​២៩​ ខែ​ឧសភា​ ឆ្នាំ​២០១៦​ ក្រុម​សមាជិក​សភា​គណបក្ស​សង្គ្រោះ​ជាតិ បាន​សើ្ន​សុំ​ឲ្យ​រដ្ឋសភា​ «ការពារ​អភ័យ​ឯកសិទ្ធិ​សភា​របស់​តំណាងរាស្ត្រ​ និង​ការពារ​តម្លៃ​របស់​ស្ថាប័ន​នីតិប្បញ្ញត្តិ​ ដោយ​មិន​ត្រូវ​ធ្វើ​អ្វី​រំលោភ​នីតិវិធី​ និង​ច្បាប់​ ជាពិសេស​ រំលោភ​លើ​រដ្ឋធម្មនុញ្ញ​ តាម​តែ​ការ​គាប​សង្កត់​បង្គាប់ បញ្ជា​ពី​ស្ថាប័ន​ផ្សេង​ ដែល​ផ្ទុយ​ពី​គោលការណ៍​នៃ​មាត្រា​ ៥១​ថ្មី​នៃ​រដ្ឋធម្មនុញ្ញ​ ដែល​ចែង​អំពី​អំណាច​បែងចែក​ដាច់​ពី​គ្នា​រវាង​អំណាច​នីតិប្បញ្ញត្តិ​ អំណាច​នីតិប្រតិបត្តិ ​និង​អំណាច​តុលាការ​នោះ​ទេ»។​

បន្ទាប់​ពី​ការ​ចេញ​សេចក្តី​ថ្លែងការណ៍នេះ​ សភា​ដែល​មាន​តែ​អ្នក​តំណាងរាស្ត្រ​៦៨​រូប​ មក​ពីគណបក្ស​ប្រជាជន​កម្ពុជា​ កាលពី​ថ្ងៃ​ទី​៣០​ ខែ​ឧសភា​ ឆ្នាំ​២០១៦​ បាន​ផ្តល់​ការ​យល់​ព្រម​ឲ្យ​អំណាច​តុលាការ​បន្ត​សំណុំ​រឿង​លោក​ កឹម​ សុខា​ ដែល​ត្រូវ​បាន​តុលាការ​ធ្វើ​ការ​ចោទប្រកាន់​ថា ​មាន​ជាប់​ពាក់ព័ន្ធ​នឹង​អំពើ​សញ្ចរកម្ម។​ ការ​សម្រេច​របស់​សភា​ កើត​ឡើង​នៅ​ក្រោយ​ពេល​លោក​ កឹម​ សុខា​ ដែល​ជា​អ្នក​តំណាងរាស្ត្រ​មណ្ឌល​ខេត្ត​កំពង់ចាម ​បាន​បដិសេធ​មិន​ចូលខ្លួន​ទៅ​បំភ្លឺ​នៅ​តុលាការ​ចំនួន​ពីរ​លើក។

ដើម្បី​គាំទ្រការ​សម្រេច​របស់​ក្រុម​អ្នកតំណាងរាស្ត្រ​គណបក្ស​ប្រជាជន​កម្ពុជា​ និង​ច្រាន​ចោល​រាល់ការ​ចោទ​ប្រកាន់​ថា​ សភា​បាន​រំលោទ​រដ្ឋធម្មនុញ្ញ​ អ្នក​នាំ​ពាក្យ​សភា​ជាតិ​ លោក​ ឡេង​ ប៉េងឡុង​ បាន​ពន្យល់​នៅ​ក្នុង​សេចក្តី​ថ្លែងការណ៍​របស់​លោក​ ដែល​ VOA​ ទទួល​បាន​ នៅ​ថ្ងៃ​ទី​១​ ខែ​មិថុនា​ នេះ​ថា៖​

«ក្នុង​ការ​អនុវត្ត​ភារកិច្ច​របស់​ខ្លួន​ រដ្ឋសភា​មាន​សិទ្ធិ​បញ្ចេញមតិ​ និង​អនុម័ត​ដោយ​ឯករាជ្យ​ ពុំ​ទទួល​ការ​គាប​សង្កត់​ ឬ​បង្គាប់​បញ្ជាពី​នរណា​ឡើយ»។​

សេចក្តី​ថ្លែងការណ៍​របស់​អ្នក​នាំ​ពាក្យ​សភា​បាន​បន្ត​ថា​ ការ​សម្រេច​របស់​សភា​កាល​ពី​ថ្ងៃ​ច័ន្ទ​ ទី៣០​ ខែ​ឧសភា​ ឆ្នាំ​២០១៦​ លើ​ករណី​លោក កឹម សុខា​ បាន​ធ្វើ​ត្រឹមត្រូវ​តាម​ច្បាប់​ ដោយ​ទី​១ សមាជិក​សភា​ទំាង​៦៨​រូប​ មិន​គាំទ្រ​ឲ្យ​តុលាការ​ផ្អាក​ការ​ចោទប្រកាន់​លោក​ កឹម សុខា​ ព្រោះ​សមាជិក​សភា​យល់​ថា​ លោក​ កឹម សុខា​ បាន​ប្រព្រឹត្ត​ល្មើស​ជាក់ស្តែង​ ទី២​ ការ​សម្រេច​នេះ​ គឺ​ស្រប​នឹង​បទបញ្ញត្តិ​នៃ​មាត្រា​៨០​នៃ​រដ្ឋធម្មនុញ្ញ​ និង​ស្រប​តាម​បទ​បញ្ញត្តិ​នៃ​ប្រការ​៤១​ថ្មី​ នៃ​បទ​បញ្ជា​ផ្ទៃ​ក្នុង​នៃ​រដ្ឋសភា។​

ប្រការ​៤១​ថ្មី​នៃ​បទបញ្ជា​ផ្ទៃក្នុង​នៃ​រដ្ឋសភា​ បាន​បញ្ជាក់​ថា៖​ «ការ​អនុម័ត​ទាំងឡាយ​ត្រូវ​យក​តាម​មតិ​ភាគ​ច្រើន​ ដែល​មាន​កំណត់​ក្នុង​រដ្ឋធម្មនុញ្ញ។​ ក្រៅ​ពី​នេះ​ មតិ​ភាគច្រើន​ដាច់​ខាត​នៃ​ចំនួន​សមាជិក​រដ្ឋសភា​ ទាំង​មូល​ ត្រូវ​ទុក​ជា​បាន​ការ​ វៀរ​លែង​តែ​មាន​ការ​កំណត់​ក្នុង​ច្បាប់​ដោយ​ឡែក។​

លោក​ សុន​ ឆ័យ​ ប្រធាន​ក្រុម​អ្នក​តំណាងរាស្ត្រ​គណបក្ស​សង្គ្រោះ​ជាតិ​ បាន​ប្រាប់​ VOA ថា​ ​ការ​បកស្រាយនេះ​ គឺ​ផ្ទុយ​ពីមាត្រា​ ៨០​ នៃ​រដ្ឋធម្មនុញ្ញដែល​និយាយ​ពី​អភ័យឯកសិទ្ធិ និង​ការ​ប្រព្រឹត្ត​បទ​ល្មើស​ជាក់​ស្តែង​ដោយ​អ្នកតំណាងរាស្ត្រ។

«មាត្រា​៨០​ហ្នឹង​ ក៏​បាន​ជជែក​ច្បាស់​លាស់​ដែរ​ អំពី​អ្វី​ដែល​ហៅ​ថា​ បទ​ព្រហ្មទណ្ឌ​ជាក់​ស្តែង គឺ​បាន​និយាយ​អំពី​ការណ៍​ដែល​ពាក់ព័ន្ធ​ទៅ​នឹង​អំពើ​ហិង្សា​ ដែល​កើត​មាន​ ត្រូវ​តែ​បញ្ឈប់​ជាបន្ទាន់​ ដើម្បី​ជៀសវាង​ការ​ប៉ះពាល់​ទៅ​ដល់​អាយុ​ជីវិត​អ្នក​ដទៃ​ អី​ជាដើម​ មិន​មែន​និយាយ​អំពី​អ្នក​តំណាងរាស្ត្រ​ មិន​ចូល​ទៅ​ឆ្លើយ​បំភ្លឺ​ ​ក្នុង​ការ​សើ្ន​សុំជា​សាក្សី​នៅ​តុលាការ​ទេ»។​

ប្រធាន​ក្រុម​អ្នក​តំណាងរាស្ត្រ​គណបក្សប្រឆាំង​រូប​នេះ​ ថ្លែង​ថា ​លោក​បាន​សេរសេរ​លិខិតមួយ​ផ្ញើ​ទៅ​កាន់​លោក​ ហេង​ សំរិន​ ប្រធាន​សភា​ ឲ្យ​ផ្តល់​ឯកសារ​នានា​ នៃ​ការ​តាក់តែង​មាត្រា​ ៨០​ ដែល​លោកយល់​ថា​ សភា​នៅ​មាន​ការ​បក​ស្រាយ​ខុស​ចំពោះ​មាត្រា​នេះ។​

លោក​ ឡេង ប៉េងឡុង​ អ្នកនាំពាក្យ​សភា មាន​ប្រសាសន៍​ថា​ លោក​ សុន​ ឆ័យ​ អាច​រក​បាន​ឯកសារ​នេះ​នៅ​ក្នុង​បណ្ណាល័យ​របស់​សភា។​ លោក​បញ្ជាក់​បន្ត​ថា​ សភា​ពុំ​បាន​ព្យួរ​អភ័យឯកសិទ្ធិ​លោក កឹម សុខា​ នោះ​ទេ។​ លោក​ថា ​ការ​សម្រេច​របស់​សភា​ គឺ​ផ្អែក​លើ​ហេតុផល​សំខាន់​មួយ​ថា​ អនុប្រធាន​ស្តី​ទី គណបក្ស​សង្គ្រោះ​ជាតិ​រូប​នេះ​ បាន​ប្រព្រឹត្ត​បទល្មើស​ជាក់ស្តែង។​

​លោក​ ឡេង ប៉េងឡុង ថ្លែង​ថា៖

«សេចក្តី​សម្រេច​ហ្នឹង​ អត់​មាន​ពាក់​ព័ន្ធ​អភ័យ​ឯកសិទ្ធិ​ផង​ អត់​មាន​ពាក់ព័ន្ធ​អភ័យ​ឯកសិទ្ធិ​ទេ​ ដូច​ជា​ ករណី​ពីរ​មុន ករណី​ឯកឧត្តម​ អ៊ុំ​ សំអាន​ ករណី​ឯកឧត្តម​ ហុង សុខហួរ​ ហ្នឹង​ អត់​មាន​ព្យួរ​អភ័យ​ឯក​សិទ្ធិ​ គាត់​ទេ​ អត់​មាន​ទេ»។​

លោក ឡេង​ ប៉េង​ឡុង​ បាន​បន្ត​ថា​ ប្រសិន​បើ​ចង់​ឲ្យ​ស្ថាប័ន​តុលាការ​ផ្អាក​ការ​ចោទ​ លោក​ កឹម សុខា​ លុះ​ត្រា​តែ​លោក កឹម សុខា ​ទទួល​បានសំឡេង​ បី​ភាគបួន​នៅ​ក្នុង​សភា​ គឺ​ស្មើ​នឹង​អ្នកតំណាងរាស្ត្រ​ ៩៣​រូប។​ ​

ការ​សម្រេច​ដោយ​សភា​ដែល​គ្រប​ដណ្តប់​ដោយ​គណបក្ស​កាន់​អំណាច​ឲ្យ​បន្ត​រឿង​ក្តី​លោក​ កឹម​ សុខា ​នោះ​ កើតឡើង​បន្ទាប់​ពី​ព្រះ​រាជ​អាជ្ញា ​នៃ​អយ្យការ​អម​សាលាដំបូង​រាជធានី​ភ្នំពេញ​បាន​ផ្ញើលិខិត​ជម្រាប​លោក​ ហេង សំរិន​ ប្រធាន​សភា​ជាតិ​ថា ការ​ប្រព្រឹត្ត​របស់​លោក​ កឹម សុខា​ ដែល​មិន​ចូល​ខ្លួន​មក​ឆ្លើយ​បំភ្លឺ​ តាម​ការ​កោះ​ហៅ​របស់​តំណាង​អយ្យការ​ទាំង​ពីរ​លើក​ គឺ​ជា​បទ​ល្មើស​ ​តាម​មាត្រា​៥៣៨​នៃ​ក្រម​ព្រហ្មទណ្ឌ​នៃ​ព្រះ​រាជា​ណាចក្រ​កម្ពុជា​។​ តាម​មាត្រា​នេះ​ ប្រសិន​បើ​ជនសង្ស័យ ត្រូវ​រក​ឃើញ​ថា​មាន​ទោស​ ជនសង្ស័យ​នឹង​ត្រូវ​ផ្តន្ទា​ទោស​ដាក់​ពន្ធនាគារ​ពី​មួយ​ខែ​ទៅ​ប្រាំមួយ​ខែ​ និង​ពិន័យ​ជា​ប្រាក់​ ​ពី​មួយ​សែន​ទៅ​មួយ​លាន​រៀល។​

ថ្វី​ត្បិត​តែ​មាន​ការ​លើកឡើង​ខុសៗ​គ្នា​នៃ​ការ​សម្រេច​របស់​សភាជាតិចំពោះ​ លោក កឹម សុខា​ ស្ថាប័ន​តុលាការ​មិន​ទាន់​អាច​បញ្ជាក់​បាន​ទេ​ អំពី​ការ​ឃាត់​ខ្លួន​ លោក​ កឹម សុខា​ ដែល​ជា​អតីត​អនុប្រធាន​ទី​មួយ​នៃ​សភាជាតិ។​ នេះ​ បើ​តាម​ការ​បញ្ជាក់​ របស់​លោក​ ​តាំង​ ស៊ុន​ឡាយ​ ប្រធាន​សាលា​ដំបូង​រាជធានី​ភ្នំពេញ។​

លោក​ ​តាំង​ ស៊ុន​ឡាយ​ ប្រធាន​សាលា​ដំបូង​រាជធានី​ភ្នំពេញ​ បាន​មាន​ប្រសាសន៍​ប្រាប់​ VOA​ ​នៅ​ថ្ងៃ​ ពុធ​នេះ​ថា​ រឿងក្តី​លោក​ កឹម​ សុខា​ កំពុង​ស្ថិត​ក្នុង​ដៃ​របស់​ចៅក្រម​ ស៊ើប​សួរ។​ លោក​ថា​ មិន​ទាន់​ដឹង​ថា​ ចៅក្រម​ស៊ើបសួរចេញ​ដីកា​ចាប់​ខ្លួន​លោក​ កឹម​ សុខា​ នៅ​ពេល​ណា​នោះ​ទេ។

«អាហ្នឹង​ធម្មតា​ គេ​ចេញ​ដីកា​បង្គាប់​ឲ្យ​ចូល​ខ្លួន​សិន។​ ខ្ញុំ​អត់​ដឹង​ថា​ យ៉ាង​ម៉េច​ទេ​ ប៉ុន្តែ​តាម​ធម្មតា គាត់​នៅ​ហ្នឹង​ យើង​ធ្វើ​ដីកា​បង្គាប់​ឲ្យ​ចូល​ខ្លួន​ ប៉ុន្តែ​ខ្ញុំ​អត់​ទាន់ដឹង​ថា​ ថ្ងៃ​ណា​ទេ​ ព្រោះ​ចៅក្រម​ស៊ើប​សួរ​ អត់​ទាន់​បាន​ជួប​គាត់​ផង​ ខ្ញុំ​អត់​ទាន់​ជួប​គាត់​ មិន​ដឹង​គាត់​ចេញ​នៅ​ខ្ញុំ​អត់ដឹង​ទេ»។​ ​

លោក​ សម​ សុខគង់​ មេធាវី​ការពារ​ក្តី​ លោក​ កឹម​ សុខា​ បាន​ប្រាប់​ VOA​ ថា​ ក្រុម​មេធាវី​ការពារក្តី​ លោក​ កឹម សុខា​ នឹង​ពិនិត្យ​មើល​ទិដ្ឋភាព​ផ្លូវ​ច្បាប់​ផ្សេង​ទៀត​ ដើម្បី​ជួយ​កូនក្តី​របស់​លោក។​ ក្នុង​នោះ​ លោក​ថា​ ក្រុម​មេធាវី​នឹង​បន្ត​ផ្អែក​លើ​មាត្រា​ ៨០​នៃ​រដ្ឋធម្មនុញ្ញ​ ​ដែល​បាន​បញ្ជាក់​ថា​ ​ប្រសិនបើ​តំណាង​រាស្ត្រ​ប្រព្រឹត្ត​បទល្មើស​ជាក់​ស្តែង​ ច្បាប់​អនុញ្ញាត​ឲ្យ​សមត្ថកិច្ច​ឃាត់ខ្លួន​ ហើយ​សមត្ថកិច្ច​ត្រូវ​ធ្វើ​របាយ​ការណ៍​ទៅ​រដ្ឋសភា​តាម​រយៈ​ក្រសួងយុត្តិធម៌។​ បន្ទាប់មក​ ​សភា​ត្រូវ​រក​ឲ្យ​បាន​សំឡេង​ពីរភាគ​បី​នៃ​សមាជិក​សភា​ទាំង​មូល​របស់​ខ្លួនដើម្បី​ព្យួរ​អភ័យ​ឯកសិទ្ធិ​តំណាងរាស្ត្រ​នោះ។​

«រដ្ឋ​សភា​កាល​ពី​ថ្ងៃ​ ៣០​នេះ រដ្ឋសភា​ យើង​ឃើញ​សំឡេង​ហ្នឹង​ វា​អត់​បាន​ពីរ​ភាគ​បី​ទេ គឺ​យើង​ឃើញ​៦៨​សំឡេង​ហ្នឹង​ គឺថា​វា​មិន​ទាន់​បាន​ ​ពីរ​ភាគបី។​ អញ្ចឹង​បើ​យើង​យោង​ទៅតាមរដ្ឋធម្មនុញ្ញ​វា​អត់​មាន​លក្ខណៈ​ត្រឹមត្រូវ​ ហើយ​អត់​ទាន់​អនុលោម​ទៅ​តាម​មាត្រា​៨០​នៃ​រដ្ឋធម្មនុញ្ញ»។

នៅ​គ្រា​ដែល​លោក​ កឹម​ ​សុខា​ ពុំ​ទាន់​ត្រូវ​បាន​ឃាត់​ខ្លួន​ ដោយ​អាជ្ញាធរ​មាន​សមត្ថកិច្ច​ ដើម្បី​បញ្ជូន​មក​តុលាការ​ ​មាន​សមាជិក​ និង​សកម្មជន​គណបក្ស​សង្គ្រោះ​ជាតិ​ចំនួន​១៦​រូប​ហើយ ដែលបាន​ជាប់​ឃុំឃាំង ​ក្នុង​នោះ​ក៏​មាន​លោក​ ហុង​ សុខហួរ​ សមាជិក​ព្រឹទ្ធសភា​ និង​ លោក​ អ៊ុំ​ សំអាន​ អ្នក​តំណាងរាស្ត្រ​មណ្ឌល​ខេត្ត​សៀម​រាប​ដែល​ជាប់​ចោទ​ក្នុង​រឿង​ផែនទី ​និង​រឿង​ព្រំដែន​កម្ពុជា​វៀតណាម៕

XS
SM
MD
LG