តុលាការរាជធានីភ្នំពេញនៅថ្ងៃសុក្រនេះ បានលើកពេលប្រកាសសាលក្រមដោយមិនបានបញ្ជាក់ប្រាប់ជាមុន លើករណីអតីតអ្នករាយការណ៍ព័ត៌មានរបស់វិទ្យុអាស៊ីសេរីចំនួនពីររូបគឺ លោក អ៊ួន ឈិន និងលោក យាង សុធារិន្ទ។
ក្រឡាបញ្ជីមួយរូបចេញមកប្រាប់អតីតអ្នកសារព័ត៌មានអាស៊ីសេរី មន្រ្តីឃ្លាំមើលសិទ្ធិមនុស្ស មន្រ្តីស្ថានទូត និងអ្នកសារព័ត៌មានជាតិ និងអន្តរជាតិជាច្រើនដែលកំពុងអង្គុយក្នុងសាលសវនាការរង់ចាំការប្រកាសសាលក្រមថា ការប្រកាសសាលក្រមលើអតីតអ្នកកាសែតទាំងពីរត្រូវបានលើកពេល។ មូលហេតុដោយសាររដ្ឋមន្ត្រីក្រសួងយុត្តិធម៌បានអញ្ជើញចៅក្រមជាប្រធានអង្គជំនុំជម្រះ ដែលត្រូវប្រកាសសាលក្រម ឲ្យចូលរួមសិក្ខាសាលាចំនួនពីរថ្ងៃ។
ទោះជាយ៉ាងណា ក្រឡាបញ្ជីដដែលមិនបានបញ្ជាក់ថា ការប្រកាសសាលក្រមនឹងធ្វើឡើងនៅពេលណានោះទេ ដោយគ្រាន់តែប្រាប់ឲ្យរង់ចាំការជូនដំណឹងជាក្រោយ។
លោក អ៊ួន ឈិន និងលោក យាង សុធារិន្ទ ដែលប្រើឈ្មោះក្នុងការផ្សាយថា យាង សុជាមេត្តា ត្រូវបានតុលាការចោទប្រកាន់ថា បានផ្តល់ព័ត៌មានឲ្យរដ្ឋបរទេសដែលអាចបង្កឲ្យប៉ះពាល់ដល់សន្តិសុខជាតិ។ អតីតអ្នកកាសែតទាំងពីរដែលកំពុងស្ថិតនៅក្រៅមន្ទីរឃុំឃាំងបណ្តោះអាសន្ន ត្រូវបានកាត់ទោសកាលពីថ្ងៃទី២៦ ខែកក្កដាកន្លងទៅ។ ហើយការប្រកាសសាលក្រមត្រូវបានកំណត់នៅថ្ងៃសុក្រទី៣០ ខែសីហានេះ។ ប៉ុន្តែនៅព្រឹកថ្ងៃសុក្រនេះ ការប្រកាសសាលក្រមត្រូវបានលើកពេលភ្លាមៗ នៅពេលដែលជនជាប់សង្ស័យទាំងពីរបានមកដល់តុលាការ។
លោក យាង សុធារិន្ទ ប្រាប់ក្រុមអ្នកសារព័ត៌មាននៅខាងក្រៅរបងតុលាការ ទាំងមេឃកំពុងធ្លាក់ភ្លៀងថា ការសម្រចលើកពេលប្រកាសសាលក្រមដោយមិនជូនដំណឹងជាមុន និងមិនកំណត់ពីពេលវេលានេះ ធ្វើឲ្យប៉ះពាល់ដល់សិទ្ធិ និងសេរីភាពរបស់លោក។ លោក បញ្ជាក់ថា៖
«ខ្ញុំទន្ទឹងរង់ចាំថ្ងៃហ្នឹង ព្រោះអីខ្ញុំចង់បានសេរីភាពឲ្យបានលឿន ហើយនៅពេលដែលពន្យារពេលការប្រកាស សេរីភាពរបស់ខ្ញុំនៅតែបន្តរិតត្បិត គឺថាសេរីភាពរបស់ខ្ញុំរាប់ទៅតាមថ្ងៃនៃការប្រកាស អញ្ចឹងការពន្យារការប្រកាសកាន់តែវែង កាន់តែឆ្ងាយ គឺសេរីភាពរបស់ខ្ញុំគឺកាន់តែអស់ កាន់តែខិតទៅតាមហ្នឹងដែរ»។
ចំណែកលោក អ៊ួន ឈិន លើកឡើងថា ការពន្យារការប្រកាសសាលក្រមនេះ កាន់តែធ្វើឲ្យលោកប្រឈមជាមួយបញ្ហាជីវភាព។
«ការណ៍ដែលយើងពិបាក ខ្វះសេរីភាពក្នុងការធ្វើនេះធ្វើនោះ ដើរហើរទៅណេះទៅណោះ ស្វែងរកការងារ ជាពិសេសគឺការដែលចង់វិលចូលអាជីពជាអ្នកសារព័ត៌មានវិញហ្នឹង ដល់ពេលយើងមិនទាន់ដឹងយ៉ាងណាៗអញ្ចឹង ធ្វើឲ្យយើងពិបាកដើរទៅមុខ»។
លោក យាង សុធារិន្ទ និងលោក អ៊ួន ឈិន ត្រូវបានចាប់ និងឃុំខ្លួនកាលពីថ្ងៃទី១៤ខែវិច្ឆិកា ឆ្នាំ២០១៧ ក្រោមការចោទប្រកាន់ដូចគ្នាពីបទ «ផ្តល់ព័ត៌មានដល់រដ្ឋបរទេសដែលអាចធ្វើឲ្យអន្តរាយដល់ការការពារជាតិ» ដែលស្មើនឹងបទចារកម្ម។ អតីតអ្នកកាសែតទាំងពីរអាចប្រឈមនឹងការជាប់ពន្ធនាគារពី៧ ដល់ ១៥ឆ្នាំ ប្រសិនបើតុលាការរកឃើញថា ពួកគេមានទោសនោះ។ ពួកគេត្រូវបានឃុំខ្លួនក្នុងពន្ធនាគារព្រៃសអស់រយៈពេលជិតដប់ខែ មុននឹងត្រូវបានដោះលែងឲ្យមានសេរីភាពបណ្តោះអាសន្ន ក្រោមការឃ្លាំមើលរបស់តុលាការ។
ក្នុងបទសម្ភាស៍ជាមួយ VOA កាលពីសប្តាហ៍មុន ពួកគេបានត្អួញត្អែរពីផលវិបាកក្នុងការរកការងារធ្វើដើម្បីចិញ្ចឹមជីវិត នៅពេលដែលពួកគេជាប់ចំណងតុលាការ។
លោក ស៊ឹង សែនករុណា មន្រ្តីអង្កេតជាន់ខ្ពស់នៃសមាគមការពារសិទ្ធិមនុស្សអាដហុក ដែលមានវត្តមានក្នុងការរង់ចាំស្តាប់ការប្រកាសសាលក្រមកាលពីព្រឹកមិញដែរប្រាប់ VOA ថា ចៅក្រមគួរមានការជូនដំណឹងជាមុនអំពីការលើកពេលប្រកាសសាលក្រមពីព្រោះថា ការណ៍ពាក់ព័ន្ធនឹងទំនួលខុសត្រូវលើសេរីភាពរបស់អតីតអ្នកកាសែតទាំងពីរ។ លោកបន្តថា ការប្រកាសសាលក្រមបានលឿន នឹងអាចធ្វើឲ្យពួកគេទាំងពីរមានពេលវេលាក្នុងការរៀបចំជីវិត និងអនាគតរបស់ពួកគេ។
ឆ្លើយតបតាមខ្សែទូរស័ព្ទមកកាន់ VOA លោក អ៊ឹម វណ្ណៈ ចៅក្រមកាត់ក្តីក្នុងសំណុំរឿងរបស់អតីតអ្នកសារព័ត៌មានអាស៊ីសេរីទាំងពីររូប បញ្ជាក់យ៉ាងខ្លីថា លោកកំពុងជាប់សិក្ខាសាលា៕
