ភ្ជាប់​ទៅ​គេហទំព័រ​ទាក់ទង

កីឡាករ​អាមេរិក​​ដើម​កំណើត​ខ្មែរ​ រំពឹង​ថា​ នឹង​ជួយ​ជំរុញ​ចិត្ត​យុវជន​កម្ពុជា

  • នៅ វណ្ណារិន

រូបឯកសារ៖ អតីត​កុមារ​កំព្រា​កម្ពុជា​ Jordan Pisey Windle​ ដែល​មាន​ឪពុក​ចិញ្ចឹម​ជា​ជនជាតិ​អាមេរិកាំង​ បច្ចុប្បន្ន​​ជា​កីឡាករ​លោត​​​ទឹក​​ថ្នាក់​ជាតិ​ឆ្នើម​របស់​សហរដ្ឋ​អាមេរិក​ បាន​មក​កាន់​ប្រទេស​កម្ពុជា​ជា​លើក​ដំបូង ដើម្បី​ផ្តល់​កី្តសង្ឃឹម​ដល់​កុមារ​កំព្រា​ផ្សេង​ទៀត​នៅ​កម្ពុជា​​ ក្នុង​រាជធានី​ភ្នំពេញ​ កាល​ពី​ថ្ងៃ​ទី​១២ ខែ​ឧសភា​ ឆ្នាំ​២០១៦។ (ហ៊ាន សុជាតា/VOA)

លោក​ Jordan Pisey ដែល​ធ្លាប់​ជា​អតីត​ក្មេង​កំព្រា​កម្ពុជា​មួយ​រូប​ផង​នោះ ចង់​ជួយ​ជំរុញ​ចិត្ត​ឲ្យ​យុវជន​កម្ពុជា ជាពិសេស​ក្មេង​កំព្រា ឲ្យ​មាន​ចិត្ត​តស៊ូ​ និង​ព្យាយាម​បន្ថែម​ទៀត ​ដើម្បី​ឈាន​ទៅ​ដល់​ភាព​ជោគជ័យ​របស់​ខ្លួន។

នេះ​ជា​លើក​ដំបូង​ដែល​កីឡាករ​លោត​ទឹក​ជម្រើស​ជាតិ​អាមេរិក​ ដើម​កំណើត​ខ្មែរ​ Jordan Pisey Windle បាន​ទទួល​ការ​ស្វាគមន៍​ និង​បង្ហាញ​ទេពកោសល្យ​របស់​ខ្លួន​នៅ​ក្នុង​ប្រទេស​កំណើត​របស់​ខ្លួន។

ដោយ​ឡើង​កាំ​ជណ្ដើរ​មួយ​ជាន់​ម្តងៗ ​រហូត​ដល់​ជាន់​ខ្ពស់​បំផុត​ដែល​មាន​កម្ពស់​១០ម៉ែត្រ​ពី​ផ្ទៃ​ទឹក កីឡាករ​លោត​ទឹក​អាជីព​របស់​សហរដ្ឋ​អាមេរិក​វ័យ១៧ឆ្នាំ​រូប​នេះ បាន​បង្ហាញ​ពី​ភាព​ប៉ិន​ប្រសព្វ និង​បច្ចេកទេស​របស់​ខ្លួន​ដល់​ទស្សនិកជន ​និង​ក្រុម​កីឡាករ​លោត​ទឹក​កម្ពុជា​នៅ​ក្នុង​ពហុ​កីឡាដ្ឋាន​ជាតិ​អូឡាំពិក​ក្នុង​ក្រុង​ភ្នំពេញ។

លើស​ពី​នេះ​ទៀត​ លោក​ Jordan Pisey ដែល​ធ្លាប់​ជា​អតីត​ក្មេង​កំព្រា​កម្ពុជា​មួយ​រូប​ផង​នោះ ចង់​ជួយ​ជំរុញ​ចិត្ត​ឲ្យ​យុវជន​កម្ពុជា ជាពិសេស​ក្មេង​កំព្រា ឲ្យ​មាន​ចិត្ត​តស៊ូ​ និង​ព្យាយាម​បន្ថែម​ទៀត ​ដើម្បី​ឈាន​ទៅ​ដល់​ភាព​ជោគជ័យ​របស់​ខ្លួន។

នៅ​ក្នុង​កិច្ច​សម្ភាសន៍​មួយ​ មុន​ពេល​បង្ហាញ​ទេពកោសល្យ​នា​សប្ដាហ៍​កន្លង​ទៅ​ លោក​Jordan Pisey ​បាន​ប្រាប់ ​VOA ​ថា៖ «ខ្ញុំ​មក​ទីនេះ​ដើម្បី​ធ្វើ​ជា​គំរូ​មួយ ដោយ​សារ​តែ​ខ្ញុំ​ត្រូវ​បាន​យក​ពី​ទីនេះ​ទៅ​ចិញ្ចឹម។ ខ្ញុំ​មាន​ឱកាស​ក្នុង​ការ​ទទួល​បាន​ជីវិត​ដ៏​ប្រសើរ​មួយ​ជាមួយ​នឹង​ឪពុក​ពីរ​នាក់​ហើយ​ជាមួយ​នឹង​ឱកាស​នោះ ខ្ញុំ​អាច​ជម្នះ​នូវ​ឧបសគ្គ​ផ្សេងៗ និង​សម្រេច​នូវ​គោលដៅ​ដែល​ខ្ញុំ​បាន​កំណត់​ឡើង​សម្រាប់​ខ្លួនឯង។​ នេះ​ជា​អ្វី​ដែល​ខ្ញុំ​ចង់​បង្ហាញ​ប្រជាជន​ ក៏​ដូចជា​ក្មេង​កំព្រា​នៅ​ទីនេះ»។​

​លោក Jordan Pisey Windle​ ​ដែល​ជា​កីឡាករ​សហរដ្ឋអាមេរិក ដែល​ឈ្នះ​មេដាយ​មាស​៥លើក​ក្នុង​ការ​ប្រកួត​លោត​ទឹក​ថ្នាក់​ជាតិ​នេះ មាន​ដើម​កំណើត នៅ​ខេត្ត​ព្រៃវែង។

លោក​ក្លាយ​ជា​កុមារ​កំព្រា ក្រោយ​ពេល​ឪពុក​ម្ដាយ​របស់​លោក​បាន​ចែកឋាន​ ពេល​ដែល​លោក​នៅ​ជា​ទារក​នៅ​ឡើយ។

រូបឯកសារ៖ អតីត​កុមារ​កំព្រា​កម្ពុជា​ Jordan Pisey Windle​ ដែល​មានឪពុក​ចិញ្ចឹម​ជា​ជនជាតិ​អាមេរិកាំង​ បច្ចុប្បន្នជា​កីឡាករ​លោតទឹកថ្នាក់​ជាតិ​ឆ្នើម​របស់​សហរដ្ឋ​អាមេរិក ផ្តល់​បទសម្ភាសន៍​ដល់​ក្រុម​អ្នក​សារព័ត៌មាន ក្នុង​រាជធានី​ភ្នំពេញ​ កាល​ពី​ថ្ងៃ​ទី​១២ ខែ​ឧសភា​ ឆ្នាំ​២០១៦។ (ហ៊ាន សុជាតា/ VOA)
រូបឯកសារ៖ អតីត​កុមារ​កំព្រា​កម្ពុជា​ Jordan Pisey Windle​ ដែល​មានឪពុក​ចិញ្ចឹម​ជា​ជនជាតិ​អាមេរិកាំង​ បច្ចុប្បន្នជា​កីឡាករ​លោតទឹកថ្នាក់​ជាតិ​ឆ្នើម​របស់​សហរដ្ឋ​អាមេរិក ផ្តល់​បទសម្ភាសន៍​ដល់​ក្រុម​អ្នក​សារព័ត៌មាន ក្នុង​រាជធានី​ភ្នំពេញ​ កាល​ពី​ថ្ងៃ​ទី​១២ ខែ​ឧសភា​ ឆ្នាំ​២០១៦។ (ហ៊ាន សុជាតា/ VOA)

នា​ខែ​មិថុនា​ឆ្នាំ​២០០០ លោក​ Jerry Windle ​អតីត​ទាហាន​ជើង​ទឹក​សហរដ្ឋ​អាមេរិក​ បាន​ទទួល Jordan Pisey ​ទើប​តែ​មាន​វ័យ​១៨​ខែ​ប៉ុណ្ណោះ​ យក​ទៅ​ចិញ្ចឹម​នៅ​សហរដ្ឋ​អាមេរិក។ នោះ​គឺ​ជា​លើក​ចុង​ក្រោយ ដែល​ Jordan Pisey​រស់​នៅ​ក្នុង​ប្រទេស​កម្ពុជា។​

នា​ពេល​ពេល​បច្ចុប្បន្ន​ លោក​រស់នៅ​រដ្ឋ​ California​ ជាមួយ​ឪពុក​ទាំង​ពីរ​របស់​លោក​ គឺ​លោក​ ​Jerry Windle ​និង​លោក​ Andres Rodriguez​ (ដែល​ស្រលាញ់​ភេទ​ដូចគ្នា)។

​កាល​ពី​សប្ដាហ៍​កន្លង​ទៅ​ Jordan Pisey ​និង​ឪពុក​ទាំង​ពីរ​របស់​លោក​បាន​ធ្វើ​ដំណើរ​ទស្សនកិច្ច​មួយ​ក្នុង​ប្រទេស​កម្ពុជា ដែល​មាន​រយៈពេល​៧ថ្ងៃ។

​ក្នុង​ដំណើរ​ទស្សនកិច្ច​ជា​លើក​ទី១ ក្នុង​ប្រទេស​កំណើត​របស់​ខ្លួន លោក​Jordan បាន​ស្នាក់​នៅ​ក្រុង​ភ្នំពេញ​រយៈពេល​៥ថ្ងៃ​ និង​២ថ្ងៃ នៅ​ខេត្ត​សៀមរាប ​ជាទី​ដែល​លោក​បាន​ទស្សនា​ប្រាសាទ​អង្គរវត្ត​ដ៏​ល្បីល្បាញ​របស់​ខ្មែរ។

​ក្នុង​ដំណើរ​ទស្សនកិច្ច​នា​រាជធានី​ភ្នំពេញ លោក​ Jordan Pisey បាន​ជួប​កុមារ​កំព្រា និង​បង្ហាញ​ទេពកោសល្យ​របស់​លោក​នៅ​ពហុកីឡាដ្ឋាន​អូឡាំពិក។ លោក​ក៏​បាន​ទស្សនា​សារមន្ទីរ​ប្រល័យ​ពូជសាសន៍​ជើងឯក ​និង​គុកទួល​ស្លែង​ផង​ដែរ។

បើ​ទោះ​ជា​ប្រវត្តិសាស្ត្រ​នៃ​ការ​សម្លាប់​រង្គាល​របស់​ពួក​ខ្មែរ​ក្រហម​ ធ្វើ​ឲ្យ​លោក​សោក​សង្វេគ​ក៏​ដោយ ក៏​លោក Jordan Pisey សង្ឃឹម​ថា ប្រវត្តិសាស្ត្រ​ដ៏​ឈឺ​ចាប់​នេះ​ នឹង​ក្លាយ​ជា​កម្លាំង​ចិត្ត​ជំរុញ​ ឲ្យ​កម្ពុជា​ឈាន​ឡើង​ទៅ​រក​ការ​អភិវឌ្ឍ។​

​«ខ្ញុំ​ប្រើ​ជំនាញ​លោត​ទឹក​របស់​ខ្ញុំ ដើម្បី​បង្ហាញ​ថា​ ខ្ញុំ​ទទួល​បាន​ឱកាស​មួយ​ ហើយ​បាន​ប្រើ​ឱកាស​នោះ​ឲ្យ​បាន​ប្រសើរ​បំផុត​តាម​តែ​អាច​ធ្វើ​បាន​នៅ​ក្នុង​ការ​លោត​ទឹក។ លើស​ពី​នេះ​ ​ខ្ញុំ​ចង់​បង្ហាញ​ថា ជា​មួយ​នឹង​ការ​ប្រឹងប្រែង​ស្វាធ្យាយ​ អ្នក​នឹង​អាច​សម្រេច​អ្វី​ដែល​អ្នក​ចង់​បាន។ អ្នក​អាច​ក្លាយ​ជា​បុគ្គល​ម្នាក់​ដែល​ខ្លួន​ប្រាថ្នា ​ប្រសិន​បើ​អ្នក​ខិតខំ​ប្រឹងប្រែង»។

​ស្រប​គ្នា​នោះ​ដែរ ​លោក Jerry​ ឪពុក​ចិញ្ចឹម​របស់ Jordan Pisey​ បាន​បន្ថែម​ថា លោក​មាន​សេចក្ដី​សង្ឃឹម​ថា ​រដ្ឋាភិបាល​កម្ពុជា​ នឹង​អាច​ជួយ​«ផ្ដល់​ឱកាស​ជា​ច្រើន»​ បន្ថែម​ទៀត​ដល់​យុវជន​កម្ពុជា ជា​ពិសេស​កុមារ​កំព្រា​ដូចជា​ Jordan​ ដែល​ពួកគេ​ទាំង​នោះ​ អាច​នឹង​ទទួល​ជោគជ័យ​ដូច​គ្នា។

​«ប្រសិន​ជា​រដ្ឋាភិបាល ​អាច​ជួយ​ឧបត្ថម្ភ មិន​ត្រឹម​តែ​តាមរយៈ​កីឡា​ប៉ុណ្ណោះ​ទេ តែ​ថែម​ទាំង​តាមរយៈ​ការ​រីក​ចម្រើន​លូតលាស់​នោះ​ វា​នឹង​ផ្ដល់​ឱកាស​កាន់​តែ​ច្រើន​ដល់​យុវជន​កម្ពុជា។ ខ្ញុំ​គិត​ថា ​វា​នឹង​អាច​ជួយ​ឲ្យ​ប្រទេស​កម្ពុជា​កាន់​តែ​ល្បីល្បាញ​លើ​ឆាក​អន្តរជាតិ​ ​និង​ពិភព​លោក​ព្រោះ​ថា​អ្វីៗ​ក៏​អាច​ទៅ​រួច​ដែរ។ តួយ៉ាង ​ពិសី ​ដែល​ជា​កូន​ខ្មែរ​មួយ​រូប​ធ្លាប់​បាន​ទទួល​ជោគ​ជ័យ​ជា​ច្រើន​លើក ច្រើន​សារ​មក​ហើយ។ ហើយ​យើង​សង្កេត​ឃើញ​ហើយ​ថា Jordan មិន​ខុស​ពី​មនុស្សម្នា​ទាំង​ឡាយ​ដែល​យើង​បាន​ជួប​ក្នុង​អំឡុង​ទស្សនកិច្ច​របស់​យើង​នោះ​ទេ។ តែ​អ្វី​ដែល​នាំ​ឱ្យ​ខុសគ្នា​នោះ ​គឺ​ដោយ​សារ​ Jordan បាន​ទទួល​ឱកាស​ច្រើន​ជាង​អ្នកដទៃ»។​

ក្រោយ​ពេល​ចាក​ចេញ​ពី​ប្រទេស​កម្ពុជា​នា​ឆ្នាំ​២០០០Jordan Pisey បាន​ទៅ​រស់នៅ​ រដ្ឋ​ហ្វ្លរីដា (Florida)មុន​ពេល​រើ​ផ្ទះ​ទៅ​រស់នៅ​រដ្ឋ​កាលីហ្វ័រញ៉ា (California) ​សហរដ្ឋ​អាមេរិក​ ដែល​លោក​រស់នៅ​សព្វថ្ងៃ។

ពេល​ដែល​លោក​អាយុ​៧ឆ្នាំ​ ​ទេពកោសល្យ​ដ៏​ប៉ិនប្រសប់​របស់​ Jordan​ ​ធ្វើឲ្យ​គ្រូ​បង្វឹក​កីឡា​លោតទឹក​ចាប់​អារម្មណ៍ ហើយ​ទទួល​បង្វឹក​ឲ្យ​លោក​ក្លាយ​ជា​កីឡា​លោត​ទឹក​មួយ​រូប​ដ៏​ចំណាន។

ក្នុង​អាជីព​របស់​លោក​ ​Jordan Pisey​ ត្រូវ​បាន​បង្វឹក​ដោយ​គ្រូ​ល្បីៗ​ជា​ច្រើន​នាក់។​ បច្ចុប្បន្ន​ គ្រូ​បង្វឹក​របស់​លោក​គឺ​ Nunzio Esposto ដែល​ជា​ប្រធាន​គ្រូ​បង្វឹក​ប្រចាំ​សាកល​វិទ្យាល័យ​ Duke University។​

​ចាប់​តាំង​ពី​ឈាន​ជើង​ចូល​វិស័យ​កីឡា​លោត​ទឹក​នោះ​មក លោក Jordan​ ​បាន​ទទួល​ពាន​រង្វាន់​ជា​ច្រើន រួម​ទាំង​ពាន​រង្វាន់​លោក​ទឹក​ថ្នាក់​ជាតិ​កម្ពស់​១០​ម៉ែត្រ​ ​ពេល​ដែល​លោក​ស្ថិត​ក្នុង​វ័យ​១២ឆ្នាំ មេ​ដាយ​មាស​ក្នុង​ការ​ប្រកួត​ការ​លោត​ទឹក​បុរស​ថ្នាក់​ជាតិ ពេល​ដែល​លោក​អាយុ​១៥ឆ្នាំ​ និង​មេ​ដាយ​ប្រាក់​ក្នុង​ការ​ប្រកួត​ការ​លោត​ទឹក​ជា​ក្រុម​ជា​ដើម។​

​ក្នុង​ការ​បង្ហាញ​បច្ចេកទេស​លោតទឹក​ នា​ថ្ងៃ​ព្រហស្បតិ៍​សប្ដាហ៍​កន្លងទៅ​ ​លោក Jordan​ បាន​បង្ហាញ​បច្ចេកទេស​ បទ​ពិសោធន៍​ជា​ច្រើន​របស់​លោក​ជា​មួយ​នឹង​កីឡាករ​លោត​ទឹក​កម្ពុជា។

​ភូម ដាវិត​ កីឡាករ​កម្ពុជា​ដែល​ចូល​រួម​ហ្វឹកហាត់​ជា​មួយ​ Jordan​ ​បាន​បង្ហាញ​ពី​ភាព​រីករាយ និង​ការ​លើក​ទឹកចិត្ត​ពី​កីឡាករ​ Jordan។

«រៀន​បាទ ចាប់ដៃ​ហើយ​ប្រឹង​ជើង ហើយ​ប្រឹង​ទ្រូង។​ យើង​លោត​ល្អ​ជាង​មុន អត់​សូវ​បែក​ទឹក»។

កីឡាករ​វ័យ​១៣ឆ្នាំ​រូប​នេះ​បាន​បន្ថែម​ថា​ ខ្លួន​ក៏​ជា​កុមារ​កំព្រា​ផង​ដែរ​ ហើយ​បទពិសោធន៍​ និង​ភាព​តស៊ូ​របស់​ Jordan ធ្វើ​ឲ្យ​ខ្លួន​មាន​កម្លាំង​ចិត្ត​ក្នុង​ការ​តស៊ូ​សម្រាប់​ការ​ប្រកួត​ SEA Games​ នា​ខាង​មុខ។​

​ភូម ដាវិត បាន​និយាយ​ថា៖ «ប្រឹង​ហាត់​ថ្ងៃ​ក្រោយ​ គេ​នឹង​ចេញ​ទៅ​SEA Games»។

​បច្ចុប្បន្ន Jordan​ Pisey ​គឺ​ជា​កីឡាករ​ថ្នាក់​ជាតិ​អាមេរិក​លំដាប់​លេខ​៥ ​ហើយ​កំពុង​ព្យាយាម​ហ្វឹកហាត់ និង​ចូល​រួម​ប្រកួត​ជម្រើស​ថ្នាក់​ជាតិ​ជា​បន្តបន្ទាប់​ ​ដើម្បី​បាន​ទៅ​ប្រកួត​នៅ​ក្នុង​កម្មវិធី​កីឡា​អូឡាំពិក​លំដាប់​ពិភព​លោក​នៅ​ទីក្រុង​Rio ​នៃ​ប្រទេស​ប្រេស៊ីល ​នៅ​ខែ​សីហា​ខាង​មុខ​នេះ និង​នៅ​ទីក្រុង​តូក្យូ ​ប្រទេស​ជប៉ុន​នៅ​ឆ្នាំ​២០២០។

វីដេអូ​បង្ហាញ​កីឡា​ករ Jordan Pisey លោត​ទឹក​នៅ​ពហុកីឡាដ្ឋាន​អូឡាំពិក ដែល​ដកស្រង់ចេញ​ពីទំព័រ​ហ្វេសប៊ុក​របស់​ស្ថានទូតអាមេរិក​ប្រចាំ​នៅ​កម្ពុជា

ក្នុង​ការ​ជួបជុំ​ជាមួយ​ក្រុម​កីឡា​ហែល​ទឹក​ និង​លោត​ទឹក​កម្ពុជា​នា​សប្ដាហ៍​កន្លងទៅ លោក Jordan ​បាន​បង្ហាញ​ចំណាប់​អារម្មណ៍​ក្នុង​ការ​ជួយ​បង្វឹក​និង​ចូលរួម​ជាមួយ​ក្រុម​កីឡាករ​កម្ពុជា​ក្នុង​ការ​ប្រកួត​កីឡា​លោត​ទឹក​លើ​ឆាក​អន្តរជាតិ​ផង​ដែរ។

ក៏ប៉ុន្តែ​ លោក​ត្រូវការ​ពេល​វេលា​យ៉ាង​ហោច​ណាស់​មួយ​ឆ្នាំ ដើម្បី​តំណាង​ឲ្យ​ក្រុម​ជម្រើស​ជាតិ​សហរដ្ឋ​អាមេរិក​ក្នុង​ប្រកួត​កីឡា​អូឡាំពិក​ នា​ប៉ុន្មាន​ខែ​ខាង​មុខ​ មុន​ពេល​ដែល​លោក​អាច​ចូលរួម​ជា​មួយ​កីឡាករ​កម្ពុជា​នោះ។

​លោក​ ហែម គិរី អគ្គលេខាធិការ​នៃ​សហព័ន្ធ​ខ្មែរ​កីឡា​ហែលទឹក បាន​ប្រាប់​ VOA ​ថា ​វត្តមាន​របស់​កីឡាករ​អាមេរិក​ដើម​កំណើត​ខ្មែរ​នេះ ​បាន​ជួយ​ជំរុញ និង​ផ្ដល់​ជា​កម្លាំង​ចិត្ត​យ៉ាង​ខ្លាំង​ដល់​កីឡាករ ក៏​ដូច​ជា​យុវជន​កម្ពុជា។

​លោក ​ហែម គិរី ដែល​ធ្លាប់​តំណាង​កីឡាករ​ហែល​ទឹក​កម្ពុជា​ ក្នុង​ការ​ប្រកួត​កីឡា​អូឡាំពិក​ក្នុង​រដ្ឋ ​Atlanta​ ​នា​ឆ្នាំ​១៩៩៦ បាន​សាទរ ប្រសិន​បើ Jordan​ ​អាច​ជួយ​ក្រុម​ជម្រើស​ជាតិ​កម្ពុជា។

​«សហព័ន្ធ​យើង​ពិត​ជា​មាន​ គេ​ហៅ​ថា​ភាព​សប្បាយ​រីករាយ​ បើ​សិន​កីឡាករ​ ​Jordan​ ​គាត់​អាច​នឹង​មក​ជួយ​នៅ​វិស័យ​លោត​ទឹក​នៅ​កម្ពុជា។​បាន​ន័យ​ថា​គាត់​អាច​មក​បង្ហាញ​ខ្លួន​ជា​កីឡាករ​ជម្រើស​ជាតិ​កម្ពុជា ប៉ុន្តែ​ជាក់ស្ដែង ​គាត់​ជា​កីឡាករ​ជម្រើស​ជាតិ​របស់​សហ​រដ្ឋ​អាមេរិក​ទៅ​ហើយ។ ប៉ុន្តែ​គាត់​បាន​ឆ្លើយ​មក​ហើយ​ថា​នៅ​ថ្ងៃ​អនាគត។​ គាត់​នឹង​អាចមកជួយ​ប្រទេស​កម្ពុជា​យើង​ក្នុង​វិស័យ​កីឡា​លោត​ទឹក​នេះ​នៅ​ក្នុង​ឆាក​អន្តរជាតិ។ អញ្ចឹង​សហព័ន្ធ​សម្លឹង​ និង​ព្យាយាម​ធ្វើ​យ៉ាង​ណា​ដើម្បី​ទំនាក់​ទំនង ក៏​ដូច​ជា​ជំរុញ​បន្ថែម​ដើម្បី​ឲ្យ​គាត់​មក​ចូល​រួម​ជា​តំណាង​ប្រទេស​កម្ពុជា​ក្នុង​វិស័យ​លោតទឹក»។​

​ដំណើរ​ទស្សនកិច្ច​រយៈពេល​៧ថ្ងៃ​របស់​កីឡាករ​លោត​ទឹក​អាមេរិក​ដើម​កំណើត​កម្ពុជា​ ត្រូវ​បាន​បញ្ចប់​កាល​ពី​ចុង​សប្ដាហ៍​កន្លង​ទៅ ក្រោយ​ពេល​ដែល​លោក​និង​ឪពុក​ទាំង​ពីរ​ បាន​ទស្សនា​ប្រាសាទ​អង្គរវត្ត​ដ៏​ល្បី​ល្បាញ​របស់​ខ្មែរ៕

XS
SM
MD
LG