ការភ្ញាក់ផ្អើលនិងការកោតសរសើរកើតមានឡើងក្នុងចំណោមពលរដ្ឋខ្មែរ-អាមេរិកាំងមួយចំនួននៅក្នុងរដ្ឋម៉ាស្សាឈូសិតនៅពេលដែលបានដឹងដំណឹងថាលោកស្រី អេលីហ្សាបែត វ៉ារឹន សមាជិកព្រឹទ្ធសភាប្រចាំ រដ្ឋនេះបានប្រកាសពីការស្វែងរកលទ្ធភាពឈរឈ្មោះជាបេក្ខជនប្រធានាធិបតីសហរដ្ឋអាមេរិកសម្រាប់គណបក្សប្រជាធិបតេយ្យ។
លោកស្រី អេលីហ្សាបែត វ៉ារឹន បានប្រកាសពីការសម្រេចបង្កើតគណៈកម្មាធិការស្រាវជ្រាវមួយដើម្បីឈរឈ្មោះជាបេក្ខជនប្រធានាធិបតីនេះនៅតាមបណ្តាញសង្គមកាលពីថ្ងៃច័ន្ទ។
លោកស្រីបានបញ្ជាក់បន្ថែមនៅក្នុងសន្និសីទសារព័ត៌មាននៅខាងក្រៅផ្ទះពីបញ្ហាធំៗដែលលោកស្រីយល់ថាពលរដ្ឋអាមេរិកាំងកំពុងជួបប្រទះថា៖
«ពលរដ្ឋអាមេរិកាំងដែលមានប្រាក់ចំណូលមធ្យមកំពុងរងគ្រោះហើយឱកាសសម្រាប់យុវជនយើងជាច្រើនកំពុងតែរួញទៅៗ ដូច្នេះខ្ញុំនឹងចូលប្រឡូករហូតដល់ទីបញ្ចប់»។
លោកស្រី អេលីហ្សាបែត វ៉ារឹន បានកាន់តំណែងជាសមាជិកព្រឹទ្ធសភាប្រចាំរដ្ឋម៉ាស្សាឈូសិត តាំងពីឆ្នាំ២០១៣។
រដ្ឋម៉ាស្សាឈូសិតមានពលរដ្ឋខ្មែររស់នៅចំនួនជាង៣០.០០០នាក់គឺច្រើនជាងគេលំដាប់ទីពីរបន្ទាប់ពីរដ្ឋកាលីហ្វញ៉ា។
លោក ឃុត ខោលី ពលរដ្ឋខ្មែរអាមេរិកាំងម្នាក់ដែលរស់នៅទីក្រុងឡូវែលបានបញ្ជាក់ប្រាប់វីអូអេថាលោកពេញចិត្តនិងកោតសរសើលោកស្រីអេលីហ្សាបែត វ៉ារឹន ដែលសម្រេចប្រកាសបេក្ខភាពស្វែងរកការគាំទ្រដើម្បីឈរជាបេក្ខជនប្រធានាធិបតីហើយលោកថានឹងគាំទ្រលោកស្រីរហូតដល់លោកស្រីបានឈ្នះឆ្នោតជាប្រធានាធិបតី។
លោក ខោលី បានបន្ថែមទៀតថា៖
«ខ្ញុំពេញចិត្តគាត់ជាស្ត្រីហើយមានសេចក្តីក្លាហានដើម្បីធ្វើការងារបម្រើប្រទេសជាតិទៅថ្ងៃក្រោយ»។
សែម មាស អតីតបេក្ខជនសម្រាប់សភាថ្នាក់រដ្ឋបានបញ្ជាក់ថាលោកភ្ញាក់ផ្អើលនិងសប្បាយចិត្តដែលលោកស្រីអេលីហ្សាបែត វ៉ារឹន ប្រកាសឈរជាបេក្ខជនហើយថាលោកស្រីនឹងអាចមានការគាំទ្រពីប្រជាពលរដ្ឋជាច្រើនជាពិសេសនៅក្នុងតំបន់New England នៃរដ្ឋម៉ាស្សាឈូសិតដោយសារលោកស្រីជាសមាជិកព្រឹទ្ធសភាមកពីរដ្ឋនេះស្រាប់។
លោក សែម មាសបានបន្ថែមទៀតថា៖
«ខ្ញុំជឿថាគាត់នឹងមានឱកាសជាច្រើនដែរនៅក្នុងបច្ចុប្បន្ននេះពីព្រោះថាឥឡូវនេះយើងអត់ដឹងថាអ្នកណាទៀតនឹងឈរឈ្មោះជាបេក្ខជននៅក្នុងគណបក្សប្រជាធិបតេយ្យទេដូច្នេះហើយខ្ញុំថាបើសិនជាអត់មានមនុស្សច្រើនឈរប្រឆាំងជាមួយគាត់ គាត់នឹងមានឱកាសជាច្រើននឹងអាចធ្វើជាបេក្ខជនទទួលបានការតែងតាំង»។
លោក សែម មាស ចងចាំបានពី ការណ៍ដែលលោកស្រីដែលបានគាំទ្របញ្ហាសិទ្ធិមនុស្សនិងប្រឆាំងនឹងការបណ្តេញពលរដ្ឋខ្មែរដែលបានរស់នៅសហរដ្ឋអាមេរិកជាយូរហើយប៉ុន្តែបានធ្វើខុសច្បាប់ទៅប្រទេសកម្ពុជាវិញជាដើម។
លោកបានបន្ថែមថា៖
«ឥឡូវនេះនៅក្នុងសង្គមខ្មែរយើងនឹងចាប់ផ្តើមទៅបញ្ចុះបញ្ចូលនៅក្នុងការិយាល័យរបស់គាត់ដើម្បីឱ្យគាត់ជួយដាក់សម្ពាធដល់រដ្ឋាភិបាលខ្មែរដើម្បីដោះស្រាយបញ្ហាប្រជាធិបតេយ្យនៅប្រទេសខ្មែរយើងហើយនឹងបញ្ហាដែលកើតឡើងរវាងលោកហ៊ុន សែនហើយនឹងគណបក្សប្រឆាំង។ ខ្ញុំជឿថាគាត់នឹងយកបញ្ហាហ្នឹងជាច្រើនដើម្បីយកទៅដោះស្រាយហើយនឹងដើម្បីឱ្យមានការគាំទ្រជាច្រើនពីជនជាតិអាស៊ីយើង»។
កាលពីខែវិច្ឆិកាឆ្នាំ២០១៧ លោកស្រីអេលីហ្សាបែត វ៉ារឹន រួមគ្នាជាមួយនឹងលោកសមាជិកព្រឹទ្ធសភា Edward Markey និងលោកស្រីNiki Tsongas សមាជិករដ្ឋសភា បានសរសេរលិខិតមួយទៅរដ្ឋមន្ត្រីក្រសួង ការបរទេសសហរដ្ឋអាមេរិកនាពេលនោះដោយស្នើសុំឱ្យលោកចាត់វិធានការលើរដ្ឋាភិបាលកម្ពុជាថាការចាប់លោកកឹម សុខាប្រធានគណបក្សសង្គ្រោះជាតិគឺធ្វើឱ្យខូចលទ្ធិប្រជាធិបតេយ្យ សិទ្ធិមនុស្សនិងនីតិរដ្ឋ។
លោកស្រី វ៉ារឹន ក៏បានសម្តែងការគាំទ្រដល់សេចក្តីស្នើច្បាប់HR5754 ដើម្បីដាក់ទណ្ឌកម្មរដ្ឋាភិបាលកម្ពុជាដែលបានធ្វើឱ្យខូចលទ្ធិប្រជាធិបតេយ្យផងដែរ។ នេះបើតាមការបញ្ជាក់របស់លោក ប៉ែន សុកផល ប្រធានសាខាគណបក្សសង្គ្រោះជាតិប្រចាំរដ្ឋម៉ាស្សាឈូសិត។
លោក សុកផល ក៏បានបញ្ជាក់បន្ថែមថាក្រៅពីសេចក្តីស្នើច្បាប់នេះ លោកស្រីក៏បានគាំទ្រដល់ប្រាក់បៀវត្សរ៍សម្រាប់បុគ្គលិកការងារជាស្ត្រីផងដែរ។
លោក ប៉ែន សុកផលបានបន្ថែមថា៖
«បើយើងនិយាយទៅគាត់តស៊ូរឿងស្ត្រី។ គាត់តវ៉ារឿងស្ត្រីខ្លាំងណាស់អំពីតម្លៃនៃការងារនិងការទទួលប្រាក់បៀវត្សរ៍»។
សមាជិកគណបក្សប្រជាធិបតេយ្យឯទៀតដែលគេរំពឹងថានឹងឈរឈ្មោះដែរនោះមានរួមទាំងលោក Bernie Sanders សមាជិកព្រឹទ្ធសភា នៃរដ្ឋVermont លោកJoe Biden អតីតអនុប្រធានាធិបតី និងលោកស្រី Amy Klobuchar សមាជិកព្រឹទ្ធសភានៃរដ្ឋ មីនីសូតាជាដើម។
គណបក្សប្រជាធិបតេយ្យគ្រោងនឹងធ្វើមហាសន្និបាតគណបក្សពីថ្ងៃទី១៣ដល់១៦ខែកក្កដាឆ្នាំ២០២០ដែលក្នុងពិធីនោះនឹងមានការតែងតាំងបេក្ខជនប្រធានាធិបតីជាផ្លូវការដើម្បី ប្រកួតប្រជែងនឹងលោកប្រធានាធិបតីដូណាល់ ត្រាំ។
ការបោះឆ្នោតប្រធានាធិបតីនឹងធ្វើឡើងនៅថ្ងៃទី៣ខែវិច្ឆិកាឆ្នាំ២០២០៕
