គណៈកម្មាធិការរៀបចំការបោះឆ្នោតនៅកម្ពុជាបាននិយាយកាលពីថ្ងៃចន្ទថា ពួកគេនឹងស៊ើបអង្កេត ពាក្យបណ្តឹងប្រឆាំងនឹងអតីតសមាជិកគណបក្សប្រឆាំងប្រហែល៣០នាក់ដែលបានអំពាវនាវឱ្យធ្វើពហិការការបោះឆ្នោតនៅថ្ងៃអាទិត្យទី២៩កក្កដានេះ។
គណបក្សសង្គ្រោះជាតិដែលជាគណបក្សប្រឆាំងដ៏សំខាន់ត្រូវបានរំលាយកាលពីឆ្នាំមុនដែលជាផ្នែកមួយនៃការបង្ក្រាបយ៉ាងចាស់ដៃដោយលោកនាយករដ្ឋមន្រ្តីហ៊ុន សែនដែលកំពុងស្វែងបន្តអំណាចបន្ទាប់ពីគណបក្សប្រជាជនកម្ពុជារបស់លោកហៀបនឹងចាញ់ក្នុងការបោះឆ្នោតឆ្នាំ២០១៣។
យុទ្ធនាការម្រាមដៃស្អាតដែលដឹកនាំដោយសមាជិកនិរទេសខ្លួននៃគណបក្សប្រឆាំងសំដៅធ្វើពហិការការបោះឆ្នោត។ អាជ្ញាធរបាននិយាយថាការអំពាវនាវឱ្យធ្វើពហិការមិនចូលរួមបោះឆ្នោតគឺខុសច្បាប់ ប៉ុន្តែក្រុមសិទ្ធិមនុស្សអះអាងថា ការអំពាវនាវនេះមិនប្រឆាំងច្បាប់ទេ។
លោក វ៉ែន ពន ប្រធានគណៈកម្មាធិការបោះឆ្នោតនៅខេត្តបាត់ដំបងបានថ្លែងថា មន្រ្តីគណបក្សប្រជាជនកម្ពុជាបានដាក់ពាក្យបណ្តឹងប្តឹងអតីតសមាជិកគណបក្សសង្គ្រោះជាតិ។ លោក វ៉ែន ពនបានប្រាប់ ទីភ្នាក់ងារព័ត៌មាន Reuters កាលពីថ្ងៃចន្ទថា គណៈកម្មាធិការនេះនឹងធ្វើការស៊ើបអង្កេត។ លោក ហ៊ុន សែន ដែលកាន់អំណាចជាង៣៣ឆ្នាំរំពឹងថា នឹងឈ្នះការបោះឆ្នោតនៅថ្ងៃអាទិត្យនេះ ដោយសារគ្មានគូប្រជែងជាសក្តានុពល ក្រោយពីបានរំលាយគណបក្សសង្គ្រោះជាតិ។
លោក កឹម សុខា មេដឹកនាំគណបក្សសង្គ្រោះជាតិ ត្រូវបានចាប់ឃុំឃាំងកាលពីខែកញ្ញាដោយចោទប្រកាន់ពីបទក្បត់ជាតិ ដែលអ្នកគាំទ្ររបស់លោកនិយាយថាមកពីរឿងនយោបាយ។ បច្ចុប្បន្ននេះលោកកំពុងជាប់ក្នុងពន្ធនាគារត្រពាំងថ្លុងជិតព្រំដែនកម្ពុជាជាមួយវៀតណាម។ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានថ្លែងថា គណបក្សកាន់អំណាចសុំឲ្យដាក់ពិន័យសមាជិកគណបក្សប្រឆាំងរហូតដល់៥ពាន់ដុល្លារចំពោះការអំពាវនាវមិនឱ្យប្រជាជនទៅបោះឆ្នោត។ លោក សុខ ឥសានបាននិយាយថានេះគឺជាការញុះញង់ និងល្បិចកលរារាំងមិនឲ្យពលរដ្ឋទៅបោះឆ្នោតដែលផ្ទុយនឹងសិទ្ធិរបស់ពលរដ្ឋដូចបានចែងនៅក្នុងរដ្ឋធម្មនុញ្ញ ។
លោក ជា ឈីវ អតីតប្រធានគណបក្សសង្គ្រោះជាតិនៅខេត្តបាត់ដំបងដែលមានឈ្មោះក្នុងបណ្តឹងនេះ បាននិយាយថា ការធ្វើពហិការការបោះឆ្នោតមិនមែនខុសច្បាប់ទេ។ លោកបានប្រាប់ទីភ្នាក់ងារព័ត៌មាន Reuters ថា «ខ្ញុំនឹងមិនបោះឆ្នោតទេ បើគ្មានគណបក្សខ្ញុំចូលចិត្ត ហើយនេះជាសេរីភាពនៃការបញ្ចេញមតិដែលត្រូវបានធានាដោយច្បាប់» ។
លោក Phil Robertson អនុប្រធានផ្នែកអាស៊ីនៃអង្គការឃ្លាំមើលសិទិ្ធមនុស្សបានសម្តែងការព្រួយបារម្ភ។ នៅពេលប្រជាជនចូលបោះឆ្នោត ពួកគេត្រូវតែជ្រលក់ម្រាមដៃក្នុងទឹកខ្មៅរបស់ឥណ្ឌា ដូច្នេះអាជ្ញាធរនឹងអាចកំណត់យ៉ាងច្បាស់ថា តើនរណាបានទៅបោះឆ្នោត អ្នកណាមិនបានទៅបោះឆ្នោត។ អ្នកមិនទៅបោះឆ្នោតអាចប្រឈមនឹងការបំភិតបំភ័យ និងការសួរដេញដោល៕
