គណៈកម្មការទន្លេមេគង្គគឺជាស្ថាប័នអន្តរប្រទេសដែលមានតួនាទីសម្របសម្រួលការអភិវឌ្ឍនិងថែរក្សាទន្លេមេគង្គ។ បច្ចុប្បន្ន លេខាធិការដ្ឋាននៃគណៈកម្មការនេះមានការិយាល័យនៅក្នុងប្រទេសកម្ពុជា និងប្រទេសឡាវដើម្បីបំពេញការងាររបស់ខ្លួន។ ថ្មីៗនេះ លោកនាយករដ្ឋមន្ត្រីហ៊ុន សែនបានប្រកាសថា កម្ពុជានឹងរុះរើការិយាល័យនៃលេខាធិការដ្ឋាននេះចេញពីកម្ពុជាឱ្យទៅតាំងនៅក្នុងប្រទេសឡាវ។
លោកនាយករដ្ឋមន្ត្រី ហ៊ុន សែន បានប្រកាសថា កម្ពុជាបានព្រមព្រៀងជាមួយប្រទេសឡាវក្នុងការរុះរើលេខាធិការដ្ឋាននៃគណៈកម្មការទន្លេមេគង្គនៅក្នុងប្រទេសកម្ពុជាឱ្យទៅតាំងស្នាក់ការនៅក្នុងប្រទេសឡាវ។
លោក ហ៊ុន សែន អះអាងថា ការសម្រេចកែសម្រួលឱ្យមានការិយាល័យតែមួយនេះគឺដើម្បីសម្រួលដល់ដំណើរការនៃការងារដែលពាក់ព័ន្ធនឹងលេខាធិការដ្ឋាននេះ ដោយសារបច្ចុប្បន្ន លេខាធិការដ្ឋាននេះមានស្នាក់ការក្នុងប្រទេសឡាវ និងក្នុងប្រទេសកម្ពុជា។
ការប្រកាសនេះបានធ្វើឡើងនៅក្នុងពិធីចាក់បេតុងភ្ជាប់មុខតំណស្ពានមួយក្នុងស្រុកកោះធំ ខេត្តកណ្តាល កាលពីព្រឹកថ្ងៃច័ន្ទ។
លោកនាយករដ្ឋមន្ត្រីបានថ្លែងថា ក្នុងដំណើររបស់លោកទៅកាន់ប្រទេសឡាវកាលពីសប្ដាហ៍មុន លោកបានពិភាក្សាជាមួយប្រធានាធិបតី និងនាយករដ្ឋមន្ត្រីឡាវ ហើយបានឯកភាពគ្នាក្នុងការរួមបញ្ចូលស្នាក់ការនៃលេខាធិការដ្ឋាននៃគណៈកម្មការទន្លេមេគង្គឱ្យស្ថិតនៅក្នុងប្រទេសឡាវតែមួយ។
លោក ហ៊ុន សែន បានថ្លែងថា៖
«នេះជាការព្រមព្រៀងមួយដែលឯកឧត្ដមលឹម គានហោ ក្នុងឋានៈរដ្ឋមន្ត្រីធនធានទឹក និងប្រធានគណៈកម្មការទន្លេមេគង្គអន្តរជាតិនឹងបន្តការពិភក្សាលើបញ្ហានេះ ដើម្បីនាំយកលេខាធិការដ្ឋាននេះឱ្យវានៅជុំគ្នា។ ព្រោះឥឡូវ [បើ]គេត្រូវការធ្វើការលេខាធិការដ្ឋាន គេទៅវៀងច័ន្ទផង គេមកភ្នំពេញផង។ បើអញ្ចឹងឥឡូវគឺថា ស្រុះស្រួលគ្នាដាក់ទៅវៀងច័ន្ទទៅ! ឯកម្ពុជាគឺនឹងទទួលការបាននូវការគាំទ្រទាំងឡាយនៅក្នុងក្របខណ្ឌមិត្តភក្ដិអាស៊ានរបស់យើងស្ដីអំពីមជ្ឈមណ្ឌលមីនរបស់អាស៊ាននៅក្នុងទីក្រុងភ្នំពេញវិញ។ នេះគឺជាការជួយគ្នាទៅវិញទៅមក»។
ទោះយ៉ាងណា លោក ហ៊ុន សែន បញ្ជាក់ថា កម្ពុជានៅតែរក្សាទុកមជ្ឈមណ្ឌលកាត់បន្ថយជំនន់ដែលមជ្ឈមណ្ឌលនេះធ្វើការទៅលើការព្យាករណ៍ទឹកជំនន់នៅតាមដងទន្លេបាសាក់។
VOA មិនអាចសុំការអត្ថាធិប្បាយពីលោកលឹម គានហោ រដ្ឋមន្ត្រីក្រសួងធានធានទឹក និងឧតុនិយម និងជាប្រធានគណៈកម្មការជាតិទន្លេមេគង្គកម្ពុជា ដែលទទួលភារកិច្ចពីលោកនាយករដ្ឋមន្ត្រីដើម្បីធ្វើការលើរឿងនេះនោះទេ។
លោកតែ ណាវុធ អគ្គលេខាធិការគណៈកម្មាធិការជាតិទន្លេមេគង្គមានប្រសាសន៍ថា ភាគីពាក់ព័ន្ធកំពុងទាក់ទងគ្នាដើម្បីធ្វើការលើរឿងនេះ។ ទោះយ៉ាងណា លោកថា លោកមិនទាន់ទទួលបានព័ត៌មានលម្អិតពាក់ព័ន្ធនឹងការរុះរើការិយាល័យលេខាធិការដ្ឋានទន្លេមេគង្គនេះនោះទេ។
បើតាមលោកតែ ណាវុធ ការិយាល័យលេខាធិការដ្ឋាននៃគណៈកម្មការទន្លេមេគង្គមានបុគ្គលិកជាតិ និងអន្តរជាតិសរុបជាង៣០នាក់ ហើយភាគីពាក់ព័ន្ធកំពុងពិភាក្សាថា តើមន្ត្រីទាំងនោះនឹងត្រូវទៅបំពេញការងារនៅការិយាល័យក្នុងប្រទេសឡាវឬយ៉ាងណា។
លោកមានប្រសាសន៍ថា៖
«កំពុងធ្វើការរឿងហ្នឹង! មន្ត្រីដែល[នៅលេខាធិការធិដ្ឋាននេះហ្នឹងវាមិនត្រូវទៅ! មន្ត្រីថ្នាក់តំបន់ទេតើ! អាហ្នឹងមន្ត្រីថ្នាក់តំបន់ គេត្រូវទៅធ្វើការអញ្ចឹងទៅណា! នៅក្នុងលេខាធិការដ្ឋានមានមន្ត្រី៤ប្រទេសធ្វើការ»។
លោកតែ ណាវុធឱ្យដឹងដែរថា កន្លងមកការិយាល័យលេខាធិការដ្ឋាននៃគណៈកម្មការទន្លេមេគង្គស្ថិតនៅក្នុងប្រទេសតែមួយប៉ុណ្ណោះ។ ប៉ុន្តែលោកថា ចាប់ពីឆ្នាំ២០១១មក លេខាធិការដ្ឋាននេះមានការិយាល័យនៅក្នុងប្រទេសចំនួន២ ដោយលោកអះអាងថា ដោយសារការរុះរើការិយាល័យនេះត្រូវការចំណាយច្រើន។
លោក អ៊ូ វីរៈ ប្រធានវេទិកាអនាគត មានប្រសាសន៍ថា ការរុះរើការិយាល័យលេខាធិការដ្ឋាននៃគណៈកម្មការទន្លេមេគង្គនេះនឹងមិនធ្វើឱ្យកម្ពុជាមានការខាតបង់ជាដុំកំភួននោះទេ។ លោកថា អ្វីដែលកម្ពុជាខាតបង់គឺឱកាសការងារសម្រាប់ពលរដ្ឋកម្ពុជានៅក្នុងស្ថាប័ននេះ ដោយលោកថា ពេលត្រូវផ្លាស់ទៅប្រទេសឡាវ នោះ តួនាទីមួយចំនួននឹងត្រូវកាន់កាប់ដោយពលរដ្ឋឡាវវិញ។
គណៈកម្មការទន្លេមេគង្គ (Mekong River Commission) គឺជាស្ថាប័នអន្តររដ្ឋាភិបាលដែលមានបេសកកម្មជំរុញនិងសម្របសម្រួលការងារគ្រប់គ្រង និងអភិវឌ្ឍទឹក និងទន្លេមេគង្គប្រកបដោយនិរន្តរភាពដើម្បីជាផលប្រយាជន៍របស់ប្រទេសជាសមាជិក។ គណៈកម្មការនេះមានប្រទេសជាសមាជិកចំនួន៤គឺប្រទេសកម្ពុជា ថៃ ឡាវ និងវៀតណាម៕
