គ្រោះរាំងស្ងួតនៅក្នុងតំបន់អាស៊ីអាគ្នេយ៍ កំពុងកាន់តែធ្វើឲ្យមានការព្រួយបារម្ភនៅតាមជនបទក្នុងប្រទេសកម្ពុជានិងវៀតណាម ដែលនៅទីនោះកម្រិតជាតិប្រៃពីទឹកសមុទ្រកាន់តែកើនឡើងនៅក្នុងទន្លេមេគង្គ។
ប្រជាសហគមន៍ដែលពឹងអាស្រ័យលើទឹកទន្លេមេគង្គ ក៏មានមន្ទិលអំពីការសន្យាថ្មីៗពីប្រទេសឡាវថា ប្រទេសនេះនឹងគោរពសិទ្ធិរបស់ប្រទេសនៅខ្សែទឹកខាងក្រោម នៅពេលដែលខ្លួនសាងសង់ទំនប់វារីអគ្គិសនីតាមដងទន្លេមេគង្គនោះ។
ការធានាអះអាងពីរដ្ឋាភិបាលក្រុងវៀងច័ន្ទនេះ ចេញមកពីលោក Bounhang Vorachith ដែលត្រូវបានតែងតាំងជាអគ្គលេខាធិការបក្សកុម្មុយនិស្តឡាវកាលពីពេលថ្មីៗនេះ។ ការអះអាងរបស់លោកបែបនេះ បានធ្វើឲ្យមានក្តីសង្ឃឹមថា លោកប្រហែលជាប្រើវិធីសាស្ត្របែបសម្រុះសម្រួលជាងមុន ដើម្បីចរចាជាមួយប្រទេសដែលប្រើប្រាស់ទន្លេមេគង្គរួមគ្នា។
លោក Bounhang Vorachith បានថ្លែងប្រាប់រដ្ឋាភិបាលកម្ពុជាកាលពីពេលថ្មីៗនេះ ទាក់ទងនឹងគម្រោងរបស់ឡាវក្នុងការសាងសង់ទំនប់ចំនួន១១ តាមដងទន្លេមេគង្គ និងផលប៉ះពាល់នៃទំនប់ទាំងនេះទៅលើប្រទេសជិតខាងរបស់ខ្លួនថា «ប្រទេសឡាវនឹងខំប្រឹងប្រែងធានាថា នឹងមិនឲ្យមានផលប៉ះពាល់នោះទេ»។
លោក Bounhang Vorachith ក៏បានរំឭកលោកនាយករដ្ឋមន្ត្រី ហ៊ុន សែន ផងដែរថា ប្រទេសឡាវបានសិក្សាពីផលប៉ះពាល់នៃទំនប់ទាំងអស់នេះហើយ ហើយបានសន្យាថានឹងកម្រិតផលប៉ះពាល់នៃទំនប់វារីអគ្គិសនី ដន សាហុង ដ៏ចម្រូងចម្រាសនោះ។ កាសែតភ្នំពេញប៉ុស្តិ៍បានរាយការណ៍ថា ទំនប់វារីអគ្គិសនី ដន សាហុង នឹងត្រូវសាងសង់នៅជាប់ព្រំដែនប្រទេសកម្ពុជាប៉ែកខាងជើង៕
