ភ្ជាប់​ទៅ​គេហទំព័រ​ទាក់ទង

អ្នក​វិភាគ៖ កម្ពុជា​ខ្វះ​យន្តការ​ដាក់​ឱ្យ​អ្នក​នយោបាយ​គោរព​ការ​សន្យា​ពេល​ឃោសនា


លោក​អ៊ូ វីរៈ ​នាយក​មជ្ឈមណ្ឌល​សិទ្ធិ​មនុស្ស​កម្ពុជា​

វ៉ាស៊ីនតោន៖ ប្រទេស​កម្ពុជា​នៅ​មិន​ទាន់​មាន​យន្ត​ការ​គ្រប់គ្រាន់ក្នុង​ការ​ចាប់​ឱ្យ​អ្នក​នយោបាយ​ទទួល​ខុសត្រូវ​ចំពោះ​ការ​សន្យារបស់​ខ្លួន​ដែល​បាន​ធ្វើ​ឡើងនៅ​រាល់ពេល​ឃោសនា​បោះឆ្នោត ​ហើយការ​ពិភាក្សា​លើ​វិធី​ដើម្បី​ឱ្យ​សម្រេច​បាន​តាម​អ្វី ​ដែល​ឃោសនា​នោះ​ក៏​មិន​ទាន់​មាន​លក្ខណៈ​ស៊ីជម្រៅដែរ។ នេះ​បើ​តាម​ការ​បញ្ជាក់​របស់​សកម្មជន​ការពារ​សិទ្ធិ​មនុស្ស​កម្ពុជា។​

លោក​អ៊ូ វីរៈ ​នាយក​មជ្ឈមណ្ឌល​សិទ្ធិ​មនុស្ស​កម្ពុជា​បាន​បញ្ជាក់​នៅ​ក្នុង​កម្មវិធី​ហេឡូ​វីអូអេ​កាលពី​ថ្ងៃ​ច័ន្ទ​ថា៖ «ការធ្វើ​នយោបាយ​នៅ​ក្នុង​ប្រទេស​កម្ពុជា​មិន​ទាន់​បាន​ស៊ីជម្រៅ​ទៅ​ដល់​ថ្នាក់​គោល​នយោបាយ​ឬក៏​ការ​ជជែក​តតាំង​គ្នា​ពី​គោល​គំនិត​ដើម្បី​ដោះស្រាយ​បញ្ហា​ជាតិ​នៅ​ឡើយ​ទេ​ ច្រើន​តែ​ហាក់​ដូច​ជា​មាន​លក្ខណៈ​បុគ្គល​ច្រើន​ជាង​ហើយ​កន្លែង​ខ្លះ​គ្រាន់​តែ​ជា​លក្ខណៈ​តតាំង​សារ​នយោបាយ​ដើម្បី​ទាក់​ទាញ​ការ​គាំទ្រ​តែ​ប៉ុណ្ណោះ»។

លោ​ក​វីរៈ ​បាន​បញ្ជាក់​បន្ថែម​ថា​នៅ​សហរដ្ឋ​អាមេរិក​ដោយ​សារ​តែ​ការចូលរួម​របស់បណ្តាញ​ព័ត៌មាន​និង​ក្រុម​អង្គការ​សង្គម​ស៊ីវិល​ដែល​មាន​យ៉ា​ង​ច្រើន ​បូក​រួម​ទាំង​ចំណេះដឹង​ខ្ពង់ខ្ពស់​របស់​អ្នក​បោះឆ្នោត​នាំ​ឱ្យ​អ្វី​ដែល​អ្នក​នយោបាយ​បាន​សន្យាក្នុង​យុទ្ធនាការ​បោះឆ្នោត​ពិបាក​នឹង​គេច​ផុត​ពី​ការ​អង្កេត​មើល​និង​ដាក់​ឱ្យ​ទទួល​ខុស​ត្រូវណាស់។

យ៉ាង​ណា​ក៏​ដោយ​លោក​អ៊ូ វីរៈ ​ស្វាគមន៍​ដោយ​ប្រយ័ត្ន​ប្រយែង​ចំពោះ​និន្នាការ​ថ្មី​ដែល​អ្នក​ដឹកនាំ​កំពុង​តែ​ប្រើ​ប្រាស់​នៅ​ក្រោយ​ពី​ការ​បោះឆ្នោត​ជាតិ​ថ្ងៃ​ទី​២៨ខែ​កក្កដា​ នោះ​គឺ​ការបណ្តុះ​បណ្តាល​មនុស្ស​ជំនាន់​ថ្មី​សម្រាប់​បន្ត​វេនក្នុង​នយោបាយ​កម្ពុជា។

នៅ​ក្នុង​រដ្ឋាភិបាល​ថ្មី​នេះ ​គណបក្ស​កាន់​អំណាច​របស់​លោក​នាយករដ្ឋមន្ត្រី​ហ៊ុន សែន​បាន​តែងតាំង​មន្ត្រី​ក្មេងៗ​ឱ្យ​កាន់​តំណែង​ខ្ពស់​ៗ​ជាច្រើន​ដែល​មាន​រហូត​ដល់​ថ្នាក់​រដ្ឋមន្ត្រី នៅ​ក្រោយ​ពី​គណបក្ស​នេះ​បាន​ឈ្នះ​គណបក្ស​ប្រឆាំង​ទាំង​ប្រផិត​ប្រផើយនៅ​ក្នុង​ការ​បោះឆ្នោត​មួយ​ដែល​ប្រកប​ទៅ​ដោយ​រឿង​ចម្រូងចម្រាស។

ប៉ុន្តែ​លោ​ក​រិះគន់​ថា​ការ​ដំឡើង​ឋានៈ​នេះ​មាន​លក្ខណៈ​ជា​គ្រួសារ​និយម​ច្រើន​ជាង​ផ្អែក​លើ​ស្នាដៃ​និង​ស្រប​តាម​គោលការណ៍​ប្រជាធិបតេយ្យ​ក្នុង​បក្ស។​

«បើ​យើង​មើល​មែនទែន យើង​ឃើញ​ថា​គណបក្ស​ប្រជាជន​កម្ពុជា​កំពុង​តែ​រៀបចំ​កូន​ចៅ​របស់​ខ្លួន...​បាន​ន័យ​ថា​គណបក្ស​នេះ​បាន​រៀបចំ​រួច​ហើយ​គឺ​កា​របន្ត​វេន​របៀប​គ្រួសារ»។​
រដ្ឋ​មន្ត្រី​ថ្មី​នៅ​ក្រសួង​បរិស្ថាន​គឺ​លោក​ សាយ សំអាល់​ គឺ​ជា​កូនប្រុស​របស់​លោក​សាយ ឈុំ អគ្គលេខាធិការ​នៃ​គណបក្សនិង​ជា​អនុប្រធាន​ព្រឹទ្ធសភា។

លោក​ផៃ ស៊ីផាន​រដ្ឋ​លេខាធិការ​ទីស្តីការ​គណៈរដ្ឋ​មន្ត្រី​បាន​ថ្លែង​ការពារ​ចំពោះ​ការតែង​តាំងនេះ។​

«មន្ត្រី​ដែល​ទទួល​បន្ទុក​ធំ​ជា​រដ្ឋ​មន្ត្រី​ ជា​អ្វីៗ​ហ្នឹង​គឺ​ត្រូវ​តែ​មាន​មូលដ្ឋាន​ដែល​ជា​មរតក​នយោបាយ។ នេះ​មិន​ខុសគ្នា​ពី​សហរដ្ឋ​អាមេរិក ​ដូច​ជា​ត្រកូល​កេណឺឌី ​ដែល​យើង​ឃើញ ​ដូច​ជា​នៅ​ក្នុង​តំបន់​គឺ​កូន​លោក​ លី​ ក្វាន់​យូ ​ក៏ ​ដូច​ជា​នៅ ​ឥណ្ឌូនេស៊ី​គឺ​កូន​ឯកឧត្តម​ ស៊ូកាណូ។ នេះ​គឺ​ជា​មរតក​នយោបាយ»។

លោក​បាន​បញ្ជាក់​ថា​ការដែល​កូនចៅ​របស់​អ្នក​ដឹកនាំ​ទាំង​នោះ ​មើល​ឃើញ​នូវ​របៀប​ធ្វើ​ការងារ​របស់​ឱពុក​និង​ទទួល​បាន​ចំណេះ​ដឹង​ខ្ពង់​ខ្ពស់​ពី​ក្រៅ​ប្រទេសគឺ​អាច​ជួយ​គេ​ឱ្យ​ស្ថាបនា​ខ្លួនក្លាយ​ជា​អ្នក​ដឹកនាំ​បាន។

ទាំង​លោក​ផៃ​ ស៊ីផាន​និង​លោក​អ៊ូ​ វីរៈ​យល់​ស្រប​គ្នា​ថា​ការ​ចាក​ចេញ​របស់​មន្ត្រី ​ចាស់ៗ​ដែល​ធ្វើ​ការ​យូរ​ហើយ​មក​កាន់​តំណែង​កិត្តិយស​ជា​ទីប្រឹក្សា​ អាច​នឹង​ជួយ​ជំរុញ​អ្នក​ដែល​កាន់តំណែង​ថ្មី​រីក​ចម្រើន​បាន​ល្អ​និង​លឿន​ជា​ជាង​ការ​ដែល​គណបក្ស​ត្រូវ​ធ្វើ​ការ​កែ​ទម្រង់​ដោយ​សារ​តែ​គ្មាន​ជម្រើស​និង​ដើរ​មក​ដល់​ផ្លូវ​ទាល់ច្រក៕
XS
SM
MD
LG