លោកនាយករដ្ឋមន្ត្រី ហ៊ុន សែន បានមានប្រសាសន៍កាលពីថ្ងៃចន្ទថា ថវិកាចំនួន៤០លានដុល្លារបន្ថែមទៀតនឹងត្រូវចំណាយទៅលើការទិញអាវុធពីប្រទេសចិនដើម្បីធ្វើទំនើបកម្មយោធារបស់ប្រទេសនៅអាស៊ីអាគ្នេយ៍នេះ។
ចំណងទាក់ទងខាងយោធារបស់កម្ពុជាជាមួយសម្ព័ន្ធមិត្តចិនកំពុងត្រូវបានតាមដានពិនិត្យពិច័យកាន់តែខ្លាំងឡើង បន្ទាប់ពីមានការព្រួយបារម្ភរបស់សហរដ្ឋអាមេរិក និងមានរបាយការណ៍និយាយអំពីកិច្ចព្រមព្រៀងសម្ងាត់អនុញ្ញាតឲ្យកងទ័ពចិនប្រើមូលដ្ឋានយោធាជើងទឹករបស់កម្ពុជា ប៉ុន្តែកម្ពុជាបានបដិសេធ។
លោកហ៊ុនសែនបានថ្លែងថា ប្រាក់៤០លានដុល្លារដែលប្រទេសកម្ពុជានឹងចំណាយនេះគឺជាការចំណាយបន្ថែមទៅលើទឹកប្រាក់សរុប២៩០លានដុល្លារដែលចិនបានផ្តល់ឱ្យរួចហើយសម្រាប់ការធ្វើទំនើបកម្មកងកម្លាំងកម្ពុជា។
លោកបានថ្លែងដូច្នេះក្នុងដំណើរទស្សនកិច្ចទៅកាន់ពហុកីឡដ្ឋាននៅរាជធានីភ្នំពេញឧបត្ថម្ភដោយជនជាតិចិន។ លោក ហ៊ុន សែន បានមានប្រសាសន៍ថា អាវុធដែលត្រូវទិញរួមមានកាំភ្លើងរាប់ម៉ឺនដើមដើម្បីជំនួសអាវុធចាស់ៗ ហើយអាវុធទាំងនោះកំពុងត្រូវបានដឹកជញ្ជូនមកហើយ។
ក្នុងសុន្ទរកថាផ្សាយផ្ទាល់តាមហ្វេសប៊ុក លោក ហ៊ុន សែន បានថ្លែងថា «ខ្ញុំចង់ពង្រឹងកងទ័ព»។ លោកហ៊ុន សែន បានច្រានចោលរបាយការណ៍របស់ទស្សនាវដ្តី Wall Street Journal កាលពីសប្តាហ៍មុនដែលថា ប្រទេសចិនបានធ្វើកិច្ចព្រមព្រៀងសម្ងាត់ជាមួយប្រទេសកម្ពុជាក្នុងឆ្នាំនេះដើម្បីអនុញ្ញាតឱ្យមានការដាក់កងទ័ពចិននៅមូលដ្ឋានសមុទ្ររាម។ របាយការណ៍នេះបានដកស្រង់សម្តីរបស់មន្ត្រីសហរដ្ឋអាមេរិក និងមន្ត្រីសម្ព័ន្ធមិត្ត។ សហរដ្ឋអាមេរិកក៏បានសម្តែងការព្រួយបារម្ភផងដែរថា មូលដ្ឋានទ័ពជើងទឹករាមនៅភាគខាងត្បូងប្រទេសកម្ពុជាអាចនឹងទទួលកងទ័ពពីប្រទេសចិន៕
