មេដឹកនាំគណបក្សគ្រប់គ្រងប្រទេសលោកនាយករដ្ឋមន្រ្តី ហ៊ុន សែន កាលពីថ្ងៃអង្គារ បានអំពាវនាវឱ្យគ្រប់ភាគីពាក់ព័ន្ធចាប់ផ្តើមចរចា ដើម្បីឈានទៅសម្រេចបទឈប់បាញ់មួយនៅតំបន់ហ្កាហ្សា(Gaza)។
លោក ហ៊ុន សែន លើកឡើងបែបនេះ នៅក្នុងសារមួយដែលបង្ហោះនៅលើទំព័រហ្វេសប៊ុករបស់លោក។
លោក ហ៊ុន សែន ថ្លែងថាប្រសិនបើមិនមានបទឈប់បាញ់មួយទេ តំបន់ហ្កាហ្សានឹងក្លាយទៅជា«វាលពិឃាដ និងជាកន្លែងកប់ខ្មោចដ៏ធំជាងគេនៅលើពិភពលោក»។
លោក ហ៊ុន សែន បន្ថែមថាកន្លងមកមានការអំពាវនាវពីសហគមន៍អន្តរជាតិឱ្យមានបទឈប់បាញ់មួយនៅតំបន់ហ្កាហ្សា ប៉ុន្តែត្រូវបានបដិសេធដោយនាយករដ្ឋមន្ត្រីអ៊ីស្រាអែល ដោយសារមិនមានការដោះលែងចំណាប់ខ្មាំង។
លោកបញ្ជាក់ថា៖ «ប្រសិនជាពាក្យនេះ ជាពាក្យរបស់នាយករដ្ឋមន្ត្រីអ៊ីស្រាអែល ដូចសារព័ត៌មានចុះផ្សាយពិតប្រាកដមែន ខ្ញុំមើលឃើញថាវាជាច្រកចេញឆ្ពោះទៅរកបទឈប់បាញ់មួយ ប្រសិនបើក្រុមហាម៉ាស់យល់ព្រមដោះលែងចំណាប់ខ្មាំង ដើម្បីដោះដូរជាមួយបទឈប់បាញ់»។
លោក ហ៊ុន សែន ក៏បានអំពាវនាវដល់អគ្គលេខាធិការអង្គការសហប្រជាជាតិ និងភាគីពាក់ព័ន្ធ ឱ្យចាប់ផ្តើមរកការចរចាដោយផ្តើមចេញពីការដោះលែងចំណាប់ខ្មាំង ដោយក្រុមហាម៉ាស់ និងការសន្យារបស់អ៊ីស្រាអែលថានឹងឈប់បាញ់ ប្រសិនមានការដោះលែងចំណាប់ខ្មាំង។
លោក ហ៊ុន សែន បញ្ជាក់បន្ថែមថា៖ «ខ្ញុំក៏សូមអំពាវនាវដល់ក្រុមហាម៉ាស់នៃប៉ាឡេស្ទីន សូមធ្វើការដោះលែងចំណាប់ខ្មាំង ដើម្បីឈានឆ្ពោះទៅរកបទឈប់បាញ់ដែលជាផលប្រយោជន៍អាយុជីវិត នៃប្រជាជនប៉ាឡេស្ទីន នៅតំបន់ហ្កាហ្សាស្រ្ទីប(Gaza Strip)ទាំងមូល»។
កាលពីថ្ងៃអង្គារ សារព័ត៌មានអន្តរជាតិបានចុះផ្សាយថានាយករដ្ឋមន្ត្រីអ៊ីស្រាអែលលោក Benjamin Netanyahu បាននិយាយថាប្រទេសអ៊ីស្រាអែលនឹងពិចារណាអំពីការផ្អាកប្រតិបត្តិការយោធារយៈពេលខ្លី ដើម្បីអនុញ្ញាតឱ្យជំនួយមនុស្សធម៌បានចូលទៅដល់តំបន់ហ្កាហ្សា(Gaza) ឬក៏ដើម្បីអនុញ្ញាតឱ្យចំណាប់ខ្មាំងដែលក្រុមសកម្មប្រយុទ្ធហាម៉ាស់(Hamas) ចាប់ឃុំអាចចាកចេញបាន ប៉ុន្តែលោកបានច្រានចោលនូវកិច្ចឈប់បាញ់គ្នាជាទូទៅនៅក្នុងសង្គ្រាមរយៈពេលមួយខែកន្លងមកនេះរបស់អ៊ីស្រាអែលជាមួយនឹងក្រុមហាម៉ាស់។
លោក Netanyahu បានថ្លែងប្រាប់ទូរទស្សន៍ABC News ថាលោកប្រមើលមើលឃើញថាប្រទេសអ៊ីស្រាអែលនឹង«មានការទទួលខុសត្រូវផ្នែកសន្តិសុខជារួម» នៅក្នុងតំបន់ហ្កាហ្សាសម្រាប់រយៈពេលមិនកំណត់មួយនៅក្រោយពេលដែលខ្លួនសម្រេចបាននូវគោលបំណងនៃការកម្ទេចក្រុមហាម៉ាស់បានទាំងស្រុង។
រដ្ឋាភិបាលកម្ពុជាបានព្យាយាមរក្សាជំហរកណ្តាលទៅលើសង្រ្គាមដែលកំពុងកើតឡើងនេះ។ កាលពីថ្ងៃទី២៧ ខែតុលា ឆ្នាំ២០២៣ អ្នកស្រី អ៊ាត សោភា តំណាងអចិន្ត្រៃយ៍កម្ពុជាប្រចាំអង្គការសហប្រជាជាតិ នៅទីក្រុងញូវយ៉ក បានលើកឡើងក្នុងសេចក្តីថ្លែងការណ៍មួយស្តីពីជម្លោះប៉ាឡេស្ទីន-អ៊ីស្រាអែល ដោយអំពាវនាវឱ្យ«បញ្ឈប់ការចង្អុលដៃចោទដាក់គ្នា» និងសូមអនុញ្ញាតឱ្យមានសេចក្តីស្រឡាញ់ចំពោះមនុស្សជាតិទាំងអស់នៅដោយគ្មានការប្រកាន់ពូជសាសន៍ និងជំនឿ។
សេចក្តីថ្លែងការណ៍បញ្ជាក់ថា៖ «ជម្លោះប៉ាឡេស្ទីន-អ៊ីស្រាអែលគឺជាបញ្ហាដ៏ស្មុគស្មាញ និងផុយស្រួយបំផុត។ ហេតុដូចនេះ កម្ពុជាសូមលើកឡើងនូវជំហរជាគោលការណ៍របស់ខ្លួនលើបញ្ហានេះ ដោយមិនចូលរួមក្នុងសេចក្តីថ្លែងការណ៍ដែលធ្វើឡើងក្នុងនាមក្រុមណាមួយនោះទេ»។
ការបាញ់ប្រហារនៅតំបន់ហ្កាស្សាកាលពីកន្លងទៅ ក៏បានសម្លាប់យុវជនខ្មែរម្នាក់ ឈ្មោះ ចាន់ ឧត្តម ដែលទើបទៅហាត់ការនៅប្រទេសអ៊ីស្រាអែលផ្នែកពេទ្យសត្វនៅទីនោះ។
ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជា លោក គិន ភា ថ្លែងថាលោកចង់ឃើញតំបន់ហ្កាហ្សាស្រ្ទីបក្លាយជាតំបន់សន្តិភាពមានប្រជាពលរដ្ឋរស់នៅដោយស្មើភាពគ្នានិងចង់ឃើញប៉ាឡេស្ទីន និងអ៊ីស្រាអែលក្លាយជារដ្ឋឯករាជ្យ បូរណភាពទឹកដី និងរស់នៅដោយសន្តិសហវិជ្ជមាន។លោកបន្ថែមថាអ្វីដែលភាគីកម្ពុជាអាចធ្វើទៅបាន គឺតាមរយៈការបោះឆ្នោតនៅអង្គការសហប្រជាជាតិនូវរាល់ដំណោះស្រាយទាំងឡាយណាដែលធ្វើឡើងដោយសន្តិវិធីការទូតក្នុងការជំរុញឱ្យបញ្ឈប់ការបាញ់គ្នា និងទាមទារឱ្យមានការដោះលែងចំណាប់ខ្មាំងទាំងអស់នៅតំបន់ហ្កាហ្សាស្រ្ទីប។
បើតាមលោក គិន ភា សង្រ្គាមរវាងអ៊ីស្រាអែល និងក្រុមហាម៉ាស់ ពិបាកនឹងរកច្រកចេញ ប្រសិនបើភាគីមហាអំណាចគាំទ្រតែភាគីម្ខាងៗ។
លោកលើកឡើងថា៖ «បើសិនជាយើងនៅតែគាំទ្រតែម្ខាងៗ សង្គ្រាមនេះគឺមិនអាចចប់ទេ ហើយអ្នកដែលរងសោកនាដកម្មខ្លាំងជាងគេ គឺមិនមែនប្រទេសមហាអំណាច មិនមែនកងទ័ពទាំងសងខាងទេ គឺជាជនស៊ីវិលជាពិសេសគឺជនស៊ីវិលស្លូតត្រង់ដែលកំពុងតែរស់នៅតំបន់ហ្កាហ្សាស្រ្ទីប ដែលកំពុងតែរងនូវការបាញ់ប្រហាររងនូវការហ៊ុំព័ទ្ធមិនឱ្យមានការបញ្ជូនស្បៀងអាហារ ទឹក សូម្បីតែភ្លើងអគ្គិសនីនៅមន្ទីរពេទ្យក៏ត្រូវបានកាត់ផ្តាច់។ ទាំងអស់នេះគឺជាសោកនាដកម្មរបស់មនុស្សជាតិនាសតវត្សរ៍ទី២១»។
លោក គិន ភា ឱ្យដឹងទៀតថាសង្គ្រាមនេះអាចនឹងបន្តអូសបន្លាយរាប់សតវត្សរ៍ទៀត បើសិនជាប្រទេសមហាអំណាចមិនមានសុឆន្ទៈក្នុងស្វែងរកដំណោះស្រាយរួមមួយ ប្រកបដោយយុត្តិធម៌ទេនោះ និងថាសង្រ្គាមនេះក៏ប៉ះពាល់ដល់អាស៊ាន និងកម្ពុជារួមទាំងពិភពលោកទាំងមូលផងដែរ បន្ទាប់ពីវិបត្តិកូវីដ១៩ និងសង្រ្គាមរវាងរុស្ស៊ី និងអ៊ុយក្រែន៕
