កម្ពុជាបានកត់ត្រាកំណើនឆ្លងកូវីដ១៩ ប្រចាំថ្ងៃច្រើនបំផុតមិនធ្លាប់មាន ដល់ទៅ ៥៧៦ ករណី នៅថ្ងៃសុក្រនេះ ដែលពាក់ព័ន្ធនឹងការឆ្លងក្នុងផ្សារម្ហូបនិងរោងចក្រកាត់ដេរ។
អង្គការសុខភាពពិភពលោក (WHO) បានលើកទឹកចិត្តឱ្យរដ្ឋនិងប្រជាជនកម្ពុជាចូលរួមបិទបញ្ចប់ការចម្លងនេះ មុនពេលកម្ពុជាពើបប្រទះនឹង «គ្រោះមហន្តរាយថ្នាក់ជាតិ »បង្កដោយជំងឺកូវីដ១៩។
ក្នុងចំណោមករណីថ្មីទាំងនោះ មាន ៥៤៤ ករណីរកឃើញនៅភ្នំពេញ ដែលមានចង្កោមឆ្លងចម្បងៗពីរគឺផ្សារអូរឫស្សី និងរោងចក្រកាត់ដេររបស់តៃវ៉ាន់ នៅខណ្ឌមានជ័យ ហើយក៏មានឆ្លងនៅទីតាំងផ្សេងទៀតផងដែរ។ នេះបើតាមលោក ម៉េត មាសភក្ដី អ្នកនាំពាក្យរដ្ឋបាលរាជធានីភ្នំពេញ។
លោក ម៉េត មាសភក្ដី បានប្រាប់វីអូអេថា៖ «ជាធម្មតាអ៊ីចឹងហើយ វាត្រូវតែចេញពីស្ថានភាពនៃភូមិសាស្ត្រចាស់ គ្រាន់តែក្នុងនោះក៏វាមានការចេញនៅទីតាំងផ្សេងៗទៀតផងដែរ មិនចេញតែពីគោលដៅហ្នឹងទាំងស្រុង ១០០% ទេ ... មានចម្រុះគ្នាណា មានចម្រុះគ្នា»។
មន្ត្រីរូបនេះបន្តថា ផ្សារម្ហូបនិងទីតាំងផ្សេងទៀតបានបង្កើនការប្រុងប្រយ័ត្នដែលមានស្រាប់ ដើម្បីទប់ស្កាត់ការឆ្លងបន្តទៅទៀត ដូចនឹងនៅផ្សារអូរឫស្សី ដែលបានបិទទ្វារតាំងពីដើមសប្ដាហ៍នេះ។
«ការយកចិត្តទុកដាក់លើកិច្ចការហ្នឹងជាច្រើនយូរមកហើយ មិនមែនទើបតែពេលនេះទេ ហើយវិធានការផ្សេងៗ ក៏ត្រូវបានអនុវត្តកន្លងមកដែរ គ្រាន់តែវាមានឧបទ្ទវហេតុនៃកិច្ចការខ្លះដែលយើងពិបាកនឹងនេះដែរ វាបានកើតឡើង ជាឧទាហរណ៍នៅក្នុងផ្សារអូរឫស្សីជាដើម»។
តាមការផ្សាយនៅថ្ងៃសុក្រនេះរបស់អនុគណៈកម្មការស្រាវជ្រាវជំងឺកូវីដ១៩ ការតាមដានរកអ្នកប៉ះពាល់បានប្រកាសឡើងបន្ថែម ខណៈមានអ្នកវិជ្ជមានកូវីដ១៩ ធ្វើដំណើរទៅផ្សារដើមគរ ផ្សារនាគមាស និងផ្សារបឹងត្របែកផ្លាហ្សា។
លោកឧត្ដមសេនីយ៍ឯក ឌី វិជ្ជា ប្រធានអនុគណៈកម្មការបានប្រាប់វីអូអេនារសៀលថ្ងៃសុក្រថា៖ «គិតត្រឹមម៉ោងនេះ យើងបានត្រឹមតែដឹងថា ផ្សារទាំងនោះមានវត្តមានអ្នកជំងឺទៅដល់ ប៉ុន្តែមិនទាន់រកឃើញថាមានអ្នកឆ្លងនៅក្នុងតំបន់ផ្សារទាំងនោះនៅឡើយទេ»។
ទីតាំងឆ្លងធំនៅរោងចក្រឌីនហាន់ (Din Han) ស្ថិតក្នុងខណ្ឌមានជ័យ មានកម្មករកម្មការិនីបម្រើការងារប្រមាណ ២.៥០០ នាក់។ រដ្ឋបាលរាជធានីភ្នំពេញបានព្រមានពីការបាត់បង់ការងារ បន្ទាប់ពីការឆ្លងបានធូរស្បើយសម្រាប់កម្មករ ដែលបដិសេធមិនព្រមចូលខ្លួនទៅធ្វើតេស្ដរកវីរុសជំងឺកូវីដ១៩។
លោក ហេង សួរ អ្នកនាំពាក្យក្រសួងការងារមិនបានឆ្លើយតបនឹងសំណួររបស់វីអូអេនៅឡើយ គិតត្រឹមរសៀលថ្ងៃសុក្រនេះ។
កំណើនការឆ្លងយ៉ាងគំហុកនៅថ្ងៃនេះបាននាំឱ្យករណីឆ្លងកូវីដ១៩ សរុបនៅកម្ពុជាកើនដល់ ៣.៦០៤ ករណី ដែលក្នុងនោះមាន ៣.០៧២ ករណី ស្ថិតក្នុងចង្កោមពាក់ព័ន្ធនឹងព្រឹត្តិការណ៍ ២០ កុម្ភៈ ដែលអូសបន្លាយ ៧ សប្ដាហ៍មកហើយ។
នៅព្រឹកព្រហាមថ្ងៃសុក្រនេះ វេជ្ជបណ្ឌិត ឱ វណ្ណឌីន អ្នកនាំពាក្យក្រសួងសុខាភិបាល បានបង្ហាញក្ដីបារម្ភអំពីកំណើននៃការឆ្លងកូវីដដែលចេះបន្ត។
លោកស្រី បានសរសេរក្នុងន័យដើមថា៖ «ឃើញកើនឡើងច្រើនបង្កើតការព្រួយបារម្ភដល់ផលប៉ះពាល់សុខភាពសាធារណៈ ក្នុងរយៈពេលយូរដែលយើងកំពុងប្រឈមទៅនឹងហានិភ័យខ្ពស់ណាស់សម្រាប់ឈានចូលដល់ការរាតត្បាតទ្រង់ទ្រាយធំ នៅក្នុងសហគមន៍ និងផលរំខានដល់កំណើនសេដ្ឋកិច្ចគ្រួសារនិងសង្គម»។
វេជ្ជបណ្ឌិត Li Ailan តំណាងប្រចាំប្រទេសកម្ពុជានៃអង្គការសុខភាពពិភពលោក និយាយថា ទោះបីមានឆ្លង លោកស្រីមិនលើកទឹកចិត្តឱ្យមានការបិទទ្វារទាំងស្រុងនូវរោងចក្រនិងផ្សារម្ហូបនោះទេ ប៉ុន្តែគួរប្រកាន់វិធានរក្សាគន្លាត និងបិទបើកទីតាំងតាមស្ថានភាពហានិភ័យជាក់ស្ដែង។
មន្ត្រីអង្គការសុខភាពពិភពលោករូបនេះប្រាប់វីអូអេតាមសារអ៊ីមែលថា៖ «តួលេខនៃករណីរកឃើញថ្មីនៅថ្ងៃនេះបង្កជាការព្រួយបារម្ភជាអនេក។ កម្ពុជាកំពុងរំកិលខ្លួនមកដល់ចំណុចរបត់ផ្លូវបំបែកដ៏សំខាន់មួយ នៃកិច្ចខិតខំរបស់ប្រទេសក្នុងការគ្រប់គ្រងការផ្ទុះឆ្លងដែលកំពុងមានសព្វថ្ងៃ»។
វេជ្ជបណ្ឌិត Li Ailan បានបន្ថែមថា៖ «អ្វីដែលគួរបារម្ភផងដែរនោះគឺថា ការផ្ទុះឆ្លងនេះមានបង្កប់នូវប្រភេទវីរុសវ៉ារ្យ៉ង់ថ្មីបម្លែងខ្លួន (B.1.1.7) ដែលឆ្លងលឿនជាងមុន និងបង្កការធ្លាក់ខ្លួនឈឺធ្ងន់ធ្ងរ។ មានលទ្ធភាពច្រើនដែលថាព្រឹត្តិការណ៍នៃការផ្ទុះឆ្លងសព្វថ្ងៃអាចនឹងវិវត្តទៅជាគ្រោះមហន្តរាយថ្នាក់ជាតិ ដែលយើងត្រូវធ្វើការរួមគ្នាដើម្បីបង្ការសេណារីយោបែបនេះ»។
បើតាមក្រសួងសុខាភិបាល គិតត្រឹមព្រឹកថ្ងៃទី ៩ ខែមេសានេះ មានអ្នកជំងឺ ៤៩៧ នាក់នៅភ្នំពេញ មិនទាន់ត្រូវបានបែងចែកទៅមណ្ឌលព្យាបាលនៅឡើយ។ ព្រមពេលជាមួយគ្នា នៅថ្ងៃសុក្រនេះដែរ រដ្ឋបាលរាជធានីភ្នំពេញបានយកវិទ្យាល័យជា ស៊ីម សាមគ្គី ជាមន្ទីរពេទ្យបណ្ដោះអាសន្នសម្រាប់ព្យាបាលអ្នកជំងឺកូវីដ១៩ អាចទទួលអ្នកជំងឺបាន ២៣៨ នាក់។
លោក ម៉េត មាសភក្ដី អ្នកនាំពាក្យរដ្ឋបាលរាជធានីបញ្ជាក់ប្រាប់វីអូអេថា អាជ្ញាធរកំពុងសំឡឹងមើលទីតាំងផ្សេងទៀត ដែលអាចប្រែក្លាយជាមណ្ឌលព្យាបាលបាន តាមស្ថានភាពជាក់ស្ដែង៕
