ភ្ជាប់​ទៅ​គេហទំព័រ​ទាក់ទង

លោកហ៊ុន សែន​ប្រកាស​ផ្អាក​ការ​ផ្តល់​​ដី​សម្បទាន​សេដ្ឋ​កិច្ច​

  • ហេង រស្មី

នាយក​រដ្ឋមន្ត្រី​ហ៊ុន សែន​បាន​បញ្ជា​ឲ្យ​ផ្អាក​ជា​បណ្តោះ​អាសន្ន​នូវ​ការ​ផ្តល់​ដី​សម្បទាន​សេដ្ឋកិច្ច។ ​

ក្រុមហ៊ុន​ដែល​ទទួល​បាន​សិទ្ធិ​គ្រប់គ្រង​ដី​សម្បទាន​សេដ្ឋ​កិច្ច​អាច​នឹង​រក​ដៃ​គូ​ក្រុមហ៊ុន​វិនិយោគ​បាន​ តែ​មិន​អនុញ្ញាត​ឲ្យ​មាន​ការ​ផ្ទេរ​សិទ្ធិ​គ្រប់គ្រង​ដី​សម្បទាន​សេដ្ឋ​កិច្ច​ទៅ​ឲ្យ​ក្រុមហ៊ុន​ឯក​ជន​ផ្សេង​ទៀត​បាន​ឡើយ។​

​ភ្នំពេញ៖ លោកនាយក​រដ្ឋមន្ត្រី​ហ៊ុន សែន​ នៅ​ថ្ងៃ​សុក្រ​នេះ​ បាន​អះអាង​សារជាថ្មី​ម្តងទៀត​ឲ្យ​ផ្អាក​ជា​បណ្តោះ​អាសន្ន​នូវ​ការផ្តល់​ដី​សម្បទាន​សេដ្ឋកិច្ច​ដល់​ក្រុមហ៊ុន​ឯកជន​ ដែល​វិធានការ​នេះ​បាន​ទទួល​ការ​ស្វាគមន៍​ពី​មន្ត្រី​គណបក្ស​ប្រឆាំង ​និង​មន្ត្រី​អង្គការ​សង្គម​ស៊ីវិល​មួយ​ចំនួន​ថា​ ជា​នយោបាយ​ដ៏​ត្រឹមត្រូវ​មួយ​ដើម្បី​កាត់​បន្ថយ​នូវ​ការ​ចាប់​យក​ដីធ្លី​ដោយ​ក្រុមហ៊ុន​ឯកជន។​

ការ​អះអាង​របស់​លោក​នាយករដ្ឋមន្ត្រី​ហ៊ុន សែន​បាន​ធ្វើឡើង​នៅ​ក្នុង​កិច្ចប្រជុំ​ប្រចាំ​សប្តាហ៍​នៅ​ទីស្តី​ការ​គណៈរដ្ឋមន្ត្រី​ ដោយ​លោក​បាន​និយាយ​ថា ​ការ​ផ្អាក​នេះ​អាច​នឹង​បន្ត​រយៈ​ពេល​វែង​ និង​អាច​ឈាន​ដល់​ពេល​ដែល​លោក​ចូល​និវត្តន៍​ពី​ឆាក​នយោបាយ​ទៀត​ផង។​

សេចក្តី​ប្រកាស​ព័ត៌មាន​របស់​ទីស្តីការ​គណៈ​រដ្ឋមន្ត្រី​ដែល​ទើប​នឹង​ចេញ​ផ្សាយ​នៅ​ព្រលប់​ថ្ងៃ​សុក្រ​នេះ​ឲ្យ​ដឹង​ថា​ ក្រុមហ៊ុន​ដែល​ទទួល​បាន​សិទ្ធិ​គ្រប់គ្រង​ដី​សម្បទាន​សេដ្ឋ​កិច្ច​អាច​នឹង​រក​ដៃ​គូ​ក្រុមហ៊ុន​វិនិយោគ​បាន​ តែ​មិន​អនុញ្ញាត​ឲ្យ​មាន​ការ​ផ្ទេរ​សិទ្ធិ​គ្រប់គ្រង​ដី​សម្បទាន​សេដ្ឋ​កិច្ច​ទៅ​ឲ្យ​ក្រុមហ៊ុន​ឯក​ជន​ផ្សេង​ទៀត​បាន​ឡើយ។​

ស្រប​ពេល​ដែល​លោក​នាយក​រដ្ឋមន្ត្រី​ហ៊ុន សែន​បាន​បញ្ជា​ឲ្យ​ផ្អាក​ជា​បណ្តោះ​អាសន្ន​នូវ​ការ​ផ្តល់​ដី​សម្បទាន​សេដ្ឋកិច្ច ​លោក​ក៏បាន​ធ្វើការ​កែ​តម្រូវ​ថា​ ក្រុម​ហ៊ុន​វិនិយោគ​ណា​ ដែល​បាន​ទទួល​ដី​សម្បទាន​សេដ្ឋកិច្ច​ ត្រូវ​បង់ពន្ធ​ថ្ងៃ​ឈ្នួល​ដី​ចំនួន​ប្រាំ​ដុល្លារ​នៅ​ក្នុង​មួយ​ហិច​តា ​ចាប់ពី​ឆ្នាំ​ទី៦ ​ជា​រៀងរាល់ឆ្នាំ​ដោយ​មិន​រើស​អើង​បែងចែក​ប្រភេទ​ដី ដែល​ត្រូវ​ធ្វើ​ផលិតកម្ម​នៅ​ក្នុង​វិស័យ​កសិកម្ម​នោះ​ឡើយ។​

លោកយឹម​ សុវណ្ណ​ អ្នកតំណាង​រាស្ត្រ ​និង​ជា​អ្នកនាំពាក្យ​គណបក្ស​ប្រឆាំង​ បាន​គាំទ្រ​សេចក្តី​សម្រេច​របស់​រដ្ឋាភិបាល។​ លោក​បាន​បញ្ជាក់​ថា​ ប្រសិនណា​បើ​ចាំបាច់​គួរ​តែ​បញ្ឈប់​ការ​ផ្តល់​ដី​សម្បទាន​សេដ្ឋកិច្ច​តែម្តង​ទៅ​ ពីព្រោះ​ប្រជា​កសិករ​មិន​មាន​ដី​គ្រប់​គ្រាន់​សម្រាប់​ធ្វើ​ស្រែ​ចម្ការ​ទេ។​

«ពីព្រោះ​ខ្មែរ​យើង​ខ្វះ​ដី​ធ្វើស្រែ​ ប្រជា​កសិករ​រាប់លាន​នាក់​ដែល​ខ្វះ​ដី​ធ្វើ​ស្រែ​ចម្ការ។​ គ្រាន់តែ​ដាំ​ដំឡូងមី​ ដាំសណ្តែក ​ដាំអី​ មិន​ចាំ​បាច់​ឲ្យ​ក្រុម​ហ៊ុន​បរទេស​ធ្វើ​ទេ​ ទុក​ឲ្យ​ប្រជា​ពលរដ្ឋ​ខ្មែរ​ កសិករ​ខ្មែរ​ធ្វើ​ទៅ»។​

លោកអំ សំអាត ​មន្ត្រី​អង្គការ​លីកាដូ​ឃ្លាំមើល​ការ​រំលោភ​សិទ្ធិ​មនុស្ស​ បាន​និយាយ​ថា​ កន្លង​មក ការ​រំលោភ​ ការ​ចាប់​យក​ដីធ្លី​ពាក់​ព័ន្ធ​នឹង​ការផ្តល់​ដី​សម្បទាន​សេដ្ឋកិច្ច​នេះ​បាន​កើត​មាន​ឡើង​ច្រើន​ជាង​គេ។​ ប្រសិន​ណា​បើ​រដ្ឋាភិបាល​អាច​ផ្អាក​ការផ្តល់​ដី​សម្បទាន​សេដ្ឋកិច្ច​នោះ​ វា​នឹង​អាច​កាត់​បន្ថយ​ជំលោះ​នេះ​បាន។​ ក៏ប៉ុន្តែ​លោក​បាន​អះអាង​ថា ​រដ្ឋាភិបាល​គួរតែ​ប្រកាស​ថា​ មាន​ក្រុមហ៊ុន​ប៉ុន្មាន​ទៀត​ដែល​នៅ​សេស​សល់ ​បន្ទាប់​ពី​បាន​ទទួល​គោល​ការណ៍​ពី​រដ្ឋាភិបាល​រួចហើយ​ដើម្បី​បញ្ឈប់​ការ​សង្ស័យ​អំពី​ការ​ចេញ​អនុក្រិត្យ​ឲ្យ​ក្រុម​ហ៊ុន​ជា​បន្ត​បន្ទាប់​ទៀត។​

«សុំ​ឲ្យ​រាជ​រដ្ឋាភិបាល​ប្រកាស​ថា ​ក្រុមហ៊ុន​មាន​ប៉ុន្មាន​ទៀត​ដែល​ត្រូវ​ទទួល​គោល​ការណ៍​នឹង​ចេញ​អាជ្ញា​បណ្ណ​ជា​បន្ត​ទៀត»។​

កាល​ពីដើម​ខែ​ឧសភា​ លោក​នាយក​រដ្ឋមន្ត្រី​ហ៊ុន សែន​បាន​ដាក់​បទ​បញ្ជា​ម្តង​ឲ្យ​ផ្អាក​ការផ្តល់​ដី​សម្បទាន​សេដ្ឋកិច្ច​ដល់​ក្រុម​ហ៊ុន​ឯក​ជន។​ ក៏ប៉ុន្តែ​បទ​បញ្ជា​នេះ​បាន​បើកផ្លូវ​សម្រាប់​ឲ្យ​មាន​ការ​ផ្តល់​ដី​សម្បទាន​សេដ្ឋកិច្ច​ដល់​ក្រុមហ៊ុន​មួយ​ចំនួន​ ដែល​បាន​ព្រម​ព្រៀង​ជាមួយ​រដ្ឋាភិបាល​រួច​ហើយ។​

រហូត​មក​ដល់​ពេល​នេះ​ មាន​ក្រុមហ៊ុន​ឯកជន​ប្រមាណ​ជាង​២០០​ ដែល​រដ្ឋាភិបាល​បាន​ផ្តល់​ដី​សម្បទាន​សេដ្ឋកិច្ច​នៅ​លើ​ទំហំ​ផ្ទៃ​ដី​សរុប​ប្រមាណ​ជាង​ពីរ​លាន​មួយ​សែន​ហិចតា។​

ការ​ផ្តល់​ដី​សម្បទាន​សេដ្ឋ​កិច្ច​ទៅ​ឲ្យ​ក្រុមហ៊ុន​ឯកជន​កន្លង​មក​នេះ​បាន​បង្ក​ឲ្យ​មាន​ការ​រិះគន់​ថា​ បាន​ប៉ះពាល់​ដីស្រែ​ចម្ការ​របស់​ប្រជាជន​ និង​ការ​រក​ផល ​អនុផល​ព្រៃឈើ​របស់​ជន​ជាតិ​ភាគតិច​នៅ​តាម​បណ្តា​ខេត្ត​មួយ​ចំនួន៕​
XS
SM
MD
LG