សមាជិកសភាអូស្រ្តាលីម្នាក់និយាយថា លោកបានស្វះស្វែងរកអន្តរាគមន៍ពីប៉ូលិសសហព័ន្ធនៅក្នុងការឆ្លើយតបដល់ការគំរាមកំហែងពីនាយករដ្ឋមន្រ្តីកម្ពុជាលោក ហ៊ុន សែន ដែលថាតាមវាយពលរដ្ឋអូស្រ្តាលីនៅលើទឹកដីរបស់ពួកគេ។
ក្នុងសុន្ទរកថាមួយកាលពីថ្ងៃពុធ លោក ហ៊ុន សែន ក៏បានគំរាមកំហែងធ្វើពហិការមិនចូលរួមសន្និសីទកំពូលពិសេសរវាងសមាគមអាស៊ាននិងអូស្រ្តាលីនៅក្នុងក្រុងស៊ីដនី នៅខែក្រោយផងដែរ ដោយ លោកហ៊ុន សែនបាននិយាយថា អ្នកដែលមានផែនការធ្វើបាតុកម្មនៅទីនោះត្រូវតែចាំថា «ដំណើរទស្សនកិច្ចរបស់ខ្ញុំជាកិត្តិយសមួយសម្រាប់រដ្ឋាភិបាលអូស្រ្តាលីរបស់អ្នកឯង»។
លោកនាយករដ្ឋមន្រ្តីហ៊ុន សែនបាននិយាយទៀតថា៖ «ប្រសិនបើអ្នកឯងដុតរូបសំណាករបស់ខ្ញុំ ខ្ញុំនឹងតាមវាយអ្នកឯងដល់ផ្ទះ។ខ្ញុំព្រមានអ្នកឯងជាមុន។ ខ្ញុំចង់បញ្ជាក់ឲ្យច្បាស់ថា បើអ្នកឯងមានសិទ្ធិដុតរូបសំណាករបស់ខ្ញុំ ខ្ញុំក៏មានសិទ្ធិវាយអ្នកឯងដែរ»។
នៅឯសន្និសីទកំពូល បាតុកររាប់រយនាក់មានផែនការតទល់ជាមួយលោកហ៊ុន សែន ដែលបានកាន់កាប់អំណាចអស់ជាង៣ទសវត្សរ៍ ហើយកាលពីពេលថ្មីៗនេះបានរំលាយគណបក្សប្រឆាំងមុនការបោះឆ្នោតមុនការបោះឆ្នោតនៅខែកក្កដាខាងមុខនេះ។
កាលពីពេលមុន នាយករដ្ឋមន្រ្តីហ៊ុន សែន បានសច្ចាថា នឹងសម្លាប់មនុស្សរាប់រយនាក់ ប្រសិនបើចាំបាច់ដើម្បីឈ្នះឆ្នោតហើយលោកបានបន្តវាយប្រហារទៅលើបណ្តាញផ្សាយព័ត៌មាន អង្គការសង្គមស៊ីវិលនិងពួកប្រឆាំង។
ការនិយាយបែបកំហឹងរបស់នាយករដ្ឋមន្រ្តីនៅសប្តាហ៍នេះបានកើតមានឡើងនៅពេលដែលប្រទេសអាល្លឺម៉ង់បានព្យួរការផ្តល់ទិដ្ឋាការដល់មន្រ្តី រដ្ឋាភិបាលនៅក្នុងការឆ្លើយតបដល់សកម្មភាពទាំងនេះ ខណៈដែលមានសេចក្តីរាយការណ៍ថា ក្រុមប្រឹក្សាសហភាពអឺរ៉ុបប្រហែលស្នើឲ្យមានការដាក់ទណ្ឌកម្មហើយនឹងសើរើពិនិត្យមើលឡើងវិញនូវភាពអនុគ្រោះដ៏សំខាន់មួយសម្រាប់កម្ពុជានាំទំនិញចូលទៅកាន់ទីផ្សាររបស់ពួកគេ៕
