នាយករដ្ឋមន្ត្រីកម្ពុជាកាលពីថ្ងៃសៅរ៍ បានចោទប្រកាន់រដ្ឋាភិបាលសហរដ្ឋអាមេរិកថា មិនស្មោះត្រង់ក្នុងការប្រកាសព្យួរជំនួយរបស់ខ្លួនដល់ប្រទេសនៅអាស៊ីអាគ្នេយ៍នេះ ដោយនិយាយថា ប្រទេសកម្ពុជាឈប់ទទួលជំនួយពីរដ្ឋាភិបាលក្រុងវ៉ាស៊ីនតោនក្នុងឆ្នាំ២០១៦។
សេតវិមានបាននិយាយកាលពីថ្ងៃអង្គារថា ខ្លួនបានផ្អាកឬបន្ថយថវិកាសម្រាប់ទីភ្នាក់ងារ USAID របស់អាមេរិកនៅកម្ពុជានិងកម្មវិធីជំនួយផ្នែកយោធាដែលគាំទ្រដល់យោធាប្រទេសកម្ពុជា ដល់នាយកដ្ឋានពន្ធដារនិងអាជ្ញាធរមូលដ្ឋានដែលស.រ.អា.ចាត់ទុកថា ជាអ្នកទទួលខុសត្រូវអស្ថិរភាពនយោបាយនៅកម្ពុជា។
នៅក្នុងសុន្ទរកថាជាសាធារណៈលើកដំបូងបង្អស់របស់លោកចាប់តាំងពីការប្រកាសព្យួរជំនួយនោះ លោកនាយករដ្ឋមន្រ្តី ហ៊ុន សែន បានចោទប្រកាន់ថា លោក William Heidt ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជាភូតកុហក់ ព្រោះការកាត់ជំនួយឲ្យនាយកដ្ឋានពន្ធដាររបស់កម្ពុជាត្រូវបានធ្វើឡើងនៅឆ្នាំ ២០១៦។
លោក ហ៊ុន សែន និយាយថា «យើងមាន១៦លាននាក់ មិនបានទទួលជំនួយអាមេរិក នៅក្នុងវិស័យពន្ធដារទេ។ ជំនួយនេះត្រូវបានបញ្ចប់រួចរាល់នៅឆ្នាំ២០១៦»។
លោក ហ៊ុន សែន ថ្លែងដូច្នេះទៅកាន់កម្មករកាត់ដេររាប់ពាន់នាក់នៅខេត្តព្រះសីហនុ។ លោកបន្តថា សូមលោកឯកអគ្គរដ្ឋទូតសហរដ្ឋអាមេរិកឆ្លើយសំណួរមួយនេះថា ហេតុអ្វីបានជាលោកប្រកាសការកាត់ជំនួយក្នុងពេលដែលគ្មានជំនួយ? តើលោកមានបំណងបង្ខូចកេរ្ដិ៍ឈ្មោះរបស់កម្ពុជាឬ?»
ស្ថានទូតសហរដ្ឋអាមេរិកនៅទីក្រុងភ្នំពេញបានបដិសេធមិនធ្វើអត្ថាធិប្បាយ។
ការសម្រេចចិត្តរបស់សេតវិមានកើតមានចំពេលមានការបង្ក្រាបដោយរដ្ឋាភិបាលប្រឆាំងនឹងការរិះគន់លោក ហ៊ុន សែន នៅមុនការបោះឆ្នោតសភាខែកក្កដា។
ការបង្រ្កាបនេះធ្វើឡើងចំពោះអង្គការមិនមែនរដ្ឋាភិបាលមួយចំនួន ប្រព័ន្ធផ្សព្វផ្សាយឯករាជ្យនិងសមាជិកសភាគណបក្សប្រឆាំង។ កាលពីខែវិច្ឆិកា គណបក្សសង្គ្រោះជាតិដែលជាគណបក្សប្រឆាំងដ៏សំខាន់ ត្រូវបានរំលាយដោយតុលាការកំពូលតាមសំណើរបស់រដ្ឋាភិបាលលោកហ៊ុន សែន។
លោក ហ៊ុន សែន ដែលជាសម្ព័ន្ធមិត្តជិតស្និទ្ធរបស់ចិន បានរិះគន់ជាសាធារណៈជាញឹកញាប់លើសហរដ្ឋអាមេរិកជាពិសេសការទម្លាក់គ្រាប់បែកមកលើកម្ពុជាអំឡុងសង្គ្រាមវៀតណាមដែលបានបញ្ចប់នៅឆ្នាំ១៩៧៥។ លោក ហ៊ុន សែន ដែលបានគ្រប់គ្រងប្រទេសកម្ពុជាអស់រយៈពេល៣៣ឆ្នាំ បានចោទប្រកាន់លោក កឹម សុខា មេដឹកនាំគណបក្សសង្គ្រោះជាតិ ត្រូវបានចាប់ខ្លួនដាក់ពន្ធនាគារកាលពីឆ្នាំមុនពីបទឃុបឃិតជាមួយសហរដ្ឋអាមេរិកដើម្បីផ្តួលរំលំរដ្ឋាភិបាលរបស់លោក។ លោកកឹម សុខា និងស.រ.អា.បានបដិសេធការចោទនេះ។
ក្រុមសិទ្ធិមនុស្សនិងបណ្តាប្រទេសលោកខាងលិចបានរិះគន់ថា ការបង្រ្កាបទៅលើគណបក្សប្រឆាំងនៅមុនការបោះឆ្នោតខែកក្កដា គឺដើម្បីកម្ចាត់គូប្រជែងនយោបាយរបស់លោក ហ៊ុន សែន។
សេតវិមានបាននិយាយថា រដ្ឋាភិបាលក្រុងវ៉ាស៊ីនតោនបានចំណាយប្រាក់ជាង១ពាន់លានដុល្លារក្នុងការគាំទ្រប្រទេសកម្ពុជាហើយថា ជំនួយខាងផ្នែកសុខាភិបាល កសិកម្ម និងដោះមីននឹងនៅតែបន្ត៕
