វិបត្តិនយោបាយនៅកម្ពុជាត្រូវបានបិទបញ្ចប់កាលពីថ្ងៃអង្គារ ក្រោយជំនួបថ្នាក់ដឹកនាំកំពូលរបស់គណបក្សប្រជាជនកម្ពុជានិងគណបក្សសង្គ្រោះជាតិហើយមានប្រជាពលរដ្ឋមួយចំនួនបានសម្តែងការសាទរចំពោះលទ្ធផលនៃការចរចាដើម្បីបញ្ចប់ជម្លោះនយោបាយនេះ។
លោកចាន់ រដ្ឋាអាយុ ៣៥ឆ្នាំគឺជាប្រជាពលរដ្ឋរស់នៅក្នុងសង្កាត់ទឹកថ្លា ក្រុងភ្នំពេញ។
«ពេញចិត្តខ្លះដែរតែវាមិនបាន ១០០ភាគរយតែមិនដឹងធ្វើម៉េច គាត់នៅតែចូលប្រជុំចឹង ចូលក៏ចូលទៅចុះតែយើងរកដំណោះស្រាយឲ្យប្រជាពលរដ្ឋមានសិទ្ធិសេរីភាពពេញលេញ»។
កញ្ញា ជា ឆវ័ន ជានិស្សិតឆ្នាំទី២ផ្នែកគ្រប់គ្រងនៃសាកលវិទ្យាល័យជាតិគ្រប់គ្រងបានបញ្ជាក់ថា៖ «ធម្មតាតែមានជម្លោះវាអត់ល្អ ប្រទេសខ្មែរយើង ត្រូវគ្នាកាត់បន្ថយជម្លោះវាល្អ។ ប្រទេសយើងផ្ទៃក្នុងយើងសាមគ្គីគ្នាអាហ្នឹងយើងពិតជារីកចម្រើន»។
លោក រឹម សារិទ្ធគឺជាអ្នករត់រ៉ឺម៉កកង់៣នៅម្តុំគល់ស្ពានជ្រោយចង្វា។
«អានេះខ្ញុំឲ្យតម្លៃអ្វីដែលគាត់ធ្វើបានត្រឹមត្រូវ ៥០%។ ៥០%គឺគាត់បានជួយឲ្យមានការដោះលែងសមាជិកគណបក្សសង្គ្រោះជាតិពីគុកព្រៃស»។
ប្រជាពលរដ្ឋម្នាក់ទៀតដែលមានទីលំនៅនៅក្បែរមាត់ទន្លេហើយ សុំមិនបញ្ចេញឈ្មោះបានបញ្ជាក់ថា៖ «ពេញចិត្តមិនពេញចិត្ត ប្រជាជនបន់ឲ្យតែឆាប់ត្រូវគ្នា ប៉ុន្តែគ្រាន់តែត្រូវគ្នាហ្នឹងប្រជាពលរដ្ឋនៅមិនទាន់ដឹងឲ្យបានច្បាស់តើ៧ចំណុចហ្នឹងមានអ្វីខ្លះ។ ប្រជាពលរដ្ឋគាត់នៅចង់ដឹងអាហ្នឹង។ តើសង្គ្រោះជាតិបានអ្វីខ្លះ»។
ទន្ទឹមនឹងគ្នានេះដែរអ្នកខ្លះទៀតបានសម្តែងការអាក់អន់ចិត្តចំពោះមេដឹកនាំគណបក្សប្រឆាំងដែលសុខចិត្តដើរចូលសភា ខណៈការសន្យារបស់ខ្លួនជាមួយប្រជាពលរដ្ឋអ្នកគាំទ្រនៅមិនទាន់បានចេញជាផ្លែផ្កានៅឡើយ។ ក៏ប៉ុន្តែប្រជាពលរដ្ឋក៏បានទទួលស្គាល់ដែរថាការចរចានេះស្ថិតនៅក្រោមគំនាបសង្កត់របស់គណបក្សកាន់អំណាច។
លោក ប៉ុន សុខខឿនអ្នករត់ម៉ូតូឌុបម្តុំវត្តភ្នំបានសម្តែងការអស់សង្ឃឹមចំពោះការយល់ព្រមដើរចូលសភារបស់មេដឹកនាំគណបក្សប្រឆាំង។
«អន់ចិត្តដែរតែមិនដឹងធ្វើម៉េច បើគេបង្ខំយើងទៅហើយ។ គេចាប់តំណាងរាស្រ្តយើងឲ្យយើងចូលចរចាហើយ គេប្រើកម្លាំងគាបសង្កត់ហើយ»។
លោក រឹម សារិទ្ធបន្ថែម៖ «តាមខ្ញុំគិតដូចអត់ន័យតែដដែលហ្នឹង។ ចុងបញ្ចប់ទៅអ្វីៗនៅស្ថិតនៅក្រោមកណ្តាប់ដៃរបស់គេដដែល»។
ប្រជាពលរដ្ឋរស់នៅម្តុំផ្សារអូរឬស្សីថ្លែងថាអ្វីៗត្រូវរង់ចាំមើលថាតើគណបក្សនយោបាយដែលព្រមព្រៀងគ្នានេះនឹងមានឆន្ទៈពិតប្រាកដជួយដល់រាស្រ្តឬយ៉ាងណា។
«អាហ្នឹងយើងអត់ទាន់ប្រាកដដែរ ដល់រង់ចាំមើលសិនតើគណបក្សទាំងពីរហ្នឹងស្រុះស្រួលគ្នា ធ្វើការមួយគ្នា យើងចំាមើលតើគណបក្សមួយណាដែលមានចិត្តចង់ជួយដល់រាស្រ្តពិតប្រាកដ»។
ដោយឡែកប្រជាពលរដ្ឋខ្លះទៀតក៏បានសម្តែងការព្រួយបារម្ភថាគណបក្សសង្គ្រោះជាតិទំនងជាអាចនឹងមានវាសនាដូចគណបក្សមួយចំនួនដែលធ្លាប់ទទួលការគាំទ្រលើសលប់ក្នុងសភា។
វិបត្តិជាប់គាំងនយោយបាយនៅកម្ពុជាបានអូសបន្លាយក្រោយការបោះឆ្នោតជាតិកាលពីថ្ងៃទី ២៨ ខែកក្កដាឆ្នាំ២០១៣។ គណបក្សសង្គ្រោះជាតិដែលជាគណបក្សជំទាស់ធំជាងគេនៅកម្ពុជាបានទទួលអាសនៈចំនួន៥៥ ខណៈពេលដែលគណបក្សប្រជាជនកម្ពុជាដែលកាន់អំណាចអស់រយៈពេលជាង ៣០ ឆ្នាំបានថយសំឡេងពី ៩០ អាសនៈក្នុងការបោះឆ្នោតអាណត្តិមុនមកត្រឹម ៦៨អាសនៈ។
យ៉ាងណាក៏ដោយប្រជាពលរដ្ឋមួយចំនួនក្នុងទីក្រុងភ្នំពេញមិនបានដឹងអំពីដំណោះស្រាយរវាងគណបក្សប្រជាជនកម្ពុជា និងគណបក្សសង្រ្គោះជាតិកាលពីថ្ងៃអង្គារនោះទេ៕
