អង្គការសិទ្ធិមនុស្សនានាបានរិះគន់ការបង្កើតច្រកទ្វារអ៊ីនធឺណិតថ្មីរបស់ប្រទេសកម្ពុជានៅសប្តាហ៍នេះ ដោយបាននិយាយថា វានឹងក្លាយជាឧបករណ៍ថ្មីសម្រាប់លោកនាយករដ្ឋមន្ត្រី ហ៊ុន សែន នៅក្នុងការគាបសង្កត់លើក្រុមប្រឆាំង។ ច្រកទ្វារអ៊ីនធឺណិតថ្មីនេះអនុញ្ញាតឲ្យមានការត្រួតពិនិត្យចរាចរណ៍អ៊ិនធឺណិតទាំងអស់។
លោក Phil Robertson នាយករងអង្គការសិទិ្ធមនុស្ស Human Rights Watch ប្រចាំទ្វីបអាស៊ី បាននិយាយថា៖ «លោកនាយករដ្ឋមន្រ្តី ហ៊ុន សែន បានវាយប្រហារដ៏គ្រោះថ្នាក់ប្រឆាំងនឹងសេរីភាពអ៊ីនធឺណិតនិងពាណិជ្ជកម្មតាមប្រព័ន្ធអ៊ីនធឺណិតនៅកម្ពុជា តាមរយៈការពង្រីកការគ្រប់គ្រងរបស់រដ្ឋាភិបាលលើប្រព័ន្ធអ៊ីនធឺណិត»។
លោកបាននិយាយនៅក្នុងសេចក្តីថ្លែងការណ៍មួយថា៖ «ច្រកទ្វារអ៊ីនធឺណិតជាតិរបស់កម្ពុជានេះគឺជាឧបករណ៍ដែលមិនទាន់មានកន្លងមករបស់រដ្ឋាភិបាលសម្រាប់ការបង្ក្រាបតាមអ៊ីនធឺណិត»។
ចំណែកឯអ្នកស្រី Emerlynne Gil ដែលជាអនុប្រធានប្រចាំតំបន់ផ្នែកស្រាវជ្រាវនៃអង្គការសិទ្ធិមនុស្ស Amnesty International វិញ បានហៅច្រកទ្វារអ៊ីនធឺណិតថ្មីនេះថាជា «គ្រោះមហន្តរាយសម្រាប់សិទ្ធិមនុស្ស»។
អនុក្រឹត្យមួយកម្រាស់ ១១ ទំព័ររបស់រដ្ឋាភិបាល ដែលត្រូវបានប្រកាសកាលពីថ្ងៃពុធ តម្រូវឲ្យក្រុមហ៊ុនផ្តល់សេវាអ៊ីនធឺណិតធ្វើការរៀបចំសេវារបស់ពួកគេឡើងវិញ តាមរយៈការបញ្ជូនសេវារបស់ពួកគេតាមច្រកទ្វារអ៊ីនធឺណិតជាតិក្នុងរយៈពេល ១២ ខែខាងមុខ គឺមុនខែកុម្ភៈ ឆ្នាំ ២០២២។
ច្រកទ្វារអ៊ីនធឺណិតនេះស្រដៀងទៅនឹងច្រកទ្វារអ៊ីនធឺណិតរបស់ប្រទេសចិន ដែលជាសម្ព័ន្ធមិត្តសេដ្ឋកិច្ចដ៏សំខាន់របស់កម្ពុជាដែរ។
អនុក្រឹត្យនេះបញ្ជាក់ថា ក្រុមហ៊ុនផ្តល់សេវាអ៊ីនធឺណិតត្រូវតម្រូវឲ្យអ្នកប្រើប្រាស់បំពេញបែបបទតាមអនឡាញដោយបញ្ជាក់អត្តសញ្ញាណឲ្យបានត្រឹមត្រូវ។
អនុក្រឹត្យនេះបានបន្ថែមថា ប្រសិនបើក្រុមហ៊ុនផ្ដល់សេវាអ៊ីនធឺណិតមិនបានភ្ជាប់បណ្ដាញរបស់ខ្លួនជាមួយនឹងច្រកទ្វារអ៊ីនធឺណិតថ្មីនេះទេ នោះអាជ្ញាបណ្ណអាជីវកម្មរបស់ពួកគេនឹងត្រូវផ្អាក ហើយគណនីធនាគារនឹងត្រូវបង្កក។
អ្នកនាំពាក្យរដ្ឋាភិបាលលោក ផៃ ស៊ីផាន បានបញ្ជាក់កាលពីថ្ងៃពុធថា អនុក្រឹត្យនេះគឺជាការចាំបាច់ដោយហេតុថា នៅកម្ពុជាមិនទាន់មានបទបញ្ជាអ៊ីនធឺណិតនៅឡើយ។ លោកបានបន្ថែមថា វាមិនសូវតឹងតែងដូចទៅនឹងបទប្បញ្ញត្តិនៅក្នុងសហរដ្ឋអាមេរិក និងចក្រភពអង់គ្លេសនោះទេ៕
